ភ្នំពេញ ÷ បុរសម្នាក់បានបើករថយន្តកាមរីបាឡែនមួយគ្រឿងរួមដំណើរជាមួយប្រពន្ធនិងកូនចេញពីភូមិចាក់ជ្រូកធ្វើដំណើរតាមបណ្តោយផ្លូវវិមានឈ្នះឈ្នះ មកដល់ចំណុចកើតហេតុស្រាប់តែឆេះរថយន្ត។ សំណាងល្អពួកគាត់បានចេញពីក្នុងរថយន្តរួចខ្លួនមិនមានរងរបួសនោះទេ។
ហេតុការណ៍ភ្ញាក់ផ្អើលនេះដែលកើតឡើងនៅវេលាម៉ោង៩ និង៣០ នាទីយប់ថ្ងៃសៅរ៍ទី ២០ខែមីនាឆ្នាំ២០២១ ចំណុចជាប់រណ្តៅដីតាកៅ ស្ថិតនៅតាមបណ្ដោយផ្លូវវិមានឈ្នះឈ្នះក្នុងសង្កាត់ឃ្មួញ ខណ្ឌសែនសុខ
រាជធានីភ្នំពេញ។
ប្រភពព័ត៌មានពីបងប្រុសជាម្ចាស់រថយន្តសុំមិនបញ្ចេញឈ្មោះបានរៀបរាប់ឲ្យដឹងថាមុនពេលកើតហេតុរូបគាត់រួមដំណើរជាមួយប្រពន្ធនិងកូនតូចបានបើករថយន្តកាមរីបាឡែនមួយគ្រឿងពណ៌ទឹកប្រាក់ពាក់ផ្លាកលេខ ភ្នំពេញ 2-Y 4119 ចេញពីភូមិចាក់ជ្រូកធ្វើដំណើរតាមបណ្តោយផ្លូវវិមានឈ្នះ ឈ្នះក្នុងទិសដៅពីលិចទៅកើតគោលបំណងទៅខេត្តកំពង់ចាមមកដល់ចំណុចកើតហេតុរាងធំុក្លិនឆ្ងៀម ស្រាប់តែពួកគាត់ក្រឡេកទៅឃើញឆេះពីកង់រថយន្តមុនហើយពួកគាត់បានបើកទ្វាររត់ចេញរួមទាំងមានកូនតូចទៀតហើយក៏បានស្រែកឲ្យប្រជាពលរដ្ឋជិតខាងជួយយកបំពង់ពន្លត់អគ្គិភ័យមកបាញ់តែនៅមិនរលត់ក៏សុំរថយន្តពន្លត់អគ្គិភ័យមកមួយគ្រឿងមកបាញ់ពន្លត់ឲ្យរលត់ទៅវិញទៅ។
ប្រភពពីសមត្ថកិច្ចក្រោយពេលកើតហេតុបានប្រើប្រាស់រថយន្តពន្លត់អគ្គិភ័យអស់មួយគ្រឿង។
មិនមានអ្នកស្លាប់ និងមិនមាននាក់រងរបួស។ រងការខូចខាតតែរថយន្តនិងសម្ភារមួយចំនួន៕
រក្សាសិទ្ធិដោយ៖ សា មេត
