កាលពីពេលថ្មីៗកន្លងទៅនេះ មហាជននៅក្នុងបណ្តាញសង្គម ពិតជាមានការស្លុតរន្ធត់ជាខ្លាំង ចំពោះវីដេអូមួយដែលបង្ហាញពីសកម្មភាពព្រះសង្ឃមួយអង្គ បានដាក់ទណ្ឌកម្មទៅលើសាមណេរ២អង្ក តាមរយៈការវាយនឹងរំពាត់ផ្តៅដែលមើលទៅហាក់ដូចជាព្រៃផ្សៃខ្លាំងណាស់ ព្រោះថាក្នុងនោះលោកនេនមួយអង្គត្រូវរងរំពាត់ផ្តៅពេញៗទំហឹងបើរាប់ទៅគឺរហូតដល់ ៥០ ផ្តៅ ឯណោះ។
ក្រោយពីបានឃើញបែបនេះ ឃើញថាមានមហាជនជាច្រើនបានផ្ទុះការិះគន់យ៉ាងខ្លាំងតែម្តង ចំពោះសកម្មភាពនៃការដាក់វិន័យ អប់រំបែបឃោរឃៅ ពីសំណាក់ព្រះសង្ឃនៅវត្តរាជបូណ៌ ស្ថិតក្នុងសង្កាត់សាលាកំរើក ក្រុង-ខេត្តសៀមរាប។ ក្នុងនោះផងដែរ លោក ផែង វណ្ណៈ ព្រោះតែឃើញរូបភាពនេះសាហាវខ្លាំងពេក មិនអាចទទួលយកបាន លោកក៏បានដាក់ធ្ងន់ៗលែងស្គាល់បាបបុណ្យថា «ហ្នឹងវ៉ៃប៉ះចំកូនគេទេ បើប៉ះចំកូនខ្ញុំវិញ ទោះជាប់គុកជាប់ទៅ ខ្ញុំលេងវិញហើយ ខ្ញុំអត់យកទៅប្តឹងផ្តល់អីទេ និយាយស្មោះត្រង់ បើវ៉ៃកូនខ្ញុំដោយរបៀបអ៊ីចឹង ខ្ញុំអត់វ៉ៃវិញទេ ខ្ញុំទៅបាញ់ចោលហ្មង និយាយត្រង់ហ្មង អនុវត្តច្បាប់ទេ ទៅកាប់ចោលហ្មងទៅ….»។
តែទោះយ៉ាងណា ក្រោយករណីនេះបានផ្ទុះឡើង សមត្ថកិច្ចនៃស្នងការដ្ឋាននគរបាលខេត្តសៀមរាប ក៏បានចុះកិច្ចសន្យាអប់រំ ណែនាំទៅដល់ព្រះគ្រូព្រះនាម ពិន សែម ចៅអធិការវត្តរាជបូណ៌ ឲ្យបញ្ឈប់ប្រព្រឹត្តអំពើហិង្សាលើភិក្ខុ និងសាមណេរ ចាប់ពីថ្ងៃនេះតទៅ។
សមត្ថកិច្ចបានឲ្យដឹងថា ករណីខាងលើនេះ គឺកើតចេញអំពីការអនុវត្តវិន័យលើភិក្ខុ និងសាមណេរមួយចំនួនដែលល្មើសវិន័យ។ ហើយសម្រាប់ការដាក់វិន័យដ៏ធ្ងន់ៗនេះផងដែរ បើតាមការបំភ្លឺរបស់ភិក្ខុ និងសាមណេរមួយចំនួន បានបញ្ជាក់ឲ្យដឹងថា ការដាក់វិន័យពីសំណាក់ព្រះគ្រូចៅអធិការវត្ត គឺពិតប្រាកដមែន ព្រោះតែលោកនេនទាំងនោះបានល្មើសនឹងវិន័យផ្ទៃក្នុងរបស់វត្ត ដូចជាការគេចវេសចូលរៀន ខ្ជិលច្រអូសធ្វើការងារក្នុងវត្ត មិនចូលរួមធ្វើអនាម័យ ចេញក្រៅវត្តរហេតរហូតគ្មានវិន័យ។ ភិក្ខុ និងសាមណេរទាំងនោះទទួលការដាក់វិន័យខ្លះទទួលពិន័យ ពីរ ទៅបីដង ដោយត្រូវរំពាត់ផ្ដៅចាប់ពី ១ រំពាត់ ដល់ ១០០ រំពាត់។
តែយ៉ាងណា ក្រោយរឿងនេះបានស្ងប់ស្ងាត់ទៅហើយ ស្រាប់តែមហាជនមួយចំនួនធំ បានផ្ទុះប្រតិកម្មទៅកាន់លោក ផែង វណ្ណៈ វិញខ្លាំងៗ ខណៈបានឃើញខមិនមួយដែលលោកបានប្រើប្រាស់សម្តីធ្ងន់ៗបន្ថែមទៀត ទៅកាន់ចៅអធិការវត្តរាជបូណ៌ លោកតា ពិន សែម បែបនេះថា៖ «បានចៅអធិការវត្តអប់រំបែបនេះ បានបុណ្យណាស់ តែបើវាយកូនខ្ញុំដឹងតែក្បាលដល់ដីហើយ សុខចិត្តជាប់គុក»។
ក្នុងនោះ បើតាមផេកហ្វេសប៊ុក ព្រះគ្រូសង្ឃបាលមុនី លី សុថៃ-Ly Sothai បានភ្ជាប់រូបស្គ្រីនសតសម្តីខាងលើរបស់លោក ផែង វណ្ណៈ ដោយអមជាមួយសំណេរតាក់តែងជាកំណាព្យធ្ងន់ៗថា៖ «វាចា ពូ វណ្ណៈ ផែង ជេរហុយផ្សែង គ្មានក្រែងបាប សម្ដីសែនឆ្អេះ ហើយសែនឆ្អាប ប្រយ័ត្នដេកស្ងាប ស៊ីបាយក្រហម ។»។ ក្រោយឃើញព្រះសង្ឃខាងលើដាក់បែបនេះ ក៏មានមនុស្សជាច្រើន នាំគ្នាជាន់បន្ថែមថា៖ «ហេតុតែមានមិត្តភក្តិក្នុងគុកច្រើន និយាយម៉ាត់ណាក៏គុក, បើ ផេង វណ្ណៈ មានកូនទៅបួសប្រហែល លោកមិនទទួលទេ ក្រែងចរិតចេញមកដូចឪ។ តែបើចង់ទៅវាយលោកមែន ប្រហែលជាមិនបានចូលដល់កុដិលោកផង បែកក្បាលមុនបាន វាយលោកតាំងពីនៅក្លោងទ្វារវត្តម្ល៉េះ, សម្តីឈ្លើយដូចក្មេងបាតផ្សារ, ក្បាលដល់ដី? ពាក្យនេះអាចជាប់គុកបាន…..។ និងមានមតិរិះគន់ជាច្រើនទៀតរាប់មិនអស់»៕រក្សាសិទ្ធិដោយ៖លឹម ហុង
