ភ្នំពេញ ៖ បុរសម្នាក់ត្រូវជនសង្ស័យម្នាក់ប្រដាប់ដោយកាំបិត ប្លន់យកម៉ូតូបានសម្រេចដោយសុវត្ថិភាព ហេតុការណ៍នេះបានកើតឡើងកាលពីវេលាម៉ោង៧និង០០នាទីព្រឹក ថ្ងៃទី១៩ ខែមីនា ឆ្នាំ២០២១ ទីតាំងស្ថិតនៅស្រះទឹកក្បែរអគ្គិសនី ក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីជនរងគ្រោះសុំមិនបញ្ចេញឈ្មោះ បានឲ្យដឹងថា មុនពេលកើតហេតុរូបលោកបានចេញពីផ្ទះទៅមើលមងដូចសព្វដង ស្រាប់តែនៅព្រឹកថ្ងៃកើតហេតុជនរងគ្រោះ បានជិះម៉ូតូមួយគ្រឿង ម៉ាសស្មាស់វី ពណ៌ខ្មៅ ពាក់ផ្លាកលេខ ភ្នំពេញ 1BI 0383 ទៅដល់ចំណុចកើតហេតុមិនទាន់បានមើលមងផង ស្រាប់តែលិចមុខជនសង្ស័យម្នាក់ ប្រដាប់ដោយកូនកាំបិតមុតស្រួចមកផ្ជង់ពីក្រោយ គំរាមប្លន់យកម៉ូតូតែម្តង ភ្លាមៗនោះជនរងគ្រោះព្យាយាមស្រែកឲ្យគេជួយដែរ តែដោយសារនៅទីនោះគ្មានមនុស្ស និងជាតំបន់ស្ងាត់ផង ទើបជនសង្ស័យងាយធ្វើសកម្មភាព និងជិះចេញដោយសុវត្ថិភាព។
ក្រោយកើតហេតុជនរងគ្រោះ បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅទី១ ដើម្បីឲ្យសមត្ថកិច្ចជួយស្វែងរកម៉ូតូនិងជនសង្ស័យ យកមកចាត់ការតាមនីតិវិធី៕ រក្សាសិទ្ធិដោយ-សួង សាម
