ភ្នំពេញ ៖ រដ្ឋមន្ត្រីក្រសួងយុត្តិធម៌បានបញ្ជាក់ថា ច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត គឺបានបង្កើតឲ្យមានបទល្មើសចំនួន៥ ក្នុងករណីមានអ្នកបំពានទៅលើវិធានការណ៍ក្នុងការប្រយុទ្ធទប់ស្កាត់ការឆ្លងរាលដាលនៃជំងឺកូវីដ១៩ ដែលដាក់ចេញដោយរាជរដ្ឋាភិបាល កក្នុងការទប់ស្កាត់កុំឲ្យជំងឺកូវីដ១៩ ឆ្លងរាលដាលទូទាំងប្រទេស។ ហើយបទល្មើសដែលមានចែងសំខាន់ៗ នៅក្នុងច្បាប់នេះ គឺមានចំនួន ៥បទល្មើស។
លោកកើត រិទ្ធ រដ្ឋមន្ត្រីក្រសួងយុត្តិធម៌បានបញ្ជាក់នៅក្នុងសន្និសីទកាសែតនាព្រឹកថ្ងៃទី១៥ ខែមីនានេះថា បទល្មើសទី១. គឺបទគេចវេះពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក គឺត្រូវផ្តន្ទាទោសដាក់ពន្ធនាគារពី៦ ទៅ ៣ឆ្នាំ និងពិន័យជាប្រាក់ពី ២លានរៀលទៅ ១០លានរៀល កាលបើអំពើខាងលើនេះបានបណ្តាលឱ្យមានការចម្លងជំងឺ កូវីដ-១៩ ដល់អ្នកដទៃ។
បទល្មើសទី២. អំពើគេចវេះពីការព្យាបាលឬគេចចេញពីទីកន្លែងព្យាបាល គឺត្រូវផ្តន្ទាទោសដាក់ពន្ធនាគារពី១ឆ្នាំ ទៅ ៥ឆ្នាំ និងពិន័យ ៥លានរៀល ទៅ ២០លានរៀល។ ហើយទោសនេះ ត្រូវបង្កើនស្ថានទម្ងន់ទោសដាក់ពន្ធនាគារពី៥ឆ្នាំ ទៅ ១០ឆ្នាំ កាលបើអំពើខាងលើនេះបានបណ្តាលឱ្យ មានការចម្លងជំងឺកូវីដ-១៩ ដល់អ្នកដទៃ។
បទល្មើសទី៣. អំពើចម្លងដោយចេតនានូវជំងឺភូរីដ-១៩ ដល់អ្នកដទៃ ត្រូវផ្តន្ទាទោសដាក់ពន្ធនាគារ ពី៥ឆ្នាំ ទៅ ១០ឆ្នាំ។ ត្រូវផ្តន្ទាទោសដាក់ពន្ធនាគារពី១០(ដប់)ឆ្នាំ ទៅ ២០(ម្ភៃ)ឆ្នាំ កាលបើអំពើខាងលើនេះ ត្រូវបានធ្វើឡើងដោយមានការរៀបចំជាក្រុមឬអង្គការចាត់តាំង។
បទល្មើសទី៤. អំពើមិនគោរពវិធានការរដ្ឋបាល ត្រូវទទួលពិន័យអន្តរការណ៍ពីមួយលានរៀល ទៅ ប្រាំលានរៀល។ ហើយបើសិនការមិនគោរពនេះបណ្តាលឲ្យមានការចម្លងជំងឺទៅអ្នកដទទៃ គឺត្រូវផ្តន្ទាទោសដាក់ពន្ធនាគារពី៦ខែ ទៅ ៣ឆ្នាំ។
បទល្មើសទី៥. អំពើរារាំងដល់ការអនុវត្តវិធានការផ្តន្ទាទោសដាក់ពន្ធនាគារពី៦ខែ ទៅ ៣ឆ្នាំ និងពិន័យជាប្រាក់ពីពីរលានរៀល ទៅ ដប់លានរៀល។ ត្រូវផ្តន្ទាទោសដាក់ពន្ធនាគារពី២(ពីរ)ឆ្នាំ ទៅ ៥(ប្រាំ)ឆ្នាំ និងពិន័យជាប្រាក់ពី៥.០០០.០០០(ប្រាំលាន) រៀល ទៅ ២០.០០០.០០០ (ម្ភៃលាន )រៀល កាលបើអំពើខាងលើនេះបណ្តាលឱ្យមានការចម្លងជំងឺកូវីដ-១៩ ដល់អ្នកដទៃឬប៉ះពាល់ធ្ងន់ធ្ងរដល់សុខភាពសាធារណៈ៕ រក្សាសិទ្ធិដោយៈចេស្តារ
