ភ្នំពេញ ៖ ចាប់តាំងពីព្រឹត្តិការណ៍នៃការផ្ទុះឡើងការរាលដាលនៃមេរោគ SARS-COVID 2 ដែល នាំកើតជំងឺកូវីដ-១៩ តាំងពីថ្ងៃ ២០ កុម្ភ: មក កម្ពុជាយើងត្រូវបានជំងឺនេះរាតត្បាតញ៉ាំញីដ៏គួរឲ្យកាន់តែព្រួយបារម្ភឡើងៗ។
សម្តេចអគ្គមហាសេនាបតីតេជោ ហ៊ុនសែន ប្រធាន CPP និងជានាយករដ្ឋមន្ត្រីនៃ ព្រះរាជាណាចក្រកម្ពុជា បានផ្ញើសារសំឡេងបន្ទាន់ម្តងហើយម្តងទៀត ទៅកាន់មន្ត្រីមានសមត្ថកិច្ចគ្រប់ជាន់ថ្នាក់ ជនរួមជាតិ ជាពិសេស គណៈកម្មការអន្តរក្រសួង ប្រយុទ្ធប្រឆាំងនឹងកូវីដ-១៩ ដែលមាន ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីសុខាភិបាល ជាប្រធាន ក្នុងគោលបំណងតែមួយគត់ គឺការពារអាយុជីវិត និងសុខភាពរបស់ប្រជាពលរដ្ឋកម្ពុជា ក្នុងឋានៈជាឪពុកនៃមនុស្សមួយនគរ។
ប្រជាជនកម្ពុជារាប់លាននាក់ដែលប្រើស្មាតហ្វូន ឬទូរស័ព្ទវៃឆ្លាត តែងតែបើកមើលនូវការជូនដំណឹងរបស់ក្រសួងសុខាភិបាល ដែលមាន លោកជំទាវ ឳ វណ្ណឌីន លោកជំទាវ យក់ សម្បត្តិ ជាអ្នកនាំពាក្យនៃក្រសួងសុខាភិបាលដែលកំពុងធ្វើការដ៏មហាមមាញឹកដើម្បីចង់ដឹងពីសភាពរាតត្បាតនៃជំងឺដ៏កាចសាហាវនេះ។
កម្ពុជាយើងមានរួចជាស្រេចហើយនូវច្បាប់ជាធរមាននានា ព្រមទាំងលិខិតូបករណ៍ ទាំងឡាយ សមាសភាពឥស្សរជនជាន់ខ្ពស់ សម្រាប់ដឹកនាំការប្រតិបត្តិច្បាប់ទាំងនោះ សំដៅប្រយុទ្ធយកឈ្នះឲ្យខាងតែបាន លើមេរោគដ៏កាចសាហាវចង្រៃ SARS-COVID 2 ដែលនាំឲ្យមានមហន្តរាយដែលកើតចេញពីជំងឺ COVID-19។
កម្ពុជាកំំពុងតែដំណើការចាក់វាក់សាំងបង្ការជូនពលរដ្ឋរបស់ខ្លួនទៅតាមការណែនាំរបស់ក្រសួងសុខាភិបាល, កម្ពុជាសូមសម្តែងនូវអំណរគុណជូនចំពោះមហាមិត្តចិន និងមហាមិត្ត ឥណ្ឌា ដែលផ្តល់វ៉ាក់សាំងក្នុងន័យមនុស្សធម៌និយមដល់កម្ពុជា នោះពុំមែនក្នុងន័យនយោបាយ ដូចការចោទប្រកាន់របស់កម្លាំងអមិត្ត អគតិ មកលើ រាជរដ្ឋាភិបាលកម្ពុជាឡើយ។
