បច្ចុប្បន្ននេះ ជំងឺកូវីដ-19 បាននិងកំពុងវាយលុកនៅក្នុងប្រទេសកម្ពុជារបស់យើងយ៉ាងខ្លាំង ដោយពុំមានការថមថយនោះទេ។ ហេតុនេះ រាជរដ្ឋាភិបាល និងក៏ដូចមន្ត្រីពាក់ព័ន្ធទាំងអស់ ជាពិសេស គឺក្រុមគ្រូពេទ្យជួរមុខ បានកំពុងធ្វើការងារនេះយ៉ាងសស្រាក់សស្រាំ ប្រយុទ្ធប្រឆាំងនឹងជំងឺដ៏កាចសាហាវមួយនេះ ព្រោះតែដើម្បីសុខសុវត្ថិភាពបងប្អូនប្រជាជនខ្មែរនៅទូទាំងប្រទេស។
ជាការពិតណាស់ ដោយសារតែកាតព្វកិច្ចការងារមួយនេះ ឃើញថាទាំងមន្ត្រី និងក្រុមគ្រូពេទ្យ គឺត្រូវឃ្លាតឆ្ងាយពីក្រុមគ្រួសារ ទាំងក្តីនឹករលឹកជាខ្លាំង និងបានត្រឹមឃើញមុខគ្នាតាមរយៈវីដេអូខលប៉ុណ្ណោះ។
ជាក់ស្តែង នៅមុននេះបន្តិច ឯកឧត្តម ឧត្តមសេនីយ៍ឯក ហ៊ុន ម៉ាណែត បានបង្ហោះនូវសំណេរទាំងរូបលោក និងភរិយាលោកជំទាវ ពេជ ចន្ទមុន្នី បង្ហាញនូវអារម្មណ៍នឹករលឹកទៅកូនពីចម្ងាយយ៉ាងដូច្នេះថា៖ «យប់មិញកូនស្រីទី២ បានវីដេអូខលមក សួរថាប៉ានិងម៉ាក់ បាត់ទៅណា បានអត់ឃើញមកជួបកូននិងអូនសិទ្ធ ច្រើនថ្ងៃហើយ?
ដោយសារតម្រូវការការងារពេលនេះ ប៉ានិងម៉ាក់មិនទាន់អាចជួបកូនៗដោយផ្ទាល់ឬនាំកូនដើរលេងបានទេ បានត្រឹមតែជួបតាម វីដេអូខលសិន… ប៉ានិងម៉ាក់សន្យាថា ពេលកិច្ចការបានចប់ស្រួលបួលនឹងទៅជួបកូនភ្លាម…
ខ្ញុំគិតថាបងប្អូនជាច្រើន ប្រាកដជាយល់ពីអារម្មណ៍មួយនេះ ជាពិសេសបងប្អូនក្រុមគ្រូពេទ្យជួរមុខនិងអ្នកពាក់ព័ន្ធទាំងអស់ក្នុងការប្រយុទ្ធប្រឆាំងនឹងជម្ងឺកូវីដ-១៩ សូមបងប្អូនទាំងអស់អនុវត្តឲ្យបានខ្ជាប់ខ្ជួននូវវិធានសុខាភិបាល ដើម្បីការពារខ្លួនយើង គ្រួសារយើង សង្គមជាតិយើង និងប្រជាជនយើងនៅក្នុងកាលៈទេសៈដ៏លំបាកនេះ ពីព្រោះការប្រយុទ្ធប្រឆាំងនឹងជំងឺកូវីដ-១៩ គឺផ្តើមចេញពីខ្លួនយើង ដើម្បីការពារខ្លួនយើង និងអ្នកដទៃ។»៕ រក្សាសិទ្ធិដោយ៖ លឹម ហុង
