រដ្ឋាភិបាល ជប៉ុន បាន ឯកភាពផ្តល់ថវិកា ចំនួន ៤៨៣,២០៤ ដុល្លារអាមេរិក ដល់អង្គភាពទទួលជំនួយចំនួនប្រាំ ក្រោមគ្រោងការ ណ៍ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណិ)។ កិច្ចសន្យា ផ្តល់ជំនួយ ត្រូវបាន ចុះហត្ថលេខា ដោយ ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញ និងពេញសមត្ថភាពរបស់ ប្រ ទេស ជប៉ុន ប្រចាំព្រះរាជាណាចក្រកម្ពុជា និង អ្នកតំណាងអង្គភាពទទួលជំនួយទាំងប្រាំ។
គម្រោងទី១ គឺផ្តល់ជូនសម្រាប់ការតម្លើងឧបករណ៍កែច្នៃកំប្លោកធ្វើជាជីវអេតាណុលនៅខេត្តកំពង់ឆ្នាំង”
(ថវិកាចំនួន ១៦៩,៧៥០ ដុល្លារអាមេរិក) អង្គភាពទទួលជំនួយ៖ មន្ទីរបរិស្ថាន ខេត្តកំពង់ឆ្នាំងនៅ ក្នុងគម្រោងនេះ ឧបករណ៍កែច្នៃកំប្លោកធ្វើជាជីវអេតាណុល នឹងត្រូវបានតម្លើងនៅមន្ទីរបរិស្ថាន ខេត្តកំពង់ឆ្នាំង។ ឧបករណ៍នេះ អាចកែច្នៃកំប្លោកដែលជារុក្ខជាតិទន្ទ្រានរាតត្បាតដែលគ្មានប្រយោជន៍បំផុត ទៅជាជីវអេតាណុល។ តាម រយៈគម្រោងនេះ យើងនឹងលើកកម្ពស់ការយកចេញកំប្លោកដែលគេមិនត្រូវការ និងធ្វើឲ្យប្រសើរឡើងនូវលទ្ធភាពក្នុងការប្រើប្រាស់បឹងនៅតំបន់នោះ។ គម្រោងនេះនឹងជួយលើកកម្ពស់ជីវភាពរស់នៅរបស់គ្រួសារអ្នកនេសាទក្នុងស្រុក និងការពារប្រព័ន្ធអេកូឡូស៊ីនៅទីនោះ។
គម្រោងទី២ គឺសាងសង់អគារសម្ភពនៅក្នុងមណ្ឌលសុខភាពទួលក្នុងខេត្តមណ្ឌលគិរី”(ថវិកាចំនួន ៨៩,១៣៨ ដុល្លារអាមេរិក) អង្គភាពទទួលជំនួយ៖ មន្ទីរសុខាភិបាលខេត្តមណ្ឌលគិរី នៅក្នុងគម្រោងនេះ អគារសម្ភពមួយកន្លែងនឹងត្រូវសាងសង់នៅមណ្ឌលសុខភាពទួលក្នុងខេត្តមណ្ឌលគីរី។ បច្ចុប្បន្ននេះ ស្ត្រីមានផ្ទៃពោះនៅតំបន់គ្របដណ្តប់ មិនអាចស្នាក់នៅក្នុងមណ្ឌលសុខភាព មុននិងក្រោយពេលសម្រាលបានទេ ដោយសារខ្វះកន្លែងទំនេរ។ គម្រោងនេះនឹងធានាបាននូវបរិស្ថានសម្រាលដែលមានសុវត្ថិភាព និងសមរម្យជាងមុន។ យើងរំពឹងថា ស្ត្រីមានផ្ទៃពោះជាង ១០០ នាក់ នឹងទទួលបានសេវាថែទាំផ្នែកសម្ភពដែលមានភាពល្អប្រសើរ ជារៀងរាល់ឆ្នាំ ។
គម្រោងទី៣ សាងសងអគារផ្នែកជម្ងឺសម្រាកពេទ្យនៅក្នុងមណ្ឌលសុខភាពឆែបក្នុងខេត្តព្រះវិហារ (ថវិកាចំនួន ៨៩,៣៦៩ ដុល្លារអាមេរិក) អង្គភាពទទួលជំនួយ៖ មន្ទីរសុខាភិបាលខេត្តព្រះវិហារ នៅក្នុងគម្រោងនេះ យើងនឹងសាងសង់អគារផ្នែកសម្រាកពេទ្យមួយកន្លែង និងតម្លើងគ្រែចំនួនដប់ នៅក្នុងមណ្ឌលសុខភាពឆែបខេត្តព្រះវិហារ។ កន្លែងស្នាក់នៅសម្រាប់អ្នកជម្ងឺសម្រាកពេទ្យបច្ចុប្បន្ន មិនអាចព្យាបាលអ្នកជម្ងឺសម្រាកពេទ្យឲ្យបានដិតដល់ទេ ដោយសារសភាពទ្រុឌទ្រោម និងសមត្ថភាពមានកំណត់។ តាមរយៈគម្រោងនេះ អ្នកជម្ងឺសម្រាកពេទ្យប្រមាណ ៦០០ នាក់ នឹងទទួលបានសេវាថែទាំដែលមានភាពល្អប្រសើរ ជារៀងរាល់ឆ្នាំ នៅក្នុងទីតាំងគម្រោង។
