ស្ត្រីម្នាក់នៅ Desa Lebung Itam ប្រទេសឥណ្ឌូនេស៊ី ដែលស៊ូទ្រាំនឹងការស្តីបន្ទោសម្តាយក្មេក អស់រយៈពេលជាយូរមកហើយ ចុងក្រោយ បានដាក់ថ្នាំពុលឲ្យម្តាយក្មេកស្លាប់តែម្តង។
យោងតាមសារព័ត៌មាន Tribun News បានឲ្យដឹងថា បន្ទាប់ពីត្រូវបានម្តាយក្មេករបស់ខ្លួនស្តីបន្ទោសម្តងហើយម្តងទៀត ស្ត្រីរូបនេះក៏បានបាត់អស់ការស៊ូទ្រាំ និងទីបំផុត បានលាយថ្នាំពុលកំបោរ ចូលទៅក្នុងត្រីដែលចម្អិនជាពិសេស សម្រាប់ម្តាយក្មេកអាយុ ៦១ ឆ្នាំ ដែលមានជំងឺបេះដូង។ មិនត្រឹមតែម្តាយក្មេកបានស្លាប់ទេ ប៉ុន្តែ កូនឆ្មាចំនួន ៣ ក្បាល ទៀត ក៏ត្រូវបានរកឃើញងាប់ផងដែរ។
កូនប្រសារស្រីអាយុ ៤៥ ឆ្នាំ រូបនេះ ក្រោយមក ត្រូវបានចាប់ខ្លួន និងប្រសាបានសារភាពពីទង្វើរដ៏អាក្រក់របស់នាង ទៅលើម្តាយក្មេក។
លោក Ogan Komering Ilir អធិការនគរបាលស្រុក AKBP Alamsyah Pelupessy បាននិយាយថា “បន្ទាប់ពីត្រូវបានសាកសួរ ស្រី្តរូបនេះដែលមានឈ្មោះ Dewi Asmara បានសារភាពថា រូបនាងពិតជាបានដាក់ថ្នាំពុលទៅក្នុងចានបាយរបស់ម្តាយក្មេកមែន។
បច្ចុប្បន្ន កូនប្រសាស្រីរូបនេះ កំពុងប្រឈមនឹងការជាប់ពន្ធនាគាររយៈពេល ២០ ឆ្នាំ ឬទោសប្រហារជីវិត។
លោកអធិការបានបន្ថែមទៀតថា “ពិរុទ្ធជនបានប្រព្រឹត្តក្នុងមាត្រា ៣៤០ នៃក្រមព្រហ្មទណ្ឌពីបទមនុស្សឃាតដោយចេតនាដែលមានទោសប្រហារជីវិតអតិបរមា៕ រក្សាសិទ្ធិដោយ៖ លឹម ហុង
