ដូចដែលបានដឹងហើយ កន្លងទៅថ្មីៗនេះ ឃើញថាមានអ្នកជាប់ពាក់ព័ន្ធនឹងសិល្បៈជាច្រើននាក់ បានឆ្លងកូវីដ-១៩ ដែលក្នុងនោះមានដូចជា តារាចម្រៀងលោក ណុប បាយ៉ារិទ្ធ អ្នកនាង សុគន្ធ នីសា និងពិធីករដ៏ល្បីប្រចាំស្ថានីយ៍ទូរទស្សន៍ហង្សមាស អ្នកនាង ចាន់ កែវនីមល និងនៅមានអ្នកសិល្បៈមួយចំនួនទៀតផងដែរ។
ប៉ុន្តែ អ្វីដែលយើងគ្រប់គ្នាមានការភ្ញាក់ផ្អើល និងហួសចិត្តជាខ្លាំងនោះ គឺក្រោយកើតមានករណីផ្ទុះកូវីដ-១៩ ឆ្លងចូលក្នុងចំណោមតារាៗជាបន្តបន្ទាប់ ក៏ស្រាប់តែមានមនុស្សមួយចំនួនតូច នាំគ្នារើសអើងរាលដាលដល់អ្នកផ្សេងតែម្តង។
ជាក់ស្តែង ថ្មីៗនេះ តារាចម្រៀងលោក ករុណា ពេជ្រ បានបញ្ចេញអារម្មណ៍រៀបរាប់ទាំងហួសចិត្តថា៖ «យើងសុទ្ធតែជាខ្មែរដូចគ្នា… ហើយទោះបីខ្ញុំបាទ ករុណា ពេជ្រ នាពេលនេះមិនទាន់មានជាប់ពាក់ពន្ធ័លើករណីកូវីដមួយណាក៏ដោយ ក៏សូមមេត្តាបងប្អូនមួយចំនួនតូច គួរកុំអាលរើសអើងជាមួយតារាលឿនពេក… គួរតែផ្តល់កម្លាំងចិត្តអាណិតស្រលាញ់ … ព្រោះយើងខ្ញុំជាតារាក៏ជាជនរងគ្រោះដូចគ្នាដែរ….»។
លោកបន្តថា « សូមមេត្តាបងប្អូនមួយចំនួនតូចគួរកែប្រែសម្តី ទឹកមុខ អត្តចរិត កាយវិការរើសអើង មិនពេញចិត្ត ដូចជាអោយតែឃើញតារាហាក់បីដូចឃើញកូវីដមកចម្លងនោះ មកជាការការពារអោយបានត្រឹមត្រូវ ដើម្បីទប់ស្កាត់កូវីដ រៀងៗខ្លួនប្រសើរជាង…. ក្នុងនាមយើងជាតិសាសន៏តែមួយ រៀនផ្តល់កិត្តិយស និងអោយតម្លៃគ្នាទៅវិញទៅមកក្នុងកាលៈទេសៈនេះ ដែលយើងកំពុងរស់លើទឹកដីកម្ពុជា តែមួយដូចគ្នា…»៕ រក្សាសិទ្ធិដោយ៖ លឹម ហុង
