លោក បូរីស ចនសុន អាយុ៥៦ឆ្នាំ នាយករដ្ឋមន្ត្រីចក្រភពអង់គ្លេស នៅថ្ងៃទី ១៩ ខែមីនា ឆ្នាំ២០២១ បានទទួលការចាក់វ៉ាក់សាំងបង្ការជំងឺ COVID-19 AstraZeneca សម្រាប់ដូសដំបូងរបស់លោកនៅមន្ទីរពេទ្យ ថូម៉ាស់ សម្រាប់ដូសដំបូងរបស់លោក និងជាការជំរុញសាធារណជនទាំងអស់ ឱ្យមកទទួលការចាក់វ៉ាក់សាំងនេះដូចគ្នាដើម្បីការពារកុំឱ្យមានការឆ្លងរាលដាលជំងឺកូវីដ-១៩។
គួរបញ្ជាក់ថា កាលពីជិតមួយឆ្នាំមុន លោក បូរីស ចនសុន ត្រូវបានក្រុមគ្រូពេទ្យ រៀបចំកន្លែងឱ្យសម្រាកព្យាបាលយ៉ាងយកចិត្តទុកដាក់បំផុត បន្ទាប់ពីលោកបានធ្វើតេស្តវិជ្ជមានឆ្លងជំងឺកូវីដ-១៩ និងបានធ្លាក់ខ្លួនឈឺធ្ងន់ , ប៉ុន្តែ បើក្រឡេកមកមើលការចាក់វ៉ាក់សាំងលើកនេះ លោក បូរីស ចនសុន បានថ្លែងថា ពិតជា «មិនមានអារម្មណ៍ប៉ះពាល់អ្វីទាំងអស់»។
នាយករដ្ឋមន្ត្រីចក្រភពអង់គ្លេស រូបនេះ ថ្លែងថា ខ្ញុំមិនអាចណែនាំពីអត្ថប្រយោជន៍របស់វាខ្ពស់ពេកនោះទេ ប៉ុន្តែ អ្នករាល់គ្នានៅពេលដែលអ្នកទទួលបានដំណឹងនេះ សូមអ្នកទៅចាក់វ៉ាក់សាំងនេះ សូមមេត្តាទៅទទួលវាចុះ ព្រោះវាជារឿងល្អបំផុតសម្រាប់អ្នក និងជារឿងល្អបំផុតសម្រាប់គ្រួសាររបស់អ្នក និងសម្រាប់មនុស្សគ្រប់គ្នា។
បើតាមការចេញផ្សាយព័ត៌មាន Reuters នាព្រឹកថ្ងៃសៅរ៍ ទី២០ ខែមីនា ឆ្នាំ២០២១ ឲ្យដឹងថា អង្គការសុខភាពពិភពលោក (WHO) បានជំរុញឲ្យពិភពលោក បន្តការប្រើប្រាស់វ៉ាក់សាំងបង្ការ COVID-19 ប្រភេទ AstraZeneca នៅជាបន្តទៀត។
លោក ថេដ្រូស អាដាណម នាយកអង្គការ WHO បានសង្កត់ធ្ងន់ ថា «វ៉ាក់សាំង AstraZeneca គឺជាមានសារៈសំខាន់យ៉ាងពិសេស ពីព្រោះវាតំណាងឲ្យជាង ៩០% នៃវ៉ាក់សាំងដែលត្រូវបានបញ្ចេញឲ្យប្រើប្រាស់ក្នុងកម្មវិធី COVAX របស់អង្គការ WHO , គ្មានសំនួរអ្វីត្រូវលើកឡើងទៀតនោះទេ៕ រក្សាសិទ្ធិដោយ ៖ ពិសិដ្ឋ CEN
