បាត់ដំបង ៖ ករណីផ្ទុះធុងហ្គាសឆេះផ្ទះបាយបណ្តាលឲ្យបុរសម្នាក់ស្លាប់ និងស្ត្រីម្នាក់រងរបួសស្រាល នៅថ្ងៃទី១២ ខែមីនា ឆ្នាំ២០២១ វេលាម៉ោង១៧និង៣០នាទី នៅចំណុចក្រុមទី០៩ ភូមិឈើទាល ឃុំសិរីមានជ័យ ស្រុកសំពៅលូន មាន។
លោកវរសេនីយ៍ឯក ពេជ្រ សារ៉ែន អធិការនគរបាលស្រុកសំពៅលូន បានឲ្យដឹងថា គ្រោះថ្នាក់ដែលបង្កឡើងដោយការផ្ទុះហ្គាសនេះស្ថិតនៅផ្ទះរបស់ម្ចាស់ឈ្មោះ ឃឹម សាម៉ុន ភេទប្រុស អាយុ៥៨ឆ្នាំ មានទីលំនៅកន្លែងកើតហេតុខាងលើ ។ ជនរងគ្រោះទី១.ឈ្មោះ ឈឹម សើ ភេទស្រី អាយុ៥៤ឆ្នាំ មានទីលំនៅកន្លែងកើតហេតុខាងលើ ត្រូវជាប្រពន្ធរបស់ម្ចាស់ផ្ទះ (រងរបួសត្រូវចិញ្ចើម) និងជនរងគ្រោះទី២.ឈ្មោះ ម៉េង ហឹង ភេទប្រុស អាយុ២៣ឆ្នាំ (ស្លាប់នៅនឹងកន្លែងកើតហេតុ) និងប្រពន្ធឈ្មោះ រ៉ាត់ សុភ័ក្រ អាយុ២៤ឆ្នាំ អ្នកទាំងពីរជាអ្នកស៊ីឈ្នួលនឹងស្នាក់នៅជាមួយម្ចាស់ផ្ទះ ។
ការខូចខាតរួមមាន ៖ ផ្ទះបាយទំហំ ៧ម៉ែត្រ គុណ១០ម៉ែត្រ (ខូចខាតទាំងស្រុងដោយការឆាបឆេះ) រួមទាំងសម្ភារប្រើប្រាស់នៅក្នុងផ្ទះបាយមួយចំនួនទៀត។ សមត្ថកិច្ចបានបញ្ជាក់អោយដឹងថា មូលហេតុនៃការផ្ទុះធុងហ្គាសនេះ គឺបណ្តាលមកពីផ្ទុះសេឌុយចង្ក្រានអគ្គិសនីចំហុយសាច់ រួចជះចំហាយដល់ធុងហ្គាសទើបបណ្តាលឲ្យផ្ទុះតែម្តង ។
ករណីនេះ អគ្គិភ័យមានការឆាបឆេះបន្តិចបន្តួច សមត្ថកិច្ចបានយករថយន្តពន្លត់អគ្គិភ័យទៅអន្តរាគមន៍ជួយពន្លត់ ។ ក្រោយពេលសមត្ថកិច្ចទៅដល់ ប្រជាពលរដ្ឋនិងម្ចាស់ផ្ទះបានធ្វើការពន្លត់ភ្លើងរលត់បាត់ទៅហើយ ។ ចំណែកឯសាកសពជនរងគ្រោះ ត្រូវបានក្រុមគ្រួសារនិងម្ចាស់ផ្ទះធ្វើបុណ្យតាមប្រពៃណី ៕ រក្សាសិទ្ធិដោយ៖បញ្ញាស័ក្តិ
