ភ្នំពេញ៖ រដ្ឋបាលរាជធានីភ្នំពេញ សហការជាមួយមន្ទីរសុខាភិបាលរាជធានីនិងអាជ្ញាធរខណ្ឌឫស្សីកែវ ក្រោមការណែនាំពីលោកឃួង ស្រេង អភិបាលរាជធានីភ្នំពេញ កាលពីយប់ថ្ងៃទី១៩ មិនានេះបានបញ្ជូនកុមារាអាយុ៦ឆ្នាំ ដែលបានរកឃើញថា មានផ្ទុកនូវមេរោគកូវីត-១៩ទៅកាន់សណ្ឋាគារ (The Great Duke) ដើម្បីព្យាបាលជម្ងឺនិងដើម្បីបានជួបឪពុកម្ដាយរបស់កុមាររូបនេះផងដែរ ខណៈដែលពួកគាត់បាននឹងកំពុងសម្រាកព្យាបាលជម្ងឺកូវីដ-១៩នៅទីនោះស្រាប់។
នេះជាការយកចិត្តទុកដាក់របស់លោក ឃួង ស្រេង អភិបាលរាជធានីភ្នំពេញ ដើម្បីឲ្យកូនបានជួបម្ដាយនិងឪពុកដែលកំពុងសម្រាកព្យាបាលជំងឺនេះ នៅGreat Duckស្រាប់។ ទោះបីជាយ៉ាងណាក្តី លោកឃួង ស្រេងបានធ្វើការណែនាំឲ្យបងប្អូនប្រជាពលរដ្ឋទាំងអស់ អនុវត្តឱ្យបានខ្ជាប់ខ្ជួននូវវិធានការរបស់ក្រសួងសុខាភិបាលពិសេស អនុវត្តតាមអនុសាសន៍ណែនាំរបស់សម្ដេចតេជោហ៊ុន សែន លើវិធានការ ៣កុំ ៣ការពារ ដែលជាវិធីការពារដ៏មានប្រសិទ្ធភាពបំផុតក្នុងសម័យកាលកូវីដ-១៩នេះ ។
បើតាមការបញ្ជាក់ពីអាជ្ញាធរខណ្ឌឬស្សីកែវថា នៅខណ្ឌឬស្សីកែវ នៅយប់ថ្ងៃទី១៩ ខែមីនា ឆ្នាំ២០២១ (វេលាម៉ោង២០ និង០០នាទី) ក្នុងមូលដ្ឋានខណ្ឌឫស្សីកែវ បានរកឃើញអ្នកមានវិជ្ជមាននឹងមេរោគកូវីដ១៩ ចំនួន០២នាក់ រួមមាន ៖ ១ អ្នកជម្ងឺ កុមារា អាយុ ៦ ឆ្នាំ ដែលមានទីតាំងនៅផ្ទះជួល ផ្លូវបេតុង ភូមិសាមគ្គី សង្កាត់ប្ញស្សីកែវ ខណ្ឌប្ញស្សីកែវ រាជធានីភ្នំពេញ (ឆ្លងពីម្ដាយ អាយុ ៣១ ឆ្នាំ) ក្នុងនោះមានអ្នកពាក់ព័ន្ធចំនួន ០៤ នាក់ (ស្រី០១នាក់) ត្រូវបានបន្តអោយធ្វើចត្តាឡីស័កក្នុងទីតាំងខាងលើដដែល។
២ អ្នកជំងឺ ស្ត្រី អាយុ ៥៦ ឆ្នាំ (ធ្លាប់ទៅមន្ទីរពេទ្យនៅអ្នកលឿង កាលពីថ្ងៃទី២៨ ខែកុម្ភៈ ឆ្នាំ២០២១) ដែលមានទីតាំងនៅ ផ្ទះជួល ផ្លូវ១០៣R ក្រុមទី៧ ភូមិបាក់ទូក សង្កាត់ទួលសង្កែទី១ ខណ្ឌប្ញស្សីកែវ រាជធានីភ្នំពេញ ក្នុងនោះមានអ្នកពាក់ព័ន្ធចំនួន ០២ នាក់ (ស្រី ០១ នាក់) ត្រូវបានអោយធ្វើចត្តាឡីស័កនៅក្នុងទីតាំងនេះ ។ ជាចុងក្រោយ អាជ្ញាធរ បាននិងកំពុងបិទទីតាំងខាងលើនេះជាបណ្ដោះអាសន្ន។
