ភ្នំពេញ ៖ យើងពិតជារំជួលចិត្ត និងស្ទើរតែទប់ទឹកភ្នែកពុំបាន ខណៈឃើញអ្នកជំងឺកូវីដ-១៩ បានលើកដៃសំពះ ថ្លែងអំណរគុណរាជរដ្ឋាភិបាល និងក្រុមការងារចម្រុះ ចេញពីបន្ទប់ព្យាបាលនៅសណ្ឋាគារ THE GREAT DUKE ក្រោយរៀបចំកន្លែងថ្មីយ៉ាងល្អជូនពួកគាត់។
តាមរយៈទំព័រហ្វេសប៊ុក Young Leadership Foundation-Cambodia បានបញ្ជាក់ឲ្យដឹងថា អ្នកកើតជំងឹកូវីដ១៩ ជាង១៧០នាក់ ត្រូវបានដឹកចេញពីមណ្ឌលចត្តាឡីស័ករាជធានីភ្នំពេញ (ព្រែកព្នៅ) ឆ្ពោះទៅទីតាំងថ្មីគឺសណ្ឋាគារ THE GREAT DUKE (អតីតសណ្ឋាគារអាំងទែកុងទីណង់តាល់) សម្រាប់ធ្វើការចត្តាឡីស័កក្នុងការព្យាបាល ក្រោយមានបទបញ្ជាបន្ទាន់ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា។
ក្រៅពីថ្លែងអំណរគុណដល់ប្រមុខរាជរដ្ឋាភិបាល អ្នកជំងឺទាំងអស់ មិនបានភ្លេចនោះឡើយចំពោះការដឹកនាំប្រតិបត្តិការដូចផ្លេកបន្ទោលរបស់ លោកឧត្តមសេនីយ៍ឯក ហ៊ុន ម៉ាណែត ជាមួយក្រុមការងារចម្រុះ ដោយប្រើពេលវេលាប្រមាណ ៣៣ម៉ោងប៉ុណ្ណោះ ហើយនៅទីបំផុតបានប្រែក្លាយសណ្ឋាគារមួយនេះទៅជាកន្លៃងធ្វើចត្តាឡីស័ក សម្រាប់ព្យាបាលដ៏ទំនើបមួយ៕ រក្សាសិទ្ធិដោយ៖ លឹម ហុង
