ភ្នំពេញ ៖ ព្រះអង្គ ពិន សែម ក៏បានផ្តល់នូវឱវាទទូន្មានខ្លះៗ ទៅកាន់លោក ផែង វណ្ណៈ ឲ្យយល់ដឹងអំពីពាក្យថា «អស្មិមនះ» ជាអ្វីទៅ?។ អស្មិមនះ គឺជាសេចក្តីរឹងត្អឹង ប្រកាន់ ដែលកម្របុគ្គលណាធ្វើបានឡើយ ។ ប៉ុន្តែ បើបុគ្គលណា អាចទម្លាក់អស្មិមនះ (សេចក្តីប្រកាន់ សេចក្តីរឹងត្អឹង) ហ្នឹងបាន ព្រះសមាសាមពុទ្ធទ្រង់សរសើរណាស់ ថាបុគ្គលហ្នឹងជាបណ្ឌិតហើយ។
ក្រោយភ្ញាក់ដឹងពីកំហុសរបស់ខ្លួនយ៉ាងធ្ងន់ធ្ងរ ទីបំផុត នៅព្រឹកថ្ងៃទី២០ ខែមីនា ឆ្នាំ២០២១ នេះ លោក ផែង វណ្ណៈ បានទៅកាន់វត្តរាជបូណ៌ ដើម្បីចូលខ្លួនមកសុំខមាលទោសចំពោះព្រះភ័ក្ត្ររបស់ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ គណៈមហានិកាយ ជាឧត្តមទីប្រឹក្សាគណសង្ឃនាយក និងជាសមាជិកថេរសភាព្រះពុទ្ធសាសនា នៃព្រះរាជណាចក្រកម្ពុជា និងជាព្រះគ្រូចៅអធិការវត្តរាជបូណ៌ ដែលមានទីតាំងស្ថិតនៅភូមិវត្តបូព៌ ឃុំសាលាកំរើក ស្រុកសៀមរាប ខេត្តសៀមរាប។
តែយ៉ាងណាមិញ បើបុគ្គលនោះហ៊ានទទួលស្គាល់កំហុសរបស់ខ្លួន ក៏ចូលមកបន្ទន់បន្ទាបសុំឲ្យបុគ្គលដែលខ្លួនបានធ្វើប៉ះពាល់ អនុគ្រោះ សណ្តោស ដូចជាព្រះអង្គផ្ទាល់ដែលលោក ផែង វណ្ណៈ ត្រូវមកលម្អិតលំឱនសុំទោសបែបនេះ បើព្រះអង្គមមិនយោគមិនយល់ មិនអនុគ្រោះឲ្យទេ នោះព្រះសាមាសាមពុទ្ធនឹងហៅថា ព្រះអង្គគឺអាក្រក់ជាងលោក ផែង វណ្ណៈ ទៅទៀត។
ព្រអង្គក៏បានឲ្យដឹងបន្ថែមថា គោលរបស់អស្មិមនះ គឺមាន៣យ៉ាង៖ ទី១- សយោហមស្មិ ដែលប្រែថា មនះថាអាញ់ហ្នឹងពូកែជាងគេ ខ្លាំងជាងគេ មានទ្រព្យសម្បត្តិច្រើនជាងគេ និយាយរួមទៅគឺមើលងាយគេទាំងអស់, ទី២- សយោហមស្មិ ប្រកាន់ថា ឯង និងអញ គឺដូចតែគ្នា មនុស្សដូចតែគ្នា ឯងធ្វើអីបាន អញក៏ធ្វើហ្នឹងដែរ និងទី៣- ហីនោហមស្មិ ប្រកាន់អញវាល្ងង់ជាងគេ ក្រជាងគេ ក្សត់ជាងគេ ទាបជាងគេ មិនហ៊ានចូលទៅជិតគេមាន មានឋានៈខ្ពង់ខ្ពស់ទេ គេដោយគេអញដោយអញ។ ហេតុនេះ ព្រះសាមាសាមពុទ្ធថា បើមនះ ៣ យ៉ាងហ្នឹង មាននៅលើបុគ្គលរូបណាហើយ នោះនឹងនាំបុគ្គលរូបហ្នឹង ទៅជួបនឹងសេចក្តីគ្រោះថ្នាក់ អត់បានសុខទេនៃជីវិត។
ព្រះអង្គនៅបានបញ្ជាក់ទៅដល់លោក ផែង វណ្ណៈ និងក៏ដូចអ្នករាល់គ្នាដែលមានវត្តមាននៅទីនេះ ឲ្យបានយល់ដឹងច្បាស់ថា ព្រះសាមាសាមពុទ្ធ ទ្រង់បានប្រាប់ទៅកាន់អ្នកបួសខ្លួនឯងឲ្យដឹងថា ពពួកសាមណៈ គឺអ្នកបួសនៅក្នុងសាសនានេះ មិនមែនជាអ្នកធ្វើសឹកសង្គ្រាមឲ្យកើតឡើងនៅក្នុងពិភពលោកនោះទេ អ្នកបួសអត់ត្រូវការធ្វើអ្វីឲ្យល្អក់កករដល់សង្គមឡើយ ។ ព្រះអង្គក៏បានជូននូវពុទ្ធសុភាសិតថា ពួកជនណាដែលចងទុកនូវកំហឹង (អ្នកនោះបានជេរអញ បានវ៉ៃអញ បានលួចទ្រព្យអញ…) នោះពារបស់ជននោះ មិនស្ងប់រំងាប់ទេ គឺគំនុំនៅតែមានលើគ្នានិងគ្នា ឬ ព្រះសាមាសាមពុទ្ធថា «អ្នកឈ្នះតែងប្រទះពា (អ្នកណាឈ្នះនឹងជួបពាធ្វើវិញហើយ) រីឯអ្នកចាញ់តែងដេកកើតទុក្ខ ហេតុដូច្នេះ អ្នកលះបង់ការឈ្នះ ការចាញ់បានហើយ ទើបទទួលបាននូវសេចក្តីសុខ។ នៅមានសង្ឃដីកាជាឱវាទដ៏ល្អៗជាច្រើនទៀត ដែលលើកយកមករៀបរាប់មិនអស់។
តែទោះយ៉ាងណា នៅក្នុងឱកាសនោះផងដែរ ព្រះមហាវិមលធម្ម ពិន សែម ពិតជាមានសេចក្តីរំភើបជាខ្លាំង ចំពោះវត្តមានរបស់លោក ផែង វណ្ណៈ ដែលបានដឹងខ្លួនខុស ហើយចេះលំឱនកាយមកសុំខមាលទោសចំពោះព្រះភ័ក្ត្រព្រះអង្គបែបនេះ។ ហើយព្រះអង្គក៏សុំរាប់អានសេចក្តីស្និទ្ធស្នាលរវាងព្រះអង្គ និងលោក ផែង វណ្ណៈ ចាប់តាំងពីពេលនេះតទៅ ចាត់ទុកថាជាបរិស័ទដ៏ល្អម្នាក់សម្រាប់ព្រះអង្គ ព្រោះថា យើងគ្រប់គ្នាគឺសុទ្ធតែជាមិត្តរួមសាសន៍ខ្មែរ រស់ក្រោមម្លប់សាសនាដូចគ្នា មានខុសត្រូវយ៉ាងណា គឺត្រូវចេះអត់ឱនឲ្យគ្នា៕ រក្សាសិទ្ធិដោយ៖ លឹម ហុង
