ស្វាយរៀង ៖ នៅរសៀលថ្ងៃទី១១ ខែមីនា ឆ្នាំ២០២១ លោក ហែម ពិសិដ្ឋ អភិបាលរងខេត្តស្វាយរៀង បានអញ្ជើញចុះពិនិត្យមើលទីតាំងសម្រាប់ធ្វើចត្តាឡីស័កនិង បាននាំយកអំណោយសម្ភារៈ គ្រឿងឧបភោគបរិភោគ និងសប្បុរសជនត្រូវបានប្រគល់ជូនដល់ទីស្នាក់ការគណបក្សប្រជាជនកម្ពុជាឃុំអង្គប្រស្រែ ស្រុករមាសហែក ខេត្តស្វាយរៀងដើម្បីត្រៀមបម្រុងទុកទីតាំងសម្រាប់ធ្វើចត្តាឡីស័ក នៅក្នុងឃុំអង្គប្រស្រែ ស្រុករមាសហែក។
មានប្រសាសន៍សំណេះសំណាលសួរសុខទុក្ខជាមួយបងប្អូនកងកម្លាំងមន្ត្រីជំនាញក្រោមឱវាទ លោក ហែមពិសិដ្ឋ បានកោតសរសើរ និងថ្លែងអំណរគុណដល់ទឹកចិត្ត ឆន្ទៈ បងប្អូនកងកម្លាំងគ្រប់លំដាប់ថ្នាក់ ក្នុងការចូលរួមទប់ស្កាត់ ការពារតាមបទបញ្ជារបស់រាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា តាមតួនាទី ភារកិច្ច ទាំងយប់ ទាំងថ្ងៃយ៉ាងខ្ជាប់ខ្ជួន។
បន្ថែមពីលើនេះ លោកក៏បានពាំនាំនូវការផ្ដាំផ្ញើសួរសុខទុក្ខពីសំណាក់លោកជំទាវកិត្តិសង្គហបណ្ឌិត ម៉ែន សំអន ប្រធានក្រុមការងារចុះមូលដ្ឋានខេត្តស្វាយរៀង ឯកឧត្ដម នាយឧត្ដមសេនីយ៍ សៅ សុខា ប្រធានក្រុមការងារចុះមូលដ្ឋានស្រុករមាសហែក ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង មកជូនដល់បងប្អូនកងកម្លាំង និងមន្ត្រីក្រោមឱវាទផងដែរ ។
ជាពិសេសចូលរួមអនុវត្តតាមការណែនាំរបស់រាជរដ្ឋាភិបាល ក្រសួងសុខាភិបាលក្នុងការប្រយុទ្ធប្រឆាំងនឹងជំងឺកូវីដ១៩ ដែលកំពុងរីករាលដាលជាសាកលលោក រក្សាគម្លាតសុវត្ថិភាព លាងសម្អាតដៃជាប្រចាំ ដើម្បីជៀសផុតពីការឆ្លងនៃជំងឺមួយនេះ៕រក្សាសិទ្ធិដោយ៖ វ៉ៃកូ