គម្រោងទី៤ សម្រាប់ការផ្តល់រថយន្តគ្លីនិកចល័តជួយលើការស្តារនីតិសម្បទាតាមសហគមន៍មូលដ្ឋានក្នុងខេត្តសៀមរាប (ថវិកាចំនួន ៤៥,៧៤៥ ដុល្លារអាមេរិក) អង្គភាពទទួលជំនួយ៖ សេហ្វហេវិន នៅក្នុងគម្រោងនេះ រថយន្តគ្លីនិកស្តារនីតិសម្បទាចល័តមួយ នឹងត្រូវបានផ្តល់ជូនដល់អង្គការ សេហ្វហេវិន ដើម្បីពង្រឹងសមត្ថភាពរបស់ពួកគេក្នុងការផ្តល់សេវាស្តារនីតិសម្បទា។ អង្គការនេះ បាននិងកំពុងផ្តល់សេវាស្តារនីតិសម្បទារបស់ពួកគេ ដោយប្រើប្រាស់ម៉ូតូ និងម៉ូតូកង់បីតែប៉ុណ្ណោះ។ យើងរំពឹងថាកុមារពិការប្រមាណ ២៣០ នាក់ នឹងទទួលបានសេវាស្តារនីតិសម្បទាដែលមានគុណភាពប្រសើរជាងមុន។
និងគម្រោងទី៥ គឺសម្រាប់ការបំពាក់បរិក្ខារវិជ្ជសាស្ត្រនៅក្នុងគិលានដ្ឋានមិត្តភាពកម្ពុជា-វៀតណាម ក្នុងខេត្តព្រះសីហនុ” (ថវិកាចំនួន ៨៩,២០២ ដុល្លារអាមេរិក) អង្គភាពទទួលជំនួយ៖ គិលានដ្ឋានមិត្តភាពកម្ពុជា-វៀតណាម នៅក្នុងគម្រោងនេះ យើងនឹងបំពាក់ម៉ាស៊ីនកាំរស្មីអ៊ិច ១គ្រឿង ប្រព័ន្ធថតរូបដោយប្រើវិទ្យុសកម្ម ១គ្រឿង ម៉ាស៊ីនអ៊ុលត្រាសោន ១គ្រឿង និងម៉ាស៊ីនតាមដានអ្នកជម្ងឺ ១គ្រឿង នៅក្នុងគិលានដ្ឋានមិត្តភាពកម្ពុជា-វៀតណាម ក្នុងខេត្តព្រះសីហនុ។
បច្ចុប្បន្ន គិលានដ្ឋាននេះ មិនមានឧបករណ៍វេជ្ជសាស្ត្រគ្រប់គ្រាន់សម្រាប់ធ្វើរោគវិនិច្ឆ័យ និងព្យាបាលអ្នកជម្ងឺរបស់ពួកគេទេ។ តាមរយៈគម្រោងនេះ អ្នកជម្ងឺមិនសម្រាកពេទ្យប្រមាណ ១,៤០០ នាក់ និងអ្នកជម្ងឺសម្រាកពេទ្យចំនួន ៧០០ នាក់ ទាំងមនុស្សពេញវ័យ និងកុមារ នឹងទទួលបានសេវាវេជ្ជសាស្ត្រដែលមានភាពល្អប្រសើរ ជារៀងរាល់ឆ្នាំ។
ជំនួយទាំងនេះ គឺផ្អែកលើការប្តេជ្ញាចិត្តនៅក្នុងសេចក្តីថ្លែងការណ៍របស់សហប្រធាននៃកិច្ចប្រជុំរដ្ឋមន្ត្រីការបរទេស មេគង្គ-ជប៉ុន លើកទី១៣ នៅថ្ងៃទី៩ ខែកក្កដា ឆ្នាំ២០២០ ដែលបានថ្លែងថា “ការអនុវត្តជំនួយឥតសំណង សម្រាប់គម្រោងទ្រង់ទ្រាយតូចសន្តិសុខមនុស្សជាតិឆ្នាំ២០២០ ក្រោមគំនិតផ្តួចផ្តើមគូសាណូណិមេគង្គសម្រាប់គោលដៅអភិវឌ្ឍន៍ប្រកប ដោយចីរភាព ដែលមានទឹកប្រាក់សរុបប្រមាណ ៩១ លានដុល្លារអាមេរិក មានគោលបំណងគាំទ្រដល់ការអភិវឌ្ឍសេដ្ឋកិច្ច និងសង្គមកិច្ច នៅតាមភូមិស្រុកថ្នាក់មូលដ្ឋានទូទាំងតំបន់មេគង្គ”។
ជំនួយឥតសំណងគូសាណូណិ របស់ជប៉ុន បានចាប់ផ្តើមនៅប្រទេសកម្ពុជានៅឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញ នៅតាមកម្រិតមូលដ្ឋាន។ ជំនួយនេះ មានទិសដៅការពារជនងាយរងគ្រោះពីកត្តាមួយចំនួនដូចជា ភាពក្រីក្រ និង/ឬ ភាពអកុសលនានា ដែលអាចគម្រាមកំហែងដោយផ្ទាល់ដល់អាយុជីវិត ជីវភាពរស់នៅ និង សេចក្តីថ្លៃថ្នូររបស់ពួកគេ ក៏ដូចជាជួយជម្រុញនូវភាពម្ចាស់ការលើខ្លួនឯងរបស់ប្រជាសហគមន៍។ ចាប់តាំងពីឆ្នាំ១៩៩១ រដ្ឋាភិបាលជប៉ុន បានផ្តល់ថវិកាជាង ៦៣លាន ដុល្លារអាមេរិក ដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តគម្រោងគូសាណូណិចំនួន ៦៤៧ គម្រោងនៅទូទាំងប្រទេសកម្ពុជា៕ រក្សាសិទ្ធិដោយ ៖ CEN
