ស្ទឹងត្រែង ៖ នៅព្រឹកថ្ងៃទី ១៧ ខែមីនាឆ្នាំ២០២១នេះ កម្លាំងនគរបាលក្រុងស្ទឹងត្រែង បានបង្ហាញមុខក្រុមក្មេងទំនើង ដែលតែងតែអុកឡុកតាមទីសាធារណៈ និងមានសារធាតុញៀនក្នុងខ្លួន មុនពេលបញ្ជូនទៅតុលាការនារសៀលថ្ងៃនេះ។
សមត្ថកិច្ចនគរបាលក្រុងស្ទឹងត្រែង បានប្រាប់ឲ្យដឹងថា ក្រុមក្មេងទំនើងចំនួន ៣ នាក់ ត្រូវបានឃាត់ខ្លួននៅតាមទីសាធារណៈ ក្នុងក្រុងស្ទឹងត្រែងកាលពីយប់ថ្ងៃទី ១៥ ខែមីនា ឆ្នាំ ២០២១ ។
ការចុះឃាត់ខ្លួននោះ បន្ទាប់ពីគណៈបញ្ជាការឯកភាពក្រុងស្ទឹងត្រែង ដឹកនាំដោយលោក សាយ កុសល អភិបាលក្រុងស្ទឹងត្រែង បានបានចុះធ្វើរដ្ឋបាល និងល្បាតរក្សាសន្តិសុខក្នុងភូមិសាស្ត្រក្រុង និងបានបង្ក្រាបក្មេងទំនើងមួយក្រុម ដែលតែងតែបង្កភាពចលាចលអុកឡុកបង្កអសន្តិសុខ ក្នុងក្រុងជារឿយៗ។ ពេលនោះសមត្ថកិច្ចឃាត់ខ្លួនបាន៣នាក់ ដែលជួបជុំនៅសួនច្បារមុខសាលាខេត្តស្ទឹងត្រែង។ ដកហូតបាន វត្ថុតាង: ដាវ១ដើម ម៉ូតូ៣គ្រឿង (ម៉ាកExter) យកមកអធិដ្ឋានការដ្ឋាននគរបាលក្រុង ដើម្បីសួរនាំ និងបានធ្វើតេស្តរកសារធាតុញៀន ។
យុវជនទាំង ៣ នាក់ដែលត្រូវឃាត់ខ្លួន ១/សឿន ពៅ ភេទប្រុស អាយុ១៦ឆ្នាំ មុខរបរ ជាងដែក មានទីលំនៅភូមិភក់ ឃុំ-ស្រុកថាឡាបរិវ៉ាត់ ខេត្តស្ទឹងត្រែង តេស្តសារធាតុញៀន(+)។ ២/សេង សី ភេទប្រុស អាយុ១៧ឆ្នាំ មុខរបរ មិនប្រាកដ មានទីលំនៅភូមិរាជានុកូល សង្កាត់-ក្រុង-ខេត្តស្ទឹងត្រែង តេស្តសារធាតុញៀន(+) ។ ៣/អុន សុភារិទ្ធ ភេទប្រុស អាយុ ២០ឆ្នាំ មុខរបរ ជាងដែក មានទីលំនៅភូមិ-ឃុំអូរឫស្សីកណ្ដាល ស្រុកសៀមបូក ខេត្តស្ទឹងត្រែង តេស្តឃើញ(+) ។
ជនទាំង៣នាក់ នឹងបញ្ជូនសំណុំរឿងទៅសាលាដំបូងខេត្ត នៅរសៀលថ្ងៃទី ១៧ ខែមីនានេះ៕ រក្សាសិទ្ធិដោយ៖សំណាង
