ខេត្តកណ្តាល ៖ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានឱ្យដឹងខ ណៈចុះត្រួតពិនិត្យនិងរិតបន្តឹងសន្តិសុខនៅតាមព្រំដែន និងទីប្រជុំជនជ្រៃធំ កាលពីរសៀលថ្ងៃទី១១ មីនា ២០២១នេះ ។
លោកស្នងការលើកឡើងថា ក្រៅអំពីគោលដៅត្រួតពិនិត្យនៅតាមបណ្តោយព្រំដែនក៏បានធ្វើការរឹតបន្តឹង នៅតាមសណ្ឋាគារនិងកាស៊ីណូហើយមិនអនុញ្ញាតឱ្យជនបរទេសចេញចូលតំបន់ប្រជុំជនជ្រៃធំនៅដែរ។
កាលពីពេលកន្លងមកនេះ លោក គង់ សោភ័ណ្ឌ អភិបាលខេត្ត កណ្តាល ចុះពង្រឹងសន្តិសុខ ទប់ស្កាត់ការលួចឆ្លងដែនដោយខុសច្បាប់ និងធ្វើការបិទផ្អាកបណ្តោះអាសន្ននូវសណ្ឋាគារ កាស៊ីណូ និងមិនឱ្យជនបរទេសឆ្លងចេញចូលទីប្រជុំជនជ្រៃធំ ។
រដ្ឋបាលខេត្តកណ្តាលបានប្រើប្រាស់កម្លាំងប្រដាប់អាវុធជាង៦០០នាក់ និងប៉ុស្តិត្រួតពិនិត្យនៅតាមខ្សែបន្ទាត់ព្រំដែនចំនួន៤៧គោលដៅ បូករួមគោលដៅនៅតាមផ្លូវលេខ១១០ត្រើយខាងកើតទន្លេបាសាក់ និងគោលដៅនៅផ្លូវជាតិលេខ២១ ត្រើយខាងលិចទន្លេបាសាក់ ព្រមទាំង ដាក់កម្លាំងចំនួន៦ទីតាំងបន្ថែមទៀត នៅតាមសណ្ឋាគារ និងកាស៊ីណូ ទាំង៦នៅតំបន់ជ្រៃធំ។
លោកស្នងការ បានបន្តថា ក្រៅពីនោះ យើងក៏បានប្រើកម្លាំងចល័តដើម្បីទប់ស្កាត់ការរត់គេចរបស់ក្រុមជនបរទេស ដែលកំពុងស្នាក់ នៅតាមមណ្ឌលចត្តាឡីស័កនានាផងដែរ ពិសេស មិនឱ្យមានការ ឆ្លងកាត់ ចេញ ចូលតំបន់ ទីប្រជុំជនជ្រៃធំជាដាច់ខាត់ ដើម្បីទប់ស្កាតការឆ្លងរីករាល ដែលជំងឺកូវីដ ១៩ ព្រោះមកដល់ពេលនេះ ទូទាំងស្រុកកោះធំ មានអ្នកផ្ទុកកូវីដ១៩ ចំនួន២៤នាក់ហើយ។
លោកឧត្តមសេនីយ៍ស្នងការ ក៏បានស្នើសុំទៅដល់ប្រជាពលរដ្ឋទាំងអស់ឱ្យមានការភ្ញាក់រលឹក ស្ម័គ្រចិត្តចេញមកធ្វើចត្តាឡីស័ក ដើម្បីក្រុមការងារយកសំណាកទៅធ្វើតេស្តហើយ ប្រសិនបើមានផ្ទុកកូវីដ១៩នោះ គឺអាច ព្យាបាលទាន់ពេលវេលា៕ រក្សាសិទ្ធិដោយ៖CEN
