ភ្នំពេញ ៖ ដូចដែលមហាជនបានដឹងហើយថា លោក ណុប បាយ៉ារិទ្ធ ដែលស្ថិតក្នុងចំណោមអ្នកសិល្បករដទៃទៀត នៅក្នុងផលិតកម្មរស្មីហង្សមាស សុទ្ធតែឆ្លងកូវីដ-១៩ ដូចជាតារាចម្រៀងស្រី សុគន្ធ នីសា, អ្នកដឹកនាំការថត លោក ទីតូ និងពិធីការិនីដ៏ល្បី កែវ ចាន់នីមល ត្រូវបានចេញលទ្ធផលវិជ្ជមានកូវីដ-១៩ និងត្រូវបានបញ្ជូនទៅសម្រាកព្យាបាលធ្វើចត្ថាឡីស័ក នៅសណ្ឋាគារ (The Great Duke Phnom Penh) កាលពីរសៀលថ្ងៃទី០៩ ខែមីនា ឆ្នាំ២០២១។
យ៉ាងណាមិញ ក្រោយពីបានទទួលដំណឹងច្បាស់ថាតារាចម្រៀងលោក ណុប បាយ៉ារិទ្ធ ឆ្លងកូវីដ នៅក្នុងថ្ងៃនោះផងដែរ បុរសម្នាក់ដែលធ្លាប់បានប្រាស្រ័យទាក់ទងជាមួយ ស្រាប់តែលេចចេញអាការក្តៅខ្លួនខុសធម្មតាតែម្តង។ នេះបើយោងតាមគណនីហ្វេសប៊ុកឈ្មោះ Eco Vak Song បានបង្ហោះប្រាប់ឲ្យដឹងថា៖ «ខ្ញុំបាទមកតេស្តរកមេរោគកូវីដ១៩ ព្រោះខ្ញុំបានទាក់ទងដោយប្រយោលជាមួយបង ណុប បាយ៉ារិទ្ធ កាលពីថ្ងៃ៣ ឥឡូវនេះខ្ញុំមានអាការៈក្អក ក្តៅខ្លួន ឈឺ ក ផ្តាសាយ ឈឺក្បាល អរគុណបងប្អូនទាំងអស់ដែលបានបារម្ភ និងសុំទោសផងដែលអត់បានលើកឬឆ្លើយតបទៅវិញ ការពារទាំងអស់គ្នា»។
ដោយឡែក នៅថ្ងៃទី១០ ខែមីនា ឆ្នាំ២០២១ ម្សិលមិញនេះ បុរសខាងលើក៏បានប្រាប់បន្តឲ្យដឹងថា៖ «ជម្រាបសួរ ពុកម៉ែបងប្អូន មិត្តភក្តិទាំងអស់ជាទីនឹករលឹក មកទល់ពេលនេះខ្ញុំបាទនៅរង់ចាំលទ្ធផលរបស់ក្រសួងសុខាភិបាលនៅឡើយ ។ រូបខ្ញុំបាទផ្ទាល់កំពុងធ្វើចត្តាឡីស័កក្នុងមណ្ឌលសុខភាពផងដែរ សូមអធ្យាស្រ័យចំពោះការមិនបានឆ្លើយតបសាររបស់បងប្អូនមិត្តភក្កិទាំងឡាយព្រោះចំនួន ឆាត(Chat ) មានច្រើន អរគុណដែរបារម្ភពីសុខទុក្ខរបស់ខ្ញុំបាទ ជូនពរប្រជាពលរដ្ឋទាំងអស់ជៀសផុតពីជំងឺឆ្លងដ៏កាចសាហាវមួយនេះ »៕ រក្សាសិទ្ធិដោយ៖ លឹម ហុង
