កំពត ៖ កាលពីថ្ងៃទី១៤ និង១៥ ខែមីនា កន្លងទៅថ្មីៗនេះ មានការប៉ះទង្គិចគ្នាលក្ខណៈទ្រង់ទ្រាយធំ មួយប្រ៉ាវ រវៀងក្រុមឆ្មាំការពារដីឲ្យក្រុមហ៊ុនក្រុមហ៊ុន វើលដ៍ទ្រីស្តារ អ៉ិនធើថិនមេនរបស់លោក ឧកញ៉ា សូ ងួន ជាមួយនឹងក្រុមគ្រួសារកងទ័ពសមាហរណកម្មការពារកោះឆ្នេររាប់រយននាក់នៅ ទីតាំងដីទំនាស់ស្ថិតក្នុងភូមិដុំផ្ដៅ ឃុំត្រពាំងភ្លាំង ស្រុកឈូក ខេត្តកំពត ។
នៅថ្ងៃពុធ ទី១៧ ខែមីនា ឆ្នាំ២០២១ ឯកឧត្តម ជាវ តាយ អភិបាល នៃគណៈអភិបាលខេត្តកំពត ដឹកនាំកិច្ចប្រជុំពិនិត្យពិភាក្សាករណីរបស់ក្រុមហ៊ុន វើលដ៍ទ្រីស្តារ អ៉ិនធើថិនមេន ទំនាស់ជាមួយគ្រួសារកងកម្លាំងសមាហរណកម្មការពារកោះឆ្នេរ ស្ថិតនៅភូមិដុំផ្តៅ ឃុំត្រពាំងភ្លាំង ស្រុកឈូក។ កិច្ចប្រជុំនេះ មានការចូលរួមពី ឯកឧត្តម អភិបាលរងខេត្ត លោកឧត្តមសេនីយ៍ទោ នាយករងអធិការកិច្ច ក្រសួងការពារជាតិ មេបញ្ជាការរងការពារកោះឆ្នេរ តំណាងក្រសួងកសិកម្ម រុក្ខាប្រមាញ់ និងនេសាទ អគ្គនាយកក្រុមហ៊ុន នាយករងរដ្ឋបាលសាលាខេត្ត ប្រធានមន្ទីរជំនាញពាក់ព័ន្ធ អភិបាលស្រុកឈូក និងមន្ត្រីជំនាញ។
ថ្លែងនៅកិច្ចប្រជុំនេះ ឯកឧត្តម ជាវ តាយ ប្រសាសន៍ថា តាមរបាយការណ៌របស់ក្រុមការងារចុះពិនិត្យទីតាំងជាក់ស្តែង និងការបំភ្លឺរបស់ភាគីទំនាស់ ពិនិត្យឃើញថា បញ្ហាទំនាស់នេះស្ថិតនៅលើដីបានចុះបញ្ជីរួច ឲ្យក្រសួងកសិកម្ម រុក្ខាប្រមាញ់ និងនេសាទ ដែលជួលឲ្យក្រុមហ៊ុន និងដីមិនទាន់ចុះបញ្ជី គ្រប់គ្រងដោយរដ្ឋ ដូចនេះ ÷
១.ដីដែលបានចុះបញ្ជីរួច ឲ្យក្រសួងកសិកម្ម រុក្ខាប្រមាញ់ និងនេសាទ ដែលបានជួលឲ្យក្រុមហ៊ុន ដូចនេះក្រុមហ៊ុន វើលដ៍ទ្រីស្តារ អ៉ិនធើថិនមេន ត្រូវអនុវត្តសកម្មភាពអភិវឌ្ឍន៍នៅលើតំបន់ណា ដែលគ្មានទំនាស់ ករណីទីតាំងទំនាស់ រង់ចាំការដោះស្រាយ។
២.ទីតាំងដីមិនទាន់ចុះបញ្ជី (គ្រប់គ្រងដោយរដ្ឋ) កំពុងមានទំនាស់ជាមួយអតីតសមាហរណកម្មការពារកោះឆ្នេរ ក្រុមហ៊ុនត្រូវផ្អាកសកម្មភាពទាំងស្រុង។
