ដូចដែលយើងគ្រប់គ្នាបានដឹងហើយថា ជំងឺកូវីដ១៩ ពុំត្រឹមតែកើតមាននៅក្នុងប្រទេសកម្ពុជាយើងប៉ុណ្ណោះទេ គឺជំងឺនេះនៅតែកំពុងមានឥទ្ធិពល និងវាយលុកនៅក្នុងបណ្តាប្រទេសជាច្រើន នៅលើពិភពលោក។ ហើយក្នុងពេលបច្ចុប្បន្ននេះផងដែរ ឃើញថាមានប្រទេសជាច្រើន ក៏កំពុងដំណើរការចាក់វ៉ាក់សាំងប្រឆាំងកូវីដ១៩ ផងដែរ។
យ៉ាងណាមិញ ទន្ទឹមនឹងប្រទេសកម្ពុជា កំពុងដំណើរការចាក់វ៉ាក់សាំងកូវីដ១៩ ថ្មីៗនេះ តារាសម្តែងស្រីអ្នកនាង សារ៉ាយ សក្ខណា ក៏បានចេញវីដេអូមួយ ដើម្បីបង្ហាញទៅដល់បងប្អូននៅស្រុកខ្មែរបានឃើញ ថាតើនៅអាមេរិកគេដំណើរការចាក់វ៉ាក់សាំងការពារជំងឺកូវីដ១៩ យ៉ាងដូចម្តេចខ្លះទៅ…។
តាមរយៈវីដេអូប៉ុន្មាននាទី តារាសម្តែងស្រី អ្នកនាង សារ៉ាយ សក្ខណា បានបង្ហាញពីទិដ្ឋភាពជាក់ស្តែង និងប្រាប់ឲ្យដឹងថា នៅអាមេរិក កន្លែងចាក់វ៉ាក់សាំង គឺគេមិនធ្វើនៅក្នុងមន្ទីរពេទ្យនោះទេ គឺគេធ្វើខាងក្រៅក្រុងដូចជានៅព្រលានយន្តហោះជាដើម ព្រោះថាការចាក់នៅទីវាលខាងក្រៅនេះ ដើម្បីគេរក្សាសុវត្ថិភាពឲ្យយើង។ អ្នកនាងបន្តថា ការចាក់ថ្នាំនេះ គឺតម្រូវឲ្យនៅក្នុងឡាន ហើយគ្រូពេទ្យមកចាក់ឲ្យយើងនៅក្នុងឡានតែម្តង។
អ្នកនាង សក្ខណា បានឲ្យដឹងទៀតថា បន្ទាប់មក គេសួររកថ្ងៃណាត់ចាក់ថ្នាំ និងក៏ដូចជាប័ណ្ណសម្គាល់ខ្លួនរបស់យើង (ដែលនេះគឺជាសួរនាំតង់ទី១)។ ហើយសម្រាប់តង់ទី២ គឺគេសួរនាំថាតើយើងមានប្រតិកម្មជាមួយការចាក់ថ្នាំផ្សេងៗដែរ ឬអត់ទេ? មានទម្ងន់ (គភ៌) ឬអត់ និងបញ្ហាផ្សេងៗទៀត មុននឹងអនុញ្ញាតឲ្យយើងចាក់ថ្នាំ។ ហើយបន្ទាប់ពីចាក់ថ្នាំរួច គេមិនទាន់ឲ្យយើងទៅផ្ទះភ្លាមទេ គឺគេឲ្យរង់ចាំ ១៥ នាទី សិន ដើម្បីចង់ដឹងថាយើងមានអាការអ្វីអត់ ប្រសិនបើអត់មានបញ្ហាអ្វីទេ ទើបគេឲ្យយើងទៅផ្ទះបាន។
ជាចុងបញ្ចប់នៃវីដេអូ សារ៉ាយ សក្ខណា ក៏បានជូនពរទៅដល់បងប្អូនប្រជាពលរដ្ឋខ្មែរទាំងអស់ សូមមានសុខភាពល្អ ជាពិសេសជៀសផុតពីជំងឺកូវីដដ៏កាចសាហាវមួយនេះ និងក៏សូមឲ្យបងប្អូនដែលកើតជំងឺនេះហើយ សូមឲ្យរឹងមាំ កុំមានការតក់ស្លុត កុំមានការភ័យខ្លាច គឺត្រូវញ៉ាំថ្នាំឲ្យបានទៀងទាត់ ទៅតាមការណែនាំរបស់គ្រូពេទ្យ និងសូមបងប្អូនកុំមានការរើសអើងដល់ពួកគាត់ ព្រោះគ្មានអ្នកណាម្នាក់ចង់កើតជំងឺនេះនោះទេ៕ រក្សាសិទ្ធិដោយ៖ លឹម ហុង