ប្រជាជនកម្ពុជាគ្រប់ៗគ្នា ដែលគ្រប់វ័យចាក់ថ្នាំវ៉ាក់សាំងត្រូវតែរួសរាន់ដោយខ្លួនឯងផ្ទាល់ រួមផ្សំនឹងការខិតខំជួយគាំពាររបស់អជ្ញាធរគ្រប់ជាន់ថ្នាក់ក្នុងការធ្វើឲ្យខ្លួនឯងបានទទួលការចាក់ វ៉ាក់សាំង ហើយត្រូវបំពាក់ឲ្យខ្លួនឯងឲ្យខាងតែបាននូវវិន័យ និងសេចក្តីថ្លៃថ្នូរក្នុងការរង់ចាំការចាក់ថ្នាំវ៉ាក់សាំង ដោយត្រូវតែធ្វើខ្លួនជាពលរដ្ឋល្អ រួមចំណែកបែបជាយុទ្ធជនលើសមរភូមិប្រយុទ្ធ ប្រឆាំងនឹងសត្រូវរួម ដែលមើលមិនឃើញ COVID-19 ឲ្យសម្រេចបានជោគជ័យតាមបំណងប្រាថ្នា និងការរំពឹងទុករបស់សម្តេចពុកតេជោ ហ៊ុនសែន។
ភាពទន់ភ្លន់ សុភាពរាបសា ព្រមទាំងធ្វើអ្វីៗច្រើនបែបយ៉ាងទៀត ប្រកបដោយសុទិដ្ឋិនិយមដល់ប្រទេស និងអង្គការអន្តរជាតិនានា ដែលមានវ៉ាក់សាំង មានសមត្ថភាពក្នុងការជួយផ្តល់វ៉ាក់សាំងតាមការដឹងឮរបស់អង្គការសុខភាពពិភពលោក សម្រាប់យកមកចាក់ជូនប្រជាជនកម្ពុជាពេញវ័យ រហូតដល់ទៅជាង ១០លាននាក់ នៅទូទាំងប្រទេស ដូច្នេះ មានន័យថា បើចាក់វ៉ាក់សាំងក្នុងម្នាក់ៗពីរដង កម្ពុជាត្រូវការវ៉ាក់សាំងរហូតដល់ប្រហែល ២០លានដូសឯណោះ ទើបបានចាក់គ្រប់ៗគ្នា។
កាលពីថ្ងៃសុក្រសប្តាហ៍មុន ក្រុមប្រទេសចតុរង្គដែលរួមមាន អាមេរិក ជប៉ុន ឥណ្ណា និង អូស្ត្រាលី បានប្រកាសពីការផ្តល់វ៉ាក់សាំងដោយឥតគិតថ្លៃដល់បណ្តាប្រទេសនៅទ្វីបអាស៊ីចំនួន ១ពាន់លានដូស ពីឥឡូវនេះរហូតដល់បំណាច់ឆ្នាំ ២០២២, ហើយដោយសារយើងដឹងថាកម្ពុជា ជាប្រទេសមួយនៅទ្វីបអាស៊ីដែរនោះ ដូច្នេះការចាត់ចែងជាបន្ទាន់មួយសម្រាប់ការទទួលយកវ៉ាក់សាំងនេះ គប្បីជាវិធានការដែលកម្ពុជាគួរប្រកាន់យកដោយត្រូវគូសវាសគោលនយោបាយទទួលវ៉ាក់សាំងក្នុងឋនៈជាប្រទេសមានណោយទាន ហើយត្រូវបានគេផ្ដល់ឱ្យក្នុងន័យមនុស្សធម៌ថ្លៃថ្លាបំផុត។
តាមអត្ថន័យខាងលើនេះហើយ ដោយហេតុថា កម្ពុជាត្រូវប្តូរផ្តាច់បន្តការពារ ប្រយុទ្ធប្រឆាំងសត្រូវរួមរបស់ជាតិ ផង និងរបស់ពិភពលោកផហ ព្រមទាំងបន្តរក្សាលំនឹងអាជីវកម្ម រក្សាលំនឹងជីវភាពរស់នៅជូនប្រជាជនខ្លួនឯងផង។ កម្ពុជាត្រូវបន្តអនុវត្តន៍គោលនយោបាយនៅបរទេស ប្រឆាំងកូវីដ-១៩ ដោយផ្អែកលើគោលការណ៍ រឹងមាំ ទន់ភ្លន់ បត់បែនស្របតាមការវិវឌ្ឍន៍នៃភូមិសាស្ត្រ នយោបាយ និងភូមិសាស្ត្រសេដ្ឋកិច្ច ប្រកាន់ខ្ជាប់គោលការណ៍អព្យាក្រឹត អចិន្ត្រៃយ៍ និងមិនចូលបក្សសម្ព័ន្ធ រក្សាការប្រុងប្រយ័ត្នបន្ថែមទៀត ចំពោះការជ្រួតជ្រាបផ្នែកនយោបាយពីខាងក្រៅ មកក្នុងនយោបាយផ្ទៃក្នុងកម្ពុជាតាមរយៈសន្លឹកបៀវ៉ាក់សាំងប្រឆាំងកូវិដ-១៩។
សូមចងចាំថា បច្ចុប្បន្ន ប្រទេសមួយចំនួននៅអាមេរិកឡាទីន កំពុងប្រឈមយ៉ាងខ្លាំងក្នុងរឿងនយោបាយផ្ទៃក្នុងផង ការរាតត្បាតយ៉ាងលឿននៃកូវីដ-១៩ផង ធ្វើឲ្យជួបប្រទះបញ្ហាសង្គមសេដ្ឋកិច្ចនយោបាយយ៉ាងធ្ងន់ធ្ងរ ដោយសារការលូកដៃពីមហាអំណាចខាងក្រៅប្រទេសទាំងនោះ រួមមាន វេណេស៊ូអេឡា កូឡុំប៊ី ឈីលី បូលីវី និងអេក្វាឌ័រ។
កម្ពុជាយើងត្រូវសិក្សាបទពិសោធន៍នៃប្រទេសទាំងអស់នោះឲ្យបានច្បាស់លាស់ និងបញ្ចៀសកម្ពុជាឲ្យបានមុន កុំឲ្យស្គាល់នូវស្ថានភាពបែបដូចប្រទេសទាំងនោះ តាមរបៀបត្រូវតែធ្វើក្រោលមុនពេលចោរចូលមកលួចសេះ។ ពេលវេលាដែលប្រជាជនកម្ពុជាទាំងអស់គ្នាត្រូវធ្វើនាពេលនេះ គឺជាយុទ្ធជនប្រយុទ្ធប្រឆាំងនឹងសត្រូវរួមរបស់ជាតិ និងពិភពលោក គឺជំងឺកូវីដ-១៩ តាមការបញ្ជាដឹកនាំផ្ទាល់រាល់ថ្ងៃ និងបញ្ជាកំពូលរបស់ សម្តេចតេជោ ហ៊ុនសែន និងមេបញ្ជាការជា បន្តបន្ទាប់ចុះមកទៀត ដូចជា ឯកឧត្តម ម៉ម ប៊ុនហេង , លោកជំទាវ យក់ សម្បត្តិ , លោកជំទាវ ឳ វណ្ណឌីន , ឯកឧត្តម ហ៊ុនម៉ាណែត , លោកជំទាវ ពេជ្រ ច័ន្ទមុនី , ឯកឧត្តម ឌី វិជ្ជា ជាដើម… ហើយនឹងត្រូវបន្តទៅមុខទៀតដោយយ៉ាងហោចណាស់ក៏ច្រើនខែទៅមុខទៀតដែរ។
យើងសង្ឃឹមជឿជាក់ថា កម្លាំងមហាសាមគ្គីនៃសង្គមជាតិយើង និងការបង្កើនវិន័យ គោរពប្រតិបត្តិឲ្យបានខ្ជាប់ខ្ជួននូវការអនុវត្តន៍ ៣កុំ ៣ការពារ , អ្នកបានចាក់វ៉ាក់សាំងកម្លាំងមាំមួន កូវីដ-១៩ មិនហ៊ានពួនស្ទាក់ ពិតជានឹងនាំឲ្យយើងឆ្ពោះទៅឈ្នះសង្គ្រាមប្រឆាំងកូវីដ-១៩ ក្នុងរយៈពេលដ៏ខ្លី ដូចអ្វីដែលយើងបានឈ្នះសង្គ្រាមទប់ស្កាត់ការវិលត្រឡប់មកវិញនៃរបបប្រល័យពូជសាសន៍នាក្រោយថ្ងៃ ៧ មករា ១៩៧៩ ជាក់ជាមិនខាន៕ មជ្ឈមណ្ឌលព័ត៌មាន CEN
