ភ្នំពេញ ៖ បុរសម្នាក់បានបាត់បង់ជីវិតភ្លាមៗ បន្ទាប់ពីជួបគ្រោះថ្នាក់ចរាចរណ៍ជិះម៉ូតូលឿនពេក មិនប្រយ័ត្នទាក់ដៃចង្កូតនឹងកង់បីដួលបោកក្បាលនៅនឹងថ្នល់ស្លាប់ក្នុងថ្លុកឈាម។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៦ និង៥០នាទីយប់ ថ្ងៃសៅរ៍ទី២០ ខែមីនា ឆ្នាំ២០២១ ស្ថិតនៅតាមបណ្ដោយផ្លូវ៩២ នៅភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។
សពមានឈ្មោះ ផល សុភាព ភេទប្រុស អាយុ៣១ឆ្នាំ មុខរបរ ជាសន្តិសុខ មានស្រុកកំណើតនៅ ភូមិតាសេក សង្កាត់ពន្សាំង ខណ្ឌព្រែកព្នៅ។
បើតាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុគេឃើញម៉ូតូទ្រីមសង់សេ១២៥ ស៊េរីឆ្នាំ២០២១ មួយគ្រឿងពណ៌ខ្មៅពាក់ផ្លាកលេខ កំពង់ចាម1-Z 8855 ជិះដោយបុរសម្នាក់ធ្វើដំណើរតាមបណ្តោយផ្លូវ៩២ ក្នុងទិសដៅពីជើងមកត្បូងក្នុងល្បឿនយ៉ាងលឿនមិនប្រយ័ត្នបានទាក់ដៃចង្កូតនឹងកង់បីមួយគ្រឿងទៀត មិនចាំផ្លាកលេខបណ្តាលឲ្យដួលបោកក្បាលនៅនឹងថ្នល់ស្លាប់មួយរំពេច ចំណែកឯកង់បីបន្តបើករត់ទៅមុខគេចខ្លួនបាត់ស្រមោល។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ខណ្ឌសែនសុខ ចុះមកដល់ដោយឃើញជនរងគ្រោះដួលស្លាប់តែម្នាក់ឯង ដោយភាគីម្ខាងទៀតរត់បាត់ ក៏ធ្វើការវាស់វែងប្រគល់ម៉ូតូឲ្យទៅក្រុមគ្រួសារ និងធ្វើកំណត់ហេតុប្រគល់សពតាមក្រោយឲ្យយកទៅស្រុកកំណើតធ្វើបុណ្យតាមប្រពៃណី៕ រក្សាសិទ្ធិដោយ៖ សា មេត
