រតនគិរី៖ បុរសម្នាក់ ត្រូវបានសមត្ថកិច្ចចាប់វាយខ្នោះ បន្ទាប់ពីរំលោភសេពសន្ថវៈលើកុមារី ជាកូនចុងរហូតដល់ទៅពីរនាក់ នៅ ចំណុច ភូមិអុលធំ ឃុំកាឡែង ស្រុកលំផាត់ ខេត្តរតនគិរី កាលពីថ្ងៃ ទី ១២ ខែមីនា ឆ្នាំ២០២១។
យោងតាមការឱ្យដឹងពីលោកវរសេនីយ៍ត្រី សួន សាវុធ នាយប៉ុស្តិ៍រដ្ឋបាលសង្កាត់កាចាញ នៅថ្ងៃទី១៣ ខែមីនា ឆ្នាំ២០២១ បានឱ្យដឹងថា ជន សង្ស័យ ម្នាក់ ឈ្មោះ សាន សុឃីម ប្រុស អាយុ ៣៨ឆ្នាំ ជនជាតិខ្មែរ មានទីលំនៅភូមិ២(វីឡាកាត់) សង្កាត់កាចាញ ក្រុងបានលុង ខេត្តរតនគិរី ជាកម្មករ ពាក់ព័ន្ធករណីរំលោភសេពសន្ទវៈ លើកុមារី ២នាក់ ត្រូវជាកូនចុង។ ចំណែកក្មេងស្រីរងគ្រោះ ២នាក់បងប្អូនមាន អាយុ ៩ឆ្នាំ និង អាយុ ៨ឆ្នាំ។
មុននឹងឈានដល់ការចាប់ខ្លួនជនសង្ស័យ គឺ ប្រពន្ធ និងជនសង្ស័យ បានទៅស៊ីឈ្នួលដកដំឡូងឱ្យគេ នៅចំណុចឃាត់ខ្លួនខាងលើ ហើយនៅពេលនោះក៏បានឱ្យម្ដាយមីងនាំកុមារីទាំង ២នាក់ ទៅផ្ទះមុន គ្រាដែលដើរទៅផ្ទះស្រាប់តែឃើញកុមារទាំងពីរដើរមានសភាពលំបាក ម្ដាយមីងក៏សួរទៅក្មេងទាំងពីរ តែមិនប្រាប់ទេ លុះម្ដាយមីងជំរិតសួរខ្លាំង ទើបក្មេងទាំងពីរប្រាប់ថា ឪពុករំលោភ។ ក្រោយពីដឹងថាឪពុករំលោភ ម្ដាយមីងក៏ទូរស័ព្ទរាយការណ៍ទៅលោកនាយប៉ុស្ដិ៍កាចាញ។ ពេលនោះលោកនាយប៉ុស្ដិ៍ ក៏ឱ្យនាំក្មេងទៅប៉ុស្ដិ៍ និងនាំក្មេងឱ្យពេទ្យពិនិត្យឃើញថា កុមារីទាំងពីរនាក់ ពិតជាត្រូវគេរំលោភពិតប្រាកដមែន ហើយក៏រាយការណ៍ទៅលោកអធិការក្រុង ស្អែកឡើងរៀបចំកម្លាំងចុះទៅចាប់ខ្លួនជនសង្ស័យតែម្ដង។
លោកនាយប៉ុស្ដិ៍បានបញ្ជាក់ថា កុមារីពីរនាក់បងប្អូន ត្រូវឪពុកចុងរំលោភ ១០ដងមកហើយ គឺ រំលោភនៅផ្ទះ និងកន្លែងស៊ីឈ្នួលដកដំឡូង ឆ្លៀតពេលដែលម្ដាយកុមារីទាំងពីរនាក់មិននៅ។ តាមការរៀបរាប់ដោយម្ដាយក្មេងស្រីរងគ្រោះទាំងពីរប្រាប់ថា តាមការសង្កេត នៅពេលឪពុកទៅណាតែងតែនាំក្មេងស្រីទាំងពីរតាមរហូត តែមិនបានដឹងអំពីរឿងនោះឡើយ។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅអធិការក្រុងបានលុង ដើម្បីសហការជាមួយការិយាល័យប្រឆាំងការជួញដូរមនុស្ស និងការពារអនីតិជន កសាងសំណុំរឿងបញ្ជូនទៅសាលាដំបូងខេត្ត៕ រក្សាសិទ្ធិដោយ៖បញ្ញាស័ក្តិ
