ភ្នំពេញ ៖ ជនសង្ស័យម្នាក់ត្រូវបានកម្លាំងសមត្ថកិច្ចនគរបាលប៉ុស្តិ៍រដ្ឋបាលកាកាបទី១ ឡោមព័ទ្ធស្ទាក់ចាប់ឃាត់ខ្លួនបានភ្លាមៗ ក្រោយពេលប្រើអំពើហឹង្សាយ៉ាងចាស់ដៃកាប់ទៅលើគូរសត្រូវរបស់ខ្លួន បណ្តាលឲ្យរងរបួសយ៉ាងធ្ងន់ធ្ងរ។
ការឃាត់ខ្លួនជនសង្ស័យខាងលើនេះ ធ្វើឡើងកាលពីវេលាម៉ោង២និង១៥នាទីរសៀល ថ្ងៃទី១៦ ខែមីនា ឆ្នាំ២០២១ ស្ថិតនៅភូមិប៉ប្រក់ខាងជើង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះមានឈ្មោះសុខ លាង ភេទប្រុស រងរបួសធ្ងន់ កំពុងតែសម្រាកព្យាបាលនៅមន្ទីរពេទ្យ។
ចំណែកជនសង្ស័យមានឈ្មោះ តារា វិឆ័យ ភេទប្រុស អាយុ២២ឆ្នាំជនជាតិខ្មែរ មុខរបរមិនពិតប្រាកដ ស្នាក់នៅក្បែរចំណុចឃាត់ខ្លួនខាងលើ។
បន្ទាប់ពីសមត្ថកិច្ចធ្វើឃាត់ខ្លួនជនសង្ស័យខាងលើហើយ ក៏បានបញ្ជូនទៅធ្វើការសាកសួរបន្តនៅប៉ុស្តិ៍នគរបាលរដ្ឋបាលសង្កាត់កាកាបទី១ នៅចំពោះមុខសមត្ថកិច្ចជនសង្ស័យបានសារភាពថា រូបគេពិតជាបានធ្វើសកម្មភាពកាប់ទៅលើជនរងគ្រោះឈ្មោះ សុខ លាង ពិតប្រាកដមែន។
បច្ចុប្បន្នជនសង្ស័យនិងវត្ថុតាងកាំបិតប៉័ងតោ ត្រូវបានបញ្ជូនទៅឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅកាន់តុលាការ ចាត់ការតាមផ្លូវច្បាប់៕ រក្សាសិទ្ធិដោយ៖សួង សាម
