ភ្នំពេញ ៖ ដូចដែលយើងគ្រប់គ្នាបានដឹងហើយថា ចាប់តាំងពីកូវីដ-១៩ បានមានវត្តមាននៅក្នុងប្រទេសកម្ពុជាយើងមក នោះយើងបានឃើញយ៉ាងច្បាស់ថា មន្ត្រីពាក់ព័ន្ធទាំងអស់ពិតជាមានការនឿយហត់ជាខ្លាំង ក្នុងប្រតិបត្តិការប្រយុទ្ធប្រឆាំងទៅនឹងជំងឺនេះ ក្នុងនោះជាពិសេសគឺក្រុមគ្រូពេទ្យជួរមុខតែម្តង។
ជាក់ស្តែង ចាប់តាំងពីផ្ទុះកូវីដ-១៩ ឆ្លងចូលសហគមន៍ជាលើកទី៣ ឬ «ព្រឹត្តិការណ៍សហគមន៍ ២០ កុម្ភៈ» មក ឃើញថា គ្រូពេទ្យម្នាក់ៗ ពិតជាបាននិងកំពុងពុះពារបេសកកម្មប្រយុទ្ធប្រឆាំងនឹងកូវីដ-១៩ នេះយ៉ាងខ្លាំង មិនទាំងថ្ងៃមិនថាយប់ទេ គឺសឹងតែរកពេលហូបបាយទឹកគ្មានផង ដែលបុព្វហេតុនេះក៏ព្រោះតែជាតួនាទី និងដើម្បីសុខសុវត្ថិភាពបងប្អូនប្រជាជនកម្ពុជាទូទាំងប្រទេស ឲ្យរួចផុតពីជំងឺរាតត្បាតដ៏កាហាចសាហាវមួយនេះ។
លើសពីនេះទៀត តើអ្នកមានដឹងទេថា គ្រូពេទ្យបានលះបង់អ្វីខ្លះទៅ ក្នុងការប្រយុទ្ធឆាំងជាមួយនឹងកូវីដ-១៩ ដែលកំពុងផ្ទុះរីករាលកើនឡើងពីមួយថ្ងៃទៅមួយថ្ងៃនាពេលបច្ចុប្បន្ននេះ។ ពិតណាស់ ពួកគាត់ពុំត្រឹមតែនឿយហត់ ធុញថប់នឹងការឃ្លុំសម្លៀកបំពាក់ការពារប៉ុណ្ណោះទេ តែថែមទាំងប្រឈមនឹងអាយុជីវិតខ្លួនឯងទៀតផង ព្រោះថាខណៈដែលយើងគ្រប់គ្នាមានការខ្លាចរអា សឹងតែមិនហ៊ានចេញពីផ្ទះ ចុះទម្រាំពួកគាត់ដែលប្រឈមផ្ទាល់ តើយ៉ាងណា?។
តែបើទោះជាមានការលំបាកខ្លាំងយ៉ាងណាក្តី ចំពោះទឹកចិត្តរបស់ក្រុមគ្រូពេទ្យនៅពេលនេះ គឺនៅតែតស៊ូមិនរេថយឡើយ។ ក្នុងនោះ អ្នកគ្រូពេទ្យជួរមុខម្នាក់ដែលមានគណនីហ្វេសប៊ុកឈ្មោះ Chanmony Pich បានបង្ហោះសារបង្ហាញពីទំហំទឹកចិត្តរបស់អ្នកគ្រូ និងក្រុមការងារទាំងអស់ យ៉ាងដូច្នេះថា៖ «សួរថាអ្នកហត់ទេ? ចម្លើយ: គឺខ្ញុំហត់ណាស់ សួរថាអ្នកខ្លាចទេ? ចម្លើយ: គឺខ្ញុំខ្លាច តែខ្ញុំនៅតែធ្វើការនេះទោះបីជាហត់យ៉ាងណាក៏ដោយ គឺដើម្បីបងប្អូនទាំងអស់គ្នា ដើម្បីប្រទេសជាតិយើង តែក៏ខ្ញុំសុំឲ្យបងប្អូនជួយការពារខ្លួនឯងនិងគ្រួសារដោយស្តាប់តាមការណែនាំរបស់ក្រសួងសុខាភិបាល។ បងសូមផ្ញើកម្លាំងចិត្តដល់ក្រុមការងារទាំងអស់ បងជឿជាក់ថាយើងអាចឆ្លងកាត់ដំណាក់កាលនេះជាមួយគ្នា»៕ រក្សាសិទ្ធិដោយ៖ លឹម ហុង
