ភ្នំពេញៈ អ្នកនាំពាក្យអគ្គស្នងការដ្ឋាននគរបាលជាតិបានបញ្ជាក់ថា ការបំបៅដោះកូនជាកាតព្វកិច្ចដែលខានពុំបានដែលត្រូវតែបំពេញរបស់មាតា ហើយអ្វីដែលពាក់ព័ន្ធនឹងអធិការរងនៅស្រុកសៀមប៉ាង បំបៅដោះកូននេះ គឺអត់មានរឿងខុសឆ្គងនោះទេ។ ហើយត្រូវបានលើកទឹកចិត្តដោយថ្នាក់ដឹកនាំ នៃអគ្គស្នងការដ្ឋាននគរបាលជាតិ។
អ្នកនាំពាក្យអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ឆាយ គឹមខឿន បានមានប្រសាន៍ប្រាប់ CEN នៅព្រឹកថ្ងៃទី១១ ខែមីនា នេះថា ថ្មីៗនេះ ឃើញមានប្រតិកម្មជាច្រើនពីបណ្តាញសង្គមហ្វេសប៊ុក រួមទាំងសាធារណមតិគ្រប់មជ្ឈដ្ឋាន មានទាំងថ្នាក់ដឹកនាំ និងស្ថាប័នរដ្ឋផងដែរ ពាក់ព័ន្ធនារីនគរបាលមួយរូប គឺអធិការរងនៅស្រុកសៀមប៉ាង ដែលបំបៅដោះកូននៅគោលដៅប្រតិបត្តិការ។ បន្ទាប់ពីមានបង្ហោះរូបភាពបំបៅដោះកូន និងកិច្ចសន្យាបានធ្វើឲ្យសាធារណមតិគ្រប់មជ្ឈដ្ឋាន ទាំងស្ថាប័នរដ្ឋ និងឯកជន ប្រតិកម្មដោយបានបញ្ចេញនូវទស្សនផ្សេងៗគ្នា ដោយទស្សនខ្លះបែបស្តាំនិយម និងខ្លះបែបឆ្វេងនិយម និងប្រតិកម្មខ្លះទៀតតាមបែបកណ្តាល។
លោកឧត្តមសេនីយ៍ឯក ឆាយ គឹមខឿន បានបន្តថា ក្នុងនាមអ្នកនាំពាក្យអគ្គស្នងការដ្ឋាននគរបាលជាតិសូមបញ្ជាក់ថា ការបំបៅដោះកូនជាកាតព្វកិច្ចដែលខានពុំបានដែលត្រូវតែបំពេញរបស់មាតា ហើយអ្វីដែលពាក់ព័ន្ធនឹងនារីនគរបាល (អធិការរងនៅស្រុកសៀមប៉ាង) បំបៅដោះកូននេះ គឺអត់មានរឿងខុសឆ្គងធំដុំទេ។ ហើយនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានផ្តល់ប្រាក់ឧបត្ថម្ភ ៥០ម៉ឺនរៀល និងផ្លែឈើមួយចំនួនទៀត ។ កាយវិការនេះ គឺជាសារមួយចង់បញ្ជាក់ថា អធិការរងនៅស្រុកសៀមប៉ាងដែល បំបៅដោះកូន គឺមិនមានទោសពៃរ្យអ្វីទេ ហើយត្រូវបានលើកទឹកចិត្តដោយថ្នាក់ដឹកនាំ នៃអគ្គស្នងការដ្ឋាននគរបាលជាតិ។ ចំពោះកិច្ចសន្យាដែលបានធ្វើគឺរលត់អស់ហើយ។
អ្នកនាំពាក្យអគ្គស្នងការដ្ឋាននគរបាលជាតិបានបន្តថា អគ្គស្នងការដ្ឋាននគរបាលជាតិសូមទទួលយកគ្រប់ទស្សនទាំងអស់ ដែលពាក់ព័ន្ធនឹងនារីនគរបាលនៅស្រុកសៀមប៉ាង ខេត្តស្ទឹងត្រែង និងសូមអរគុណនៅការផ្តល់នូវគំនិតយោបល់នានា ដែលចាត់ទុកថា គឺជាការចូលរូមក្នុងការលំអរ លើកស្ទួយនូវកិត្តិយសនារីដែលជាកងកម្លាំងនគរបាលជាតិ៕ រក្សាសិទ្ធិដោយៈ ចេស្តារ
