ខេត្តមណ្ឌលគិរី ៖ ក្រសួងបរិស្ថាន បានឲ្យដឹងថា នៅក្នុងសប្ដាហ៍ទី៣ នៃខែមីនា ឆ្នាំ២០២១នេះ មន្ត្រីឧទ្យានុរក្សដែនជម្រកសត្វព្រៃស្រែពក សហការនិងគាំទ្រដោយអង្គការ WWF ដោយមានការចូលរួមពីភ្នាក់ងារល្បាតសហគមន៍តំបន់ការពារធម្មជាតិ និងកម្លាំងនគរបាលវរៈសេនាតូចនគរបាលការពារព្រំដែនគោកលេខ៣០៣ នៃស្នងការដ្ឋាននគរបាលខេត្តមណ្ឌលគិរី បានចុះល្បាតរួមគ្នាក្នុងភូមិសាស្ត្រតំបន់ការពារធម្មជាតិ នៅតាមតំបន់សហគមន៍, តំបន់ប្រើប្រាស់ដោយចីរភាព, តំបន់អភិរក្ស និងតំបន់ស្នូល នៃដែនជម្រកសត្វព្រៃស្រែពក ហើយបានដោះប្រមូល និងសាអន្ទាក់ខ្សែកាបសរុបចំនួន ១៣៣ខ្សែ នៅតាមចំណុចត្រពាំងទឹក និងនៅតាមអូរ ដែលអញ្ញាតជនបានចូលមកលួចដាក់អន្ទាក់ខុសច្បាប់សម្រាប់ទាក់ចាប់សត្វព្រៃ។
ការចុះដោះប្រមូល និងសាអន្ទាក់ខាងលើនេះ ក្រុមការងារក៏បានប្រទះឃើញសត្វជ្រូកព្រៃ១ក្បាលងាប់ដោយជាប់អន្ទាក់គួរឲ្យសង្វេគផងដែរ។ ទន្ទឹមនេះ មន្ត្រីឧទ្យានុរក្ស និងភ្នាក់ងារល្បាតសហគមន៍តំបន់ការពារធម្មជាតិ រួមទាំងអ្នកពាក់ព័ន្ធ ទទូចស្នើឲ្យប្រជាពលរដ្ឋបញ្ឈប់ការចូលមកលួចដាក់អន្ទាក់ ឬបរបាញ់សត្វព្រៃខុសច្បាប់ ដែលអាចប្រឈមនឹងវិធានការពង្រឹងការអនុវត្តច្បាប់ ឬការចាប់ឃាត់ខ្លួនក្នុងហេតុការណ៍ល្មើសច្បាប់។
រួមគ្នាការពារ និងអភិរក្សសត្វព្រៃនិងជីវៈចម្រុះ កុំដាក់អន្ទាក់៕ រក្សាសិទ្ធិដោយ៖បញ្ញាស័ក្តិ
