ភ្នំពេញ ៖ ជនសង្ស័យម្នាក់កំពុងធ្វើសកម្មភាពលួចទ្រព្យសម្បត្តិក្នុងបន្ទប់ជួល របស់ប្រជាពលរដ្ឋ ត្រូវបានម្ចាស់ផ្ទះនិងអ្នកជិតខាងដេញ ចាប់ប្រគល់ឲ្យសមត្ថកិច្ចចាប់វាយខ្នោះ កាលពីវេលាម៉ោង៩និង០០នាទីព្រឹក ថ្ងៃទី១៧ ខែមីនា ឆ្នាំ២០២១ ស្ថិតនៅក្នុងផ្ទះឡ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះ ពេជ្យ អាយុ១៨ឆ្នាំ មានមុខរបរ និងទីលំនៅមិនពិតប្រាកដ។
តាមប្រភពព័ត៌មានបានឲ្យដឹងថា នៅម៉ោងកើតហេតុម្ចាស់បន្ទប់ជួលខាងលើ បានបើកទ្វារចំហរ និងកំពុងសម្រាកនៅក្នុងផ្ទះធម្មតា ឃើញដូច្នេះជនសង្ស័យស្មានតែគ្មានមនុស្សនៅ ស្រាប់តែចូលទៅរើកកាយប៉ុនប៉ងលួចទ្រព្យសម្បត្តិ តែត្រូវម្ចាស់បន្ទប់ឃាត់ជាប់និងរាយការណ៍ ទៅសមត្ថកិច្ចចុះឃាត់យកមកសាកសួរនៅប៉ុស្តិ៍តែម្តង ។
បច្ចុប្បន្នជនសង្ស័យខាងលើ ត្រូវបានបញ្ជូនទៅកាន់អធិការដ្ឋាននគរបាលខណ្ឌពោធិ៍សែនជ័យ ចាត់ការបន្តតាមនីតិវិធី៕ រក្សាសិទ្ធិដោយ៖សួង សាម
