សូមរំលឹកឡើងវិញបន្តិចផងដែរថា កាលពីយប់ម៉ោង ៨ ថ្ងៃទី១៥ ខែមីនា ឆ្នាំ២០២១ មហានពិតមានការតក់ស្លុតជាខ្លាំង និងស្ទើរតែមិនគួរឲ្យជឿសោះឡើយ ក្រោយឃើញអ្នកស្រី ដេត ម៉ាលីណា ដាច់ចិត្តទំលាយវីដេអូមួយបង្ហាញពីសកម្មភាពអតីតស្វាមី ឌួង ឆាយ បានប្រើអំពើហិង្សាមកលើខ្លួនទាំងកំរោលៗ ដែលពោរពេញដោយភាពឆេវឆាវខ្លាំងៗ កាលពីពេលកន្លងទៅ។
បើទោះជាលោក ឌួង ឆាយ ខំព្យាយាមបកស្រាយហេតុផល និងក៏ដូចទទួលស្គាល់ថាខ្លួនខុសធ្ងន់ ពីទង្វើរហិង្សាមកលើអតីតភរិយាយ៉ាងណា ក៏អ្វីៗបានហួសពេលបាត់ទៅហើយ ព្រោះថា សកម្មភាពអំពើហិង្សាទាំងនោះគឺមើលទៅដូចជាសាហាវៗណាស់ ដែលមហាជនពុំអាចទទួលយកបានឡើយ ហើយកាលពីថ្ងៃទី១៧ ខែមីនា ឆ្នាំ២០២១ សម្តេចតេជោ ហ៊ុន សែន ក៏បានសម្រេចបញ្ចប់គោរមងារជា «ឧកញ៉ា » ពីឧកញ៉ា ឌួង ឆាយ។
តែអ្វីដែលគួរឲ្យស្រណោះខ្លាំងនោះ គឺកូនៗរបស់អ្នកទាំងពីរ ដែលធ្លាប់តែទទួលបានភាពកក់ក្តៅពីឪពុកម្តាយរស់នៅជួបជុំគ្នា ពោរពេញដោយសុភមង្គល និងក្តីរីករាយបំផុតនោះ គឺអាចចាប់ពីពេលនេះតទៅ នឹងគ្មានភាពកក់ក្តៅដូចមុនទៀតឡើយ។
យ៉ាងណាមិញ ទន្ទឹមនឹងភ្លើងកំដៅនៃបែកបាក់គ្នារវាងប្តីប្រពន្ធ ឌួង ឆាយ និង ដេត ម៉ាលីណា កំពុងផ្ទុះឡើងរយពាន់អង្សារ គេក៏ស្រាប់តែឃើញគ្រូទាយរូបស្រស់ សាច់សខ្ចី រហ្សនាម «ចៅម៉ែ» ដែលធ្លាប់ទស្សន៍ទាយថា អ្នកទាំងពីរទោះជាបែបណា ក៏មិនអាចបែកគ្នាដាច់ខាត ព្រោះតែចំណងកូនស្រីពៅរបស់អ្នកទាំពីរ នៅពេលនេះ បានចេញមុខប្រកាន់ជំហរដដែលថា អ្នកទាំងពីរគឺមិនបែកគ្នាឡើយ បើមិនជឿចាំមើលចុះ។
ក្នុងនោះយោងតាមផេកហ្វេសប៊ុក ចៅម៉ែ ផ្ទាល់ បានសរសេររៀបរាប់យ៉ាងដូច្នេះថា៖ «មិនមែនចង់ចេះដឹងរឿងអ្នកណាឡើយក្នុងនាមជាមិត្តម្នាក់ដែលស្រលាញ់អ្នកទាំងពីរចេញពីបេះដូងរបស់ចៅម៉ែ សំរាប់ចៅម៉ែទាយអោយអ្នកទាំងពីរនឹងបានជួបជុំគ្នាវិញ បើមិនជឿក៏ចាំមើលទៅ កុំប្រញាប់កាត់ក្តីថាគាត់មិនអាចជួបគ្នាវិញ មានមិត្តយើងមួយចំនួនចូលចិត្តសាងបាបម្តងហើយម្តងទៀត ចង់ឃើញតែអ្នកដ៏ទៃវិនាស តែសំរាប់វិមានរចនាជាមិត្តម្នាក់ចង់ឃើញអ្នកទាំងពីរជួបជុំគ្នាវិញ ក្រោយភ្លៀងមេឃស្រលះ គ្រប់យ៉ាងវាមានពេលរបស់វា។
ចៅម៉ែជូនពរអោយអ្នកទាំងពីរបានជួបគ្នាវិញហើយសាងគ្រួសារដោយភាពសុខសាន្តបំផុត គ្រប់យ៉ាងបណ្តោយទៅតាមពេលវេលាមានតែពេលវេលាទេដែលអាចបញ្ជក់គ្រប់យ៉ាង។
ចៅម៉ែនៅតែជឿថាអ្នកទាំងពីរនឹងជួបគ្នាវិញ (អ្នកទាំងពីរមិនអាចបែកគ្នាទេ អ្នកទាំងពីរជាគូរនឹងគ្នាគឺជាគូរបុណ្យនឹងគ្នា) នេះជាព្រហ្មលិខិតដែលមិនអាចកែប្រែបាន។
ចៅម៉ែមិនដែលបង្ខំអោយអ្នកណាជឿទេ ជឿឬជឿសំរេចដោយខ្លួនឯង ដោយក្តីស្រលាញ់ ចៅម៉ែរចនា 16/03/2021»។
ក្រោយឃើញ ចៅម៉ែ លើកឡើងបែបនេះ ក៏មានបងប្អូនអ្នកលេងបណ្តាញសង្គមជាច្រើន បាននាំគ្នារួមបញ្ចេញមតិថា៖ «បើសិនបានដូចមាត់ចៅម៉ែមែននោះ សូមជួយត្រេកអរចំពោះគាត់ទាំងពីរផងចៅម៉ែ ព្រោះខ្ញុំអាណិតក្មេងៗណាស់, ពិតណាស់ចៅម៉ែ ចង្កៀងផ្ទះអ្នកណាភ្លឺផ្ទះអ្នកហ្នឹង យើងអ្នកក្រៅមិនដឹងរឿងរបស់គេច្បាស់ មិនបាច់និយាយទេ ហើយរឿងដែលពួកគាត់ប្រតាយប្រតប់គ្នា បើគ្មានភ្លើងក៏គ្មានផ្សែងដែរ ខ្ញុំក៏មិនកាន់ជើងមនុស្សប្រុសធ្វើខុសវាយធ្វើបាបលើមនុស្សស្រីនោះឡើយ វាជាអំពើដ៏ថោកទាបបំផុតសម្រាប់មនុស្សប្រុសណា ដែលលើកដៃវ៉ៃមនុស្សស្រី ក៍ប៉ុន្តែ យើងជាអ្នកក្រៅ មិនដឹងរឿងគ្រួសាររបស់គេច្បាស់ ហេតុនេះរឿងគ្រួសារគេ គេចេះចង គេចេះស្រាយ…»៕ រក្សាសិទ្ធិដោយ៖ លឹម ហុង
