យុវតីម្នាក់អាយុ ១៦ ឆ្នាំ បានព្យាយាមប៉ុនប៉ងធ្វើអត្តឃាត ពីលើស្ពាន ដោយតូចចិត្តឪពុកម្តាយស្តីបន្ទោសឲ្យ រឿងលេងហ្គេមនៅលើទូរស័ព្ទ។ ហេតុការណ៍នេះ បានកើតឡើងនៅចំណុចស្ពានអាកាសនៃផ្លូវហាយវ៉េ Kuala Lumpur-Karak កាលពីថ្ងៃទី១៦ ខែមីនា ឆ្នាំ២០២១។
យោងតាមកាសែត Harian Metro នោះប៉ូលីស និងបុគ្គលិកពន្លត់អគ្គីភ័យ បានជួយសង្គ្រោះក្មេងស្រីរងគ្រោះ ដែលក្រោយមក ត្រូវបានបញ្ជូនទៅកាន់មន្ទីរពេទ្យ ដើម្បីធ្វើការព្យាបាលបន្តទៀត។
អធិការនគរបាលស្រុក Bentong លោក Zaiham Mohd Kahar បាននិយាយថា ពួកគេបានទទួលការហៅបន្ទាន់នៅម៉ោង ២ និង ១២ នាទី រសៀល បន្ទាប់មក កម្លាំងរបស់លោកមកពីប៉ុស្តិ៍ Bukit Tinggi បានប្រញាប់ប្រញាល់ទៅកាន់ទីតាំងនោះ។
លោកបន្តថា នៅពេលក្រុមការងារទៅដល់ទីតាំងកើតហេតុ គេក៏បានឃើញយុវតីនោះកំពុងអង្គុយនៅលើបង្កាន់ដៃស្ពាន។ ភ្លាមៗនោះ ប៉ូលីសបានព្យាយាមបញ្ចុះបញ្ចូលនាងឱ្យស្ងប់ចិត្ត ខណៈពេលដែលក្រុមពន្លត់អគ្គិភ័យនៅខាងក្រោមស្ពាន ដើម្បីដាក់សំណាញ់ការពារក្រែងនាងលោតចុះមក។
នៅពេលប៉ូលីសកំពុងព្យាយាមបញ្ចុះបញ្ចូលក្មេងស្រីនោះ លោកស្នងការ Bukit Tinggi លោក Maznan Omar បានដើរលបៗចូលទៅជិតនាងពីខាងក្រោយ ហើយស្ទុះទៅទាញនាងចុះពីលើស្ពាន។
លោក Zaiham បាននិយាយថា យុវត្តីរូបនោះបានប្រាប់ថានាងធ្លាក់ទឹកចិត្តខ្លាំង បន្ទាប់ពីត្រូវបានឪពុកស្តីបន្ទោសឲ្យ ចំពោះការលេងហ្គេមវីដេអូជាញឹកញាប់ពេក ហើយឪពុករបស់នាងក៏បានដកហូតទូរស័ព្ទរបស់នាងផងដែរ៕ រក្សាសិទ្ធិដោយ៖ លឹម ហុង
