ភ្នំពេញ៖ មន្ដ្រីជាន់ខ្ពស់នៃក្រសួងសេដ្ឋកិច្ច និងហរិញ្ញវត្ថុ បានប្រាប់អ្នកសារព័ត៌មាន ថា ការប្រមូល ចំណូលពន្ធលើវិស័យកាស៊ីណូ ក្នុងឆ្នាំ២០២០ សម្រេចបានថវិកា ៤០ លានដុល្លារអាមេរិក ធ្លាក់ចុះជាង៥០% បើប្រៀបធៀបរយៈពេលដូចគ្នា នឹងឆ្នាំ២០១៩ ដែលសម្រេចបាន ៨៥ លានដុល្លារអាមេរិក។
លោក រស់ ភិរុណ អគ្គនាយរងនៃអគ្គនាយកដ្ឋានឧស្សាហកម្ម នៃក្រសួងសេដ្ឋកិច្ច និងហរិញ្ញវត្ថុ បានបញ្ជាក់ថា ការធ្លាក់ចុះនៃការប្រមូលចំណូលពន្ធ លើវិស័យកាស៊ីណូឆ្នាំ២០២០នេះ ដោយសារតែការផ្ទុះឡើងនៃជំងឺកូវីដ១៩ ជាសាកល ដែលបង្កផលប៉ះពាល់លើវិស័យនានា ក្នុងនោះបានប៉ះពាល់ដល់ប្រតិបត្តិការរបស់វិស័យកាស៊ីណូ។
លោក បានបន្ថែមថា ក្នុងឆ្នាំ២០២១នេះ នៅមិនទាន់មានសញ្ញាណា អាចប្រមូលចំណូលបានពីវិស័យ កាស៊ីណូនេះឡើងវិញឡើយ ព្រោះជំងឺកូវីដ១៩ កំពុង និងបន្តរាតត្បាតនៅឡើយ ដែលបណ្តាលឲ្យអាជីវកម្មកាស៊ីណូ មិនអាចដំណើរការបាន។ ក្នុងឆ្នាំ២០២០កន្លងទៅ រាជរដ្ឋាភិបាល បានសម្រេចផ្អាកការប្រតិបត្តិការរបស់វិស័យកាស៊ីណូ ដោយ សារបញ្ហានៃជំងឺកូវីដ១៩។ ការផ្អាកដំណើរការនេះ សម្រេច នៅដើមខែមេសា ឆ្នាំ២០២០ ហើយនៅក្នុងអំឡុងខែសីហា និងខែកញ្ញា ត្រូវនឹងត្រីមាសទី៤ មានការស៊ីណូមួយចំនួនតូច បានដំណើរការឡើងវិញ ហើយឆ្នាំ២០២១នេះ ក៏មានការបិទ និងបើកយ៉ាងរដាក់រដុបដែរ។
បើយោងតាមមន្ត្រីរដ្ឋាភិបាល បានបញ្ជាក់ថា រហូតមកដល់ពេលនេះ មិនទាន់មានកាស៊ីណូណាមួយ ស្នើបើកអាជីវកម្មវិញនៅឡើយទេ ក្នុងនោះក្រុមហ៊ុនណាហ្គាលវើលដែលផ្តោតលើអាជីវកម្មកាស៊ីណូ បានស្នើបិទដំណើរការអាជីវកម្មទាំងស្រុង ដោយសារតែការផ្ទុះឡើងនៃជំងឺកូវីដ១៩ នៃព្រឹត្តិការណ៍សហគម ២០ កុម្ភៈមិនទាន់ចប់៕
រក្សាសិទ្ធិដោយ៖CEN
