ភ្នំពេញ៖ បច្ចុប្បន្ននេះ វិស័យដឹកជញ្ជូនកម្ពុជា បានធ្លាក់ចុះខ្លាំង ដោយសារវិបិត្តកូវីដ១៩ ជាពិសេសការធ្លាក់ចុះតម្រូវការ និងការកើនឡើងតម្លៃដឹកជញ្ជូនខ្ពស់ ព្រមទាំងការកកសន្ទះទូរកុងតឺន័រនៅសហរដ្ឋអាមេរិក និងសហភាពអឺរ៉ុបជាដើម។
លោកឧកញ៉ា ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បានឱ្យអ្នកព័ត៌មានដឹងថា វិស័យដឹកជញ្ជូននៅកម្ពុជា បានរងផលប៉ះពាល់ជាងមួយឆ្នាំមកហើយ ចាប់តាំងពីការផ្ទុះឡើងនៃជំងឺកូវីដ១៩ ប៉ុន្តែវាបានងើបឡើងវិញជាបណ្តើរៗ ក្នុងអំឡុងចុងឆ្នាំ ២០២០ ដោយសារការគ្រប់ គ្រងស្ថានភាពបានល្អរបស់រាជរដ្ឋាភិបាល តែពេលនេះវាកំពុងតែបង្កផលប៉ះពាល់កាន់តែខ្លាំង ក្នុងពេលកម្ពុជាមានករណីផ្ទុះការឆ្លងក្នុងសហគមន៍លើកទី៣ គឺព្រឹត្តិការណ៍ ២០កុម្ភៈ ដែលចេះតែកើនឡើង និងអូសបន្លាយពេលយូ។
លោកឧកញ៉ា បានអះអាងថា នៅក្នុងវិបត្តិនៃជំងឺកូវីដ១៩នេះ វិស័យដឹកជញ្ជូនតាមផ្លូវអាកាសរងផលប៉ះពាល់ខ្លាំងជាងគេ ដែលមានការធ្លាក់ចុះដល់ទៅជាង ៩៥ភាគរយ បន្ទាប់មកការដឹកជញ្ជូនតាមផ្លូវទឹក គ្រាដែលមានការកាត់បន្ថយចំនួននាវាដឹកជញ្ជូន ដោយសារតម្រូវការធ្លាក់ចុះ ដែលធ្វើឲ្យតម្លៃសេវាដឹកជញ្ជូនហក់ឡើងពី ៣ទៅ ៥ដង។
ចំណែកការដឹកជញ្ជូនតាមផ្លូវគោកទោះបីជាមានការរឹតបន្តឹងនៅតាមតំបន់ព្រំដែនជាមួយប្រទេសជិតខាងក៏ដោយ ក៏ការដឹកជញ្ជូនទំនិញនៅតែដំណើរការធម្មតា បន្ទាប់ពីមានបទបញ្ជាពីប្រមុខរាជរដ្ឋាភិបាលកម្ពុជាដែលធ្វើឲ្យវាធ្លាក់ចុះប្រហែលជាង ១០ភាគរយប៉ុណ្ណោះ ព្រោះតែការធ្លាក់ចុះនៃតម្រូវការ។
លោកឧកញ៉ា លើកឡើងថា ប្រសិនការឆ្លងនៃជំងឺដ៏កាចសាហាវនេះបន្តអូសបន្លាយកាន់តែយូរនោះ ក្រុមហ៊ុនដឹកជញ្ជូនកម្ពុជាមួយចំនួន កំពុងប្រឈមការកាត់បន្ថយបុគ្គលិករបស់ខ្លួន ក្នុងគ្រាដែលពួកគេកំពុងជួបវិបត្តិហិរញ្ញវត្ថុប្រាក់ចំណូលធ្លាក់ចុះ ហើយវាអាចនឹងឈានទៅដល់ការបិទក្រុមហ៊ុនថែមទៀត បើសិនកូវីដ១៩ អូសបន្លាយកន្លះឆ្នាំទៀត។
គួរបញ្ជាក់ថា បើតាមលោកឧកញ៉ា ស៊ិន ចន្ធី បច្ចុប្បន្ននេះ សមាគមភ្នាក់ងារបញ្ជូនទំនិញកម្ពុជា មានសមាជិកប្រមាណ ១២០ក្រុមហ៊ុន។ ជាមួយគ្នានេះលោកឧកញ៉ា បានបង្ហាញក្តីសង្ឈឹមថា តាមការដាក់ចេញវិធានការយ៉ាងម៉ឺងម៉ាត់របស់រាជរដ្ឋាភិបាលកម្ពុជា និងការចូលរួមទប់ស្កាត់ពីក្រសួងស្ថាប័នជំនាញ ព្រមទាំងប្រជាពលរដ្ឋទូទាំងប្រទេស និងការទទួលបានការចាក់វ៉ាក់សាំងបង្ការជំងឺកូវីដ១៩ ជាបណ្តើរៗ កម្ពុជា នឹងអាចបញ្ឈប់ការឆ្លងក្នុងព្រឹត្តិការណ៍សហគមន៍ ២០កុម្ភៈ បាននាពេលខាងមុខនេះ ដែលធ្វើឱ្យវិស័យផ្សេងៗមានសង្ឃឹមឡើងវិញ៕ រក្សាសិទ្ធិដោយ ៖ CEN
