ភ្នំពេញ : អគ្គស្នងការនគរបាលជាតិ នាយឧត្តមសេនីយ៍សន្តិបណ្ឌិត នេតសាវឿន នៅថ្ងៃទី១១ ខែមីនា ឆ្នាំ២០២១ នេះ បានចេញសេចក្តីណែនាំស្តីពីការពង្រឹងវិធានការប្រយុទ្ធប្រឆាំងជំងឺឆ្លងកូវីដ-១៩ ពាក់ព័ន្ធព្រឹត្តិការណ៍សហគមន៍ ២០ កុម្ភៈ ២០២១។
អគ្គស្នងការនគរបាលជាតិ បានថ្លែងថា អនុវត្តតាមការអំពាវនាវ និងអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សេចក្តីណែនាំលេខ ០០២សណន របស់ក្រសួងមហាផ្ទៃ ចុះថ្ងៃទី០៩ ខែមីនា ឆ្នាំ២០២១ និងសេចក្តីណែនាំរបស់ក្រសួងសុខាភិបាល ដើម្បីចូលរួមបង្ការ និងទប់ស្កាត់ការរាតត្បាត នៃជំងឺកូវីដ-១៩ ដល់ថ្នាក់ដឹកនាំមន្ត្រីនគរបាលជាតិ ក្នុងព្រឹត្តិការណ៍សហគមន៍ ២០ កុម្ភៈ អគ្គស្នងការដ្ឋាននគរបាលជាតិ សូមដាក់ចេញនូវវិធានការចាំបាច់មួយចំនួនដូចខាងក្រោម៖
១-អនុញ្ញាតឱ្យគ្រប់អង្គភាពចំណុះអគ្គស្នងការដ្ឋាននគរបាលជាតិ រៀបចំឱ្យមានការផ្លាស់វេនមន្ត្រីប្រចាំការ ក្នុងអង្គភាពនីមួយៗ ដោយត្រូវធានារក្សានិរន្តរភាពការងារប្រចាំថ្ងៃ។ ដោយឡែក មន្ត្រីដែលមិនត្រូវវេនប្រចាំការ ត្រូវយកចិត្តទុកដាក់បំពេញភារកិច្ច នៅផ្ទះរៀងៗខ្លួនតាមប្រព័ន្ធ អនឡាញ ជានិច្ចកាលត្រៀមទទួលការទាក់ទង និងអនុវត្តតាមការណែនាំ។
២-ត្រូវអនុវត្តឱ្យបានខ្ជាប់ខ្ជួន នូវវិធានការការពារជំងឺកូវីដ-១៩ “៣ការពារ និង៣កុំ” (ពាក់ម៉ាស់ លាងដៃ ឬបាញ់អាល់កុល រក្សាគម្លាតសុវត្ថិភាពសង្គម និងសុវត្ថិភាពបុគ្គលឱ្យបានគ្រប់គ្នា គ្រប់ទីកន្លែង និងកុំនៅកន្លែងសាធារណៈបិទជិតគ្មានខ្យល់ចេញចូល កុំជួបជុំមនុស្សច្រើន កុំ ប៉ះពាល់គ្នា កុំចាប់ដៃគ្នា កុំកៀកស្មាគ្នា និងកុំឱបថើបគ្នា) ធ្វើការវាស់កំដៅនៅច្រកចេញ-ចូល និងស្កេន QR Code ដើម្បីពិនិត្យ និងទប់ស្កាត់កូរីដ-១៩ ឱ្យបានជាប្រចាំ។
៣-ត្រូវផ្អាកជាបណ្តោះអាសន្ន នូវការរៀបចំកិច្ចប្រជុំ ការប្រារព្ធពិធី ការជួបសំណេះសំណាលនានា លើកលែងតែមានករណីចាំបាច់ ឬ មានបទបញ្ជា។
៤-ត្រូវតាមដាន ត្រួតពិនិត្យសុខភាពរបស់ខ្លួនជាប្រចាំ។ សម្រាប់កងកម្លាំងដែលមានអាការៈ ក្តៅខ្លួន ក្អក ផ្តាសាយ ឬមានការសង្ស័យណាមួយពាក់ព័ន្ធនឹងជំងឺកូវីដ-១៩ ពុំចាំបាច់មកបំពេញការងារ នោះទេ និងត្រូវរាយការណ៍ទៅអង្គភាពរបស់ខ្លួន ហើយត្រូវប្រញ៉ាប់ទៅមណ្ឌលសុខភាព ឬមន្ទីរ ពេទ្យដែលនៅជិតបំផុត ឬទាក់ទងទៅភ្នាក់ងារសុខាភិបាលតាមរយៈទូរស័ព្ទលេខ ១១៥។
៥-ផ្អាកការអនុញ្ញាតចេញ-ចូលបរិវេណអគ្គស្នងការដ្ឋាននគរបាលជាតិ ជាបណ្តោះអាសន្ន ចំពោះ ប្រជាពលរដ្ឋ ឬបុគ្គលដែលពុំមានភារកិច្ច ចាប់ពីពេលនេះ រហូតដល់មានការណែនាំជាថ្មី។ ដោយឡែកសម្រាប់ភ្ញៀវដែលមកទំនាក់ទំនងការងារជាផ្លូវការ ឬ ការងារប្រចាំថ្ងៃ មន្ត្រីតម្រួត បទបញ្ជាប្រចាំការនៅអគ្គស្នងការដ្ឋាននគរបាលជាតិ ត្រូវណែនាំភ្ញៀវឱ្យឆ្លងកាត់ទ្វារសម្លាប់មេរោគ (បាញ់អាល់កុល) និងវាស់កំដៅ ពីសំណាក់គ្រូពេទ្យប្រចាំការ ដោយរក្សាគម្លាតសុវត្ថិភាព មុនអនុញ្ញាតឱ្យចូលជួប នាយកដ្ឋានរដ្ឋបាលទូទៅ ដើម្បីបញ្ជាក់ព័ត៌មាន និងគ្រប់គ្រងអត្តសញ្ញាណបុគ្គល។
ទទួលបានសេចក្តីណែនាំនេះ ថ្នាក់ដឹកនាំមន្ត្រីនគរបាលជាតិ នាយកដ្ឋាន-អង្គភាពពាក់ព័ន្ធ ត្រូវយកចិត្តទុកដាក់ចាត់តាំងអនុវត្តឲ្យបានម៉ឺងម៉ាត់ ប្រកបដោយប្រសិទ្ធភាព និងមានស្មារតី ទទួលខុសត្រូវខ្ពស់៕ រក្សាសិទ្ធិដោយ : ចេស្តារ
