ដូចដែលយើងគ្រប់គ្នាបានទទួលជ្រាបហើយថា ចាប់តាំងពីផ្ទុះកូវីដ១៩ បង្កើតជាព្រឹត្តិការណ៍ ២០ កុម្ភៈ មក ឃើញថា មកទល់នឹងពេលនេះ ជំងឹឆ្លងដ៏កាចសាហាវនេះពុំទាន់ថមថយនៅឡើយទេ និងផ្ទុយទៅវិញគឺពីមួយថ្ងៃទៅមួយថ្ងៃ កាន់តែរកឃើញមុខសញ្ញាថ្មី កើតទីកន្លែងថ្មី ស្ទើរតែទូទាំងប្រទេសទៅហើយ។
ជាក់ស្តែង ម្ចាស់ហាងមួយឈ្មោះ ម៉ូដស្ទ័រ (modestore) នៅមុននេះបន្តិច នាថ្ងៃទី១៨ ខែមីនា ឆ្នាំ២០២១ នេះ ព្រោះតែក្នុងបំណងល្អ និងជាការឆ្លើយតបទៅនឹងបងប្អូនដែលបានសួរនាំថាតើបុគ្គលិកខ្លួនណាខ្លះដែលឆ្លងកូវី១៩ ព្រោះបារម្ភខ្លាចប៉ះពាល់ គាត់ក៏បានបញ្ចេញមុខមាត់បុគ្គលិករបស់គាត់២នាក់ ដែលបានឆ្លងកូវីដឲ្យបានឃើញហើយ។
នេះបើយោងតាមផេកហ្វេសប៊ុកម្ចាស់ហាងខាងលើ បានបង្ហោះឲ្យដឹងថា៖ «ប្រកាសព័ត៌មាន ! នេះជារូបបុគ្គលិកពីរនាក់ដែលមាន វិជ្ជមានកូវីដ១៩ (ហាងយើងខ្ញុំបានសុំការអនុញ្ញាតពីពួកគាត់រួចហើយ ដើម្បីផុស) ដោយសារមានអតិថិជនជាច្រើនបានសួរថាតើជាអ្នកណាជាអ្នកមានវិជ្ជមាន កូវិដ១៩ ព្រោះបារម្ភថាបានប៉ះពាល់ផ្ទាល់ជាមួយគាត់។
បន្ថែមពីនេះទៀត នាងខ្ញុំ និងស្វាមី រួមទាំងសហការីទាំងអស់បានធ្វើតេស្តរកមេរោគ កូវីដ១៩ កាលពីម្សិលមិញរួចហើយ។ ពេលនេះពួកយើងទាំង ៤៥នាក់ កំពុងធ្វើចត្តាឡីស័ករយៈពេល ១៤ថ្ងៃដោយឡែកពីគ្នា ហើយនឹងកំពុងរង់ចាំទទួលលទ្ធផល។
ចំពោះនាងខ្ញុំ ធីតា ខ្ញុំមិនទាន់មានអ្វីធ្ងន់ធ្ងរទេ គ្រាន់តែឈឺករតិចតួច និងឈឺក្បាលតិចៗ សូមអរគុណពុកម៉ែបងប្អូនមិត្តភក្កិទាំងអស់ដែលបានសួរសុខទុក្ខ និងបារម្ភ។
យើងខ្ញុំសូមបួងសួង សុំឲ្យពលរដ្ឋខ្មែរគ្រប់រូបចាកចៀសផុតពីរោគដ៏ចង្រៃនេះ។ វាពិតជាគួរឲ្យខ្លាចណាស់! ទោះបីជាយើងខ្ញុំខិតខំបង្ការយ៉ាងមុតមាំហើយក៏ដោយ ក៏នៅតែប្រឈមដដែល។ ជាក់ស្តែងហាងយើងខ្ញុំបានបិទមិនទទួលភ្ញៀវ (walk in guests) តាំងតែពីថ្ងៃទី ១១ មីនា ២០២១ មកម្លេះ ហើយលក់តែ online ប៉ុណ្ណោះ តែជាអកុសល សហការីពីររូបរបស់យើងខាងគណនេយ្យ និងគ្រប់គ្រងស្តុកមានវិជ្ជមាន កូវីដ១៩។
កូវីដ១៩ ពិត ជាសត្រូវលាក់មុខ ហើយកាចសាហាវណាស់ ដូច្នេះសូមអស់លោកអ្នកមេត្តាគោរពឲ្យបានខ្ជាប់ខ្ជួន នូវរាល់ការណែនាំរបស់ ប្រមុខរាជរដ្ឋាភិបាល និងក្រសួងសុខាភិបាល។ សូមអរគុណ៕»៕ រក្សាសិទ្ធិដោយ៖ លឹម ហុង
