ដូចដែលយើងគ្រប់គ្នាបានដឹងស្រាប់ហើយ បច្ចុប្បន្ននេះ បញ្ហាជំងឺកូវីដ១៩ គឺជាវិបត្តិដ៏ធំមួយសម្រាប់ប្រទេសកម្ពុជារបស់យើង ខណៈដែលជំងឺឆ្លងដ៏កាចសាហាវនេះ ពីមួយថ្ងៃទៅមួយ កាន់តែកើនឡើង និងបន្តរីករាលដាលស្ទើរតែទូទាំងប្រទេសទៅហើយ ដែលជាហេតុធ្វើឲ្យជីវភាពរស់នៅរបស់បងប្អូនប្រជាពលរដ្ឋទូទៅ កំពុងមានការលំបាកជាខ្លាំង ព្រោះថាការរកស៊ីគ្រប់ផ្នែកសឹងតែគាំងគ្រប់ៗគ្នា។
យ៉ាងណាមិញ ទន្ទឹមនឹងស្ថានការណ៍នេះកំពុងតែលំបាក ម្នាក់ៗសឹងតែគ្មានចំណូល តែបើក្រឡេកមកមើលពីតម្លៃទំនិញប្រេងសាំង វិញ បែរកើនឡើង និងជាពិសេសគឺធានាគារតែម្តង ដែលជាបញ្ហាដ៏ប្រឈមមុខខ្លាំងបំផុត សម្រាប់បងប្អូនប្រជាពលរដ្ឋជាកូនបំណុល។ ជាការពិតណាស់ ប្រជាពលរដ្ឋភាគច្រើន តែងឮរអ៊ូរទាំពីរឿងបង់ធនគារ ដោយពួកគាត់បានលើកឡើងថា អ្នកជំពាក់ធនាគារ ចុះបើអ្នកខ្លះយ៉ាងតិចត្រឹមតែ ២០០ ទៅ ៣០០ ដុល្លារ ក្នុង១ខែ តើរកលុយឯណាបានមកបង់ទៅ មិនងាប់ហើយ បើស្ថានភាពសេដ្ឋកិច្ចម្នាក់ៗធ្លាក់ចុះយ៉ាងនេះ។
ដោយមើលឃើញពីការលំបាកសឹងតែគ្រប់ៗគ្នា អំពីបញ្ហាដូចបានលើកឡើងខាងលើ គេក៏បានឃើញតារាៗជាច្រើន បានបង្ហោះសារក្នុងបណ្តាញសង្គមហ្វេសប៊ុកដូចៗគ្នា ក្នុងគោលបំណងលើកជាសំណូមពរស្នើទៅកាន់ប្រមុខថ្នាក់ដឹកនាំសម្តេចតេជោ ចំនួន៤ចំណុច ដើម្បីជាដំណោះស្រាយក្នុងសម័យនៃការរីករាលដាលជំងឺកូវី១៩ ដែលកំពុងឆ្លងនៅក្នុងសហគមន៍។
សារដែលពួកគេបានបង្ហោះនោះ គឺបានលើកឡើងយ៉ាងដូច្នេះថា៖ «ក្នុងនាមខ្ញុំជាប្រជាពលរដ្ឋខ្មែរ ដែលរស់នៅក្រោមការដឹកនាំ សម្តេចតេជោរ សូមគោរព ឧត្តមភាពដ៏ថ្លៃថ្លារបស់សម្តេច គោលនយោបាយឈ្នះៗ ដោយក្នុងនាមខ្ញុំជាប្រជាពលរដ្ឋ សុំធ្វេីការស្នេីរសុំដល់សម្តេចពុក៤ចំណុច! កម្មវត្ថុសេចក្តីផ្តេីម៖ ដោយប្រជាពលរដ្ឋកំពុងតែប្រឈមមុខកូវិដ១៩ ដូចសម្តេចពុកបានជ្រៀប និងសូមអនុញ្ញាតរៀបរាប់ជូនស្នេីរសុំ៤ចំណុចដោយអនុគ្រោះដល់ប្រជាពលរដ្ឋទូរទាំងប្រទេសផងទាន! សុំសម្តេចពុកមេត្តាជួយដោះស្រាយ នឹងសម្រួលពីបញ្ហាទុក្ខធុរៈ ទុក្ខសោករបស់ប្រជាពលរដ្ឋ ក្នុងស្ថានការនេះ។
ទី១ សូមមេត្តាជួយដោះស្រាយបញ្ហាសាំងឡេីងថ្លៃ សម្រួលអោយចុះថោក ធូរថ្លៃសមរម្យ ក្នុងស្ថានភាព សេដ្ឋកិចជីវភាពប្រជាពលរដ្ឋសម័យកូវិតធ្លាក់ចុះ!។
ទី២ សូមមេត្តាធ្វើសេចក្តីប្រកាស សម្រួលជា១ម្ចាស់ផ្ទះជួល ម្ចាស់កន្លែងជួលបើករកសុី ចុះតម្លៃថ្លៃបន្ទប់ ឬផ្ទះល្វែង អោយសល់ត្រឹមតែពាក់កណ្តាល១រយៈពេល(ពេលស្ថានភាពប្រសើរវិញនឹងគិតតម្លៃដើម)។
ទី៣ សូមសម្រួលជា១ធនាគារហិរញ្ញវត្ថុគ្រប់ស្ថាប័នរដ្ឋនឹងឯកជន ចំពោះប្រជាពលរដ្ឋនៃប្រាក់កម្ចី ធ្វេីការផ្អាកបង់ ១រយៈពេល(ពេលស្ថានភាពល្អឡើងវិញ ពួកក្មួយៗនឹងបង់ជាធម្មតា)។
ទី៤ សូមជួយសម្រួលជាមួយនឹង វារីអគ្គិសនីកម្ពុជានិង រដ្ឋាករទឹក សម្រួលអោយចុះថោកបន្តិច ដេីម្បីជួយសម្រួលជីវភាពប្រជាពលរដ្ឋ ដោយអនុគ្រោះផងសម្តេចពុក។
សូមគោរពជូនពរដល់សម្តេចពុកមានសុខភាពល្អ កំលាំងមាំមួនជាម្លប់ដល់កូនចៅ ប្រជាពលរដ្ឋកម្ពុជាគ្រប់ៗគ្នា»៕
រក្សាសិទ្ធិដោយ៖ លឹម ហុង