ក្រោយកិច្ចប្រជុំទល់មុខគ្នា រវៀងភាគីទាំងសងខាង ដោយមានការចូលរួមពីមន្ត្រីមន្ទីរជំនាញ និងអាជ្ញាធរពាក់ព័ន្ធ ដើម្បីពិនិត្យពិភាក្សា រកដំណោះស្រាយ លើករណីទំនាស់ដីធ្លី ក្រុមហ៊ុន វើលទ្រីស្តារ របស់លោកឧកញ៉ា សូ ងួន ជាមួយគ្រួសារកងទ័ពសមាហរណកម្មការពារកោះឆ្នេរ មានទីតាំងដី ស្ថិតក្នុងភូមិដុំផ្ដៅ ឃុំត្រពាំងភ្លាំង ស្រុកឈូក ឯកឧត្តម ជាវ តាយ អភិបាលខេត្តកំពត បានសំណូមពរឲ្យអនុវត្តតាមវិធានការបីចំណុច ៖ ទី១- សូមក្រុមហ៊ុនអនុវត្តសកម្មភាព នៅក្នុងដីរបស់ក្រុមហ៊ុនដែលបានចុះបញ្ជីរួច ហើយមិនមានទំនាស់ ចំណែកដីនៅក្រៅការចុះបញ្ជី សូមក្រុមហ៊ុនរក្សាទុក នឹងផ្អាកសកម្មភាពដើម្បីរកដំណោះស្រាយបន្តនៅលើទីតាំងដីជាក់ស្ដែងបន្ថែមទៀត។
ទី ២- សូមឲ្យក្រុមការងារបន្តការចុះសិក្សាទីតាំងដីឲ្យច្បាស់លាស់ តាម ស.ជ.ណ របស់រាជរដ្ឋាភិបាល ដែលបានសម្រេចជូនគ្រួសារកងទ័ព ដែលបានដាក់ពាក្យស្នើសុំកន្លងមក យកទៅជូនរាជរដ្ឋាភិបាល។ ហើយក្រុមការងារក៏ត្រូវរៀបចំឯកសារ តាមការលើកឡើងរបស់តំណាងក្រសួងកសិកម្ម ដាក់ស្នើជូនទៅក្រសួងកសិកម្ម ដើម្បីសម្រេចដោះស្រាយឲ្យបានឆាប់ចប់ជូនគ្រួសារកងទ័ព។
និងទី៣- អភិបាលខេត្តសូមឲ្យក្រុមហ៊ុនឧកញ៉ា សូ ងួន និងគ្រួសារកងទ័ព រួមគ្នាដោះស្រាយ ដោយសន្តិវិធីតាមលក្ខណៈ ផ្លូវច្បាប់ ពិសេសមិនត្រូវបង្កទំនាស់រហូតផ្ទុះអំពើហិង្សាជាដាច់ខាត ដែលនាំឱ្យប្រឈមនឹងការទទួលខុសត្រូវ ចំពោះមុខច្បាប់។
តាមការអះអាងពីតំណាងគ្រួសារយោធិនថាដីធ្លីដែលរាជរដ្ឋាភិបាលធ្វើប្រទានកម្មជូនគ្រួសារកម្លាំងទ័ពសមាហរណកម្ម ការពារកោះឆ្នេរស្ថិតក្នុងឃុំត្រពាំងភ្លាំង សរុបប្រមាណជាង១០០០ហិចតា ។ ប៉ុន្តែសុំកាន់កាប់ជាក់ស្ដែង តែប្រមាណ៧៤០ហិកតាទេ ក្នុងនោះ បានចេញប័ណ្ណកម្មសិទ្ធិមួយចំនួន ខណៈដែលដីប្រមាណ៤៧៨ហិចតា នៅមានទំនាស់ជាមួយក្រុមហ៊ុនសូ ងួន រហូតមកដល់សព្វថ្ងៃ៕ រក្សាសិទ្ធិដោយ៖បញ្ញាស័ក្តិ
