ភ្នំពេញ ៖ ក្រុមរាំរបស់ តារាចម្រៀង សុគន្ធ នីសាម្នាក់បានផ្ទុះវិជ្ជមានកូវីដ១៩ ហើយត្រូវបានក្រុមគ្រូពេទ្យ ចុះទៅនាំខ្លួនវេលាម៉ោង៧និង៣០នាទីយប់ថ្ងៃទី១៣ ខែមីនាឆ្នាំ២០២១ នៅក្នុងមូលដ្ឋានខណ្ឌឫស្សីកែវ។
អ្នកវិជ្ជមានកូវីរូបនោះ ជាបុរស អាយុ២២ឆ្នាំ និងជាក្រុមរាំរបស់ តារាចម្រៀង សុគន្ធ នីសា មានទីតាំងនៅផ្ទះលេខ៤៤ ផ្លូវបេតុង តាមប្រឡាយលូទឹកស្អុយ ក្រុមទី៤ ភូមិបាក់ទូក សង្កាត់ទួលសង្កែទី១ ខណ្ឌប្ញស្សីកែវ រាជធានីភ្នំពេញ (ជិតផ្សារសាំហាន់)។ អ្វីដែលធ្វើឲ្យមានការចាប់អារម្មណ៍នោះ ខណៈពេលដែលក្រុមគ្រូពេទ្យ ចុះទៅយកនៅយប់នោះគេឃើញបុរសរូបនោះ បានរត់គេចខ្លួនតែក្រោយមក ត្រូវបានក្រុមគ្រួពេទ្យ ឃាត់បាន និងឲ្យត្រឡប់ទៅយកខោអាវវិញ ។
នៅយប់នោះផ្ទះរបស់តារារាំរូបនោះ ត្រូវបានហ៊ុមព័ទ្ធនិងឃាត់ទុកក្រុមគ្រួសារដើម្បី ធ្វើចត្តាឡីស័កនៅនឹងកន្លែង។
តាមព័ត៌មានឲ្យដឹងថា នៅវេលាម៉ោង ប្រមាណ៩និង៣០នាទី ព្រឹកថ្ងៃទី១៤ ខែ មីនា ឆ្នាំ ២០២១ ក្រុមគ្រូពេទ្យ នៃមន្ទីរពេទ្យសម្តេចឪសម្តេចម៉ែ ក៏បានចុះទៅយកសំណាក់ពីក្រុមគ្រួសារតារារាំរូបនោះ ដែលមានសមាជិកចំនួន ៤នាក់ ដែលក្នុងនោះ ជាឪពុក ម្តាយនិងប្អូនប្រុស ប្អូនស្រី បង្កើត២នាក់។
បច្ចុប្បន្នអ្នកជំងឺម្នាក់ដែលជាតារារាំរបស់ តារាចម្រៀង សុគន្ធ នីសា ត្រូវបានបញ្ជូនទៅព្យាបាល នៅមន្ទីរពេទ្យរបេង។ រីឯអ្នកដែលពាក់ព័ន្ធ ត្រូវបានឲ្យធ្វើចត្តាឡីស័កនៅក្នុងទីតាំងនេះរយៈពេល ១៤ថ្ងៃ ៕ រក្សាសិទ្ធិដោយ៖ សារឿន
