ភ្នំពេញ ÷ រថយន្តកាមរីបាឡែនមួយគ្រឿងបើកបរក្នុងល្បឿនលឿនខ្វះការប្រុងប្រយ័ត្នបានរេចង្កូតទៅប៉ះរបាំងថ្មពុះចែកទ្រូងផ្លូវបណ្តាលឲ្យរងការខូចខាតមិនព្រមឈប់ដោះស្រាយបន្តបើករត់ទៅមុខតែត្រូវសមត្ថកិច្ចតាមឃាត់បានវិញទាំងម្ចាស់និងរថយន្តបង្ក។
ហេតុការណ៍គ្រោះថ្នាក់ចរាចរណ៍នេះដែរកើតឡើងនៅវេលាម៉ោង១ និង ៣០នាទីយប់ឈានចូលថ្ងៃសុក្រទី១៩ខែមីនា ឆ្នាំ ២០២១ ស្ថិតនៅតាមបណ្តោយផ្លូវជាតិលេខ២ សង្កាត់ចាក់ អង្រែក្រោម ខណ្ឌមានជ័យ រាជធានីភ្នំពេញ។
បើយោងតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តកាមរីបានឡែនពណ៌ស្ករមួយគ្រឿងពាក់ផ្លាកលេខ ភ្នំពេញ 2-AB 3817 ធ្វើដំណើរតាមបណ្តោយផ្លូវជាតិលេខ២ក្នុងទិសដៅពីជើងមកត្បូងក្នុងល្បឿនលឿនមិនប្រយ័ត្នបានរេចង្កូតទៅប៉ះរបាំងថ្មពុះចែកទ្រូងផ្លូវរងការខូចខាត មិនព្រមឈប់ដោះស្រាយរួចបន្តបើករត់ទៅមុខតែត្រូវសមត្ថកិច្ច ឃាត់បានវិញ។ សំណាងល្អមិនមានគ្រោះថ្នាក់ទៅដល់មនុស្សរងការខូចខាតតែទ្រព្យសម្បត្តិរដ្ឋ និងរថយន្ត។
ក្រោយពេលកើតហេតុសមត្ថកិច្ចមូលដ្ឋានចុះមកដល់ឡើងលើរថយន្តយកទៅរក្សាទុកនៅអធិការដ្ឋានខណ្ឌមានជ័យ រង់ចាំដោះស្រាយនៅពេលក្រោយ៕
រក្សាសិទ្ធិដោយ ៖ សា មេត