បច្ចុប្បន្ននេះ អ្នកជំងឺ០២នាក់ខាងលើ ត្រូវបានបញ្ជូនទៅព្យាបាល នៅអតីតសណ្ឋាគារ អ៉ីនធើខនទីណង់តាល់ (The Great Duke)។ ក្នុង សេចក្តី ប្រកាស របស់ក្រសួងសុខាភិបាល កុមារវ័យ៦ ឆ្នាំ រស់នៅឫស្សីកែវ ដែលបានឆ្លងកូវីដ-១៩ ពីម្តាយ ត្រូវ បានបញ្ជូនទៅព្យាបាល នៅសណ្ឋាគារ ក្រេតឌុក ហើយខណៈក្រុមគ្រូពេទ្យនាំកុមារាឡើងរថយន្តពេទ្យឆ្ពោះទៅកាន់កន្លែងព្យាបាល Great Duck ដើម្បីបានជួបម្តាយដែលកំពុងព្យាបាលជំងឺកូវីដ-១៩ដែរនោះ រូបភាពនេះបានអង្រួនបេះដូងគ្រប់គ្នាឱ្យផ្ទុះឡើងនូវក្តីអាណិតអាសូរ និងភាពក្តុកក្តួលជាពន់ពេកចំពោះកុមារម្នាក់នេះ។
ក្រសួងសុខាភិបាលនៃព្រះរាជាណាចក្រកម្ពុជា បានប្រកាសថា វីរុសកូវីដ-១៩ កំពុងតែវ៉ៃលុកយើងហើយ សូម្បីតែកុមារអាយុ ៦ឆ្នាំក៏វាមិនលើកលែងឱ្យដែរ។ បញ្ហាសំខាន់របស់បុគ្គលគ្រប់រូបដែលជាមនុស្សពេញវ័យនៅពេលនេះ តើយើងត្រូវចូលរួមធ្វើអ្វីខ្លះ ដើម្បីកុំឱ្យមានការចម្លងបន្តគ្នាបែបនេះ បើសូម្បីកូនតូចៗ ក៏ឆ្លងដែរហើយនៅពេលនេះ? គ្មានអ្វីដែលល្អប្រសើរជាងការនៅផ្ទះ កុំចេញក្រៅផ្ទះ បើមិនចាំបាច់ បើចាំបាច់ត្រូវចេញ សុំអនុវត្តន៍វិធានការ ៣ការពារ និង ៣កុំ ដែលបានដាក់ចេញដោយសម្តេចតេជោនាយករដ្ឋមន្ត្រី ឱ្យអនុវត្តន៍ទាំងអស់គ្នា ឱ្យបានម៉ឺងម៉ាត់ជាទីបំផុត អ្នកនៅភ្នំពេញសូមកុំចេញទៅខេត្ត អ្នកនៅខេត្តសូមកុំទាន់អាលចូលមកភ្នំពេញ អ្នកដែលត្រូវធ្វើចត្តាឡីស័កចំនួន ១៤ថ្ងៃ សូមគោរពអនុវត្តន៍ឱ្យបានត្រឹមត្រូវជាទីបំផុត ផ្អាកឫពន្យាពេលការជួបជុំគ្នាជាចាំបាច់ និងនាំគ្នាធ្វើការពីផ្ទះតាមអនឡាញ សាមគ្គីគ្នា ជួយអប់រំគ្នាក្នុងគ្រួសារនិមួយៗ (សុខចិត្តទ្រាំលំបាកនៅពេលនេះសិនជាជាងការលំបាកហួសប្រមាណនៅពេលខាងមុខប្រសិនបើយើងមិនចូលរួម ៣ការពារ និង ៣កុំទេនោះ) ទើបយើងអាចឆ្លងកាត់ដំណាក់កាលដ៏លំបាកនេះទាំងអស់គ្នាបាន។ ខ្ញុំសូមផ្ញើជូននូវការជូនពរដល់កុមារាតូចនេះ សូមឱ្យកូនបានជាសះស្បើយបានឆាប់ៗ និងជូនពរដល់បងប្អូនអ្នកដែលឆ្លងរួចហើយទាំងអស់ឱ្យឆ្លងកាត់ដំណាក់វ៉ៃលុករបស់សត្រូវអត់ស្រមោលវិលមករកការជាសះស្បើយឆាប់ៗ និងអ្នកដែលមិនទាន់ឆ្លង សុំកុំឱ្យមានការឆ្លងបន្តគ្នាឱ្យសោះ មានសុខភាពល្អ រួមគ្នាវ៉ៃបកសត្រូវមើលមិនឃើញនេះ ដោយអាវុធ ៣ការពារ និង ៣កុំ៕ រក្សាសិទ្ធិដោយ៖បញ្ញាស័ក្តិ
