ថ្មីៗនេះ តាមរយៈវីដេអូមួយ ដែលបង្ហាញពីទង្វើរនៃសកម្មភាពពីសំណាក់សង្ឃមួយអង្គ បានប្រើរំពាត់វាយទៅលើនេនៗ២អង្គ ក្នុងនោះនេន១អង្គ ត្រូវទទួលរងទណ្ឌកម្មធ្ងន់ធ្ងររហូត ៥០ រំពាត់ បានធ្វើឲ្យមហាជនផ្ទុះកំហឹងយ៉ាងខ្លាំងក្លាតែម្តង។
យ៉ាងណាមិញ បើតាមលោក ផែង វណ្ណៈ បានប្រាប់ឲ្យដឹងថា ទង្វើរដាក់ទណ្ឌកម្មដ៏សាហាវព្រៃផ្សៃនេះ គឺបានកើតឡើងនៅវត្តបូរ ស្ថិតក្នុងខេត្តសៀមរាប។ ហើយករណីនេះ គឺមិនមែនទើបតែកើតឡើងនោះ គឺបានកើតមានឡើងជាយូរណាស់មកហើយ ប៉ុន្តែទើបបែកធ្លាយនៅពេលនេះ ដោយសារការឈឺចាប់របស់ព្រះសង្ឃ អត់ទ្រាំលែងបានតទៅទៀត។
មកទល់ម៉ោងនេះ គេក៏បានដាក់ការសង្ស័យទៅលើចៅអធិការ ដែលជាអ្នកនៅពីក្រោយខ្នង ឲ្យប្រព្រឹត្តនូវទង្វើដាក់ទណ្ឌកម្មដ៏សាហាវព្រៃផ្សៃនេះ។ នេះគ្រាន់តែជាការដាក់ការសង្ស័យរបស់មហាជនប៉ុណ្ណោះ តែការពិតយ៉ាងណា គឺទុកឲ្យសមត្ថកិច្ចពាក់ព័ន្ធធ្វើការស្រាវជ្រាវ។
ដោយឡែក ក្រឡេកមកមើលពីកំហឹងមហាជនវិញ ឃើញថា ពិតជាខ្លាំងក្លាណាស់ ដែលអ្នកខ្លះថា បើប៉ះចំកូនខ្លួនវិញ គឺដឹងតែបែកឈាមវិញហើយ។ ក្នុងនោះ អ្នកលេងហ្វេសប៊ុកម្នាក់ៗបានបញ្ចេញមតិថា៖ «មិនគួរវាយចឹងទេ លើសហើយ ឬគ្មានជម្រើសផ្សេងដាក់ទារុណកម្ម បានមកវាយដល់ថ្នាក់ហ្នឹង, ខ្លួនជាអ្នកបួសប៉ុន្តែចិត្តវិញពោរពេញទៅដោយទោសះមោហះទៅវិញ, ស៊ីបាយញាតិញោមចំណុះជើងវត្តច្រើន មានកម្លាំងវាយបានល្អណាស់, សាហាវណាស់ ក្រសួងធម្មការ និងសាសនា ត្រូវតែដោះស្រាយមិនគួរឲ្យមានរឿងបែបនេះទៀតឡើយ»។ រីឯអ្នកខ្លះទៀត ក៏បានលើកឡើងជាយោបល់ល្អថា៖ «បើសិនជាលោកមានការខុសឆ្គងហ្នឹងវិន័យសង្ឃយ៉ាងណាក្តី ជាអ្នកបួសត្រូវមានមេត្តា ពុទ្ធវិន័យមិនមានទណ្ឌកម្មបែបព្រៃផ្សៃដូច្នេះឡើយ បើទោះជាត្រូវទទួលវិន័យក៏គួរណាមានការអប់រំដោយធម៌ត្រជាក់ មិនគួរណាវាយហើយថតបង្ហោះក្នុងសភាពឃោរឃៅបែបនេះឡើយ បើសិនជាអាចគួរកែប្រែវិន័យបែបនេះចេញទៅ គ្រប់គ្នាឃើញហើយគឺពិបាកភ្នែកមើលណាស់»៕ រក្សាសិទ្ធិដោយ៖ លឹម ហុង
