ភ្នំពេញ ÷ មន្ត្រីយោធាម្នាក់ស្រវឹងធ្លាក់ភ្នែកបានបើករថយន្តម៉ាកឡង់គ្រីស័រ ក្នុងល្បឿនលឿនខ្វះការប្រុងប្រយ័ត្នបានរេចង្កូតទៅបុកពីក្រោយរុឺម៉កដឹកអេតចាយពេញទំហឹងអូសទៅមុខជាច្រើនម៉ែត្របណ្តាលឲ្យរុឺជ្រុលទៅបុកចូលផ្ទះប្រជាពលរដ្ឋរងការខូចខាតសម្ភារមួយចំនួន សំណាងល្អមិនមានគ្រោះថ្នាក់ដល់មនុស្ស។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង ០០និង ១៥ នាទីយប់ឈានចូលថ្ងៃសុក្រទី១៩ ខែមីនា ឆ្នាំ២០២១ ចំណុចជាប់ផ្លូវរថភ្លើង ស្ថិតនៅតាមបណ្ដោយផ្លូវភ្នំពេញហាណូយ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
ប្រភពព័ត៌មានពីម្ចាស់ផ្ទះជាជនរងគ្រោះបានរៀបរាប់ឲ្យដឹងថា មុនពេលកើតហេតុគាត់បានឃើញបុរសម្នាក់ជិះម៉ូតូសណ្តោងរុឺម៉កមួយគ្រឿងដឹកអេតចាយមិនមានផ្លាកលេខធ្វើដំណើរតាមបណ្តោយផ្លូវភ្នំពេញហាណូយក្នុងទិសដៅពីជើងមកត្បូង រួចក៏បានឈប់រុឺម៉កចតចោលនៅលើចិញ្ចើមផ្លូវឈប់ចូលទៅទិញស្វាយហូប ស្រាប់តែភ្លាមៗនោះដែរគាត់ឃើញរថយន្តឡង់គ្រីស័រ មួយគ្រឿងទៀតពណ៌សំបកឪឡឹកពាក់ផ្លាកលេខ ព្រះសីហនុ2-A 3099 បើកបរដោយបុរសម្នាក់ស្រវឹងធ្លាក់ភ្នែកក្នុងល្បឿនលឿនបានរេចង្កូតទៅបុកពីក្រោយរុឺម៉កពេញទំហឹងអូសទៅមុខជាច្រើនម៉ែត្របណ្តាលឲ្យរុឺម៉កដឹកអេតចាយបន្តទៅបុកចូលផ្ទះប្រជាពលរដ្ឋរងការខូចខាតទូកញ្ចក់និងសម្ភារមួយចំនួនទៀត ។
សំណាងល្អម្ចាស់រុឺម៉កនិងម្ចាស់ផ្ទះមិនមានរងរបួសនោះទេរងការខូចខាតសម្ភារមួយចំនួននិងរថយន្តបង្កតែប៉ុណ្ណោះ។
ក្រោយពេលកើតហេតុសមត្ថកិច្ចមូលដ្ឋានចុះទៅដល់រួចឲ្យភាគីទាំងសងខាងនិយាយគ្នា ដោយភាគីខាងរថយន្តបង្កមិនចង់វែងឆ្ងាយក៏សងជាសំណងទាំងរុឺម៉ក និងខាងម្ចាស់ផ្ទះបញ្ចប់រឿងនៅកន្លែងកើតហេតុ៕
រក្សាសិទ្ធិដោយ៖ សា មេត
