ដូចដែលប្រិយមិត្តទាំងអស់គ្នា បានទទួលជ្រាបហើយថា កាលពីថ្ងៃទី១៩ ខែមីនា ឆ្នាំ២០២១ ម្តាយតារាចម្រៀង វី ឌីណែត បានទទួលមរណភាពគួរឲ្យតក់ស្លុត ដោយសារជំងឺ Covid-19 ។
ទន្ទឹមនឹងទុក្ខដ៏ក្រៀមក្រំសឹងតែមិនអាចទទួលយកបាននោះផងដែរ កញ្ញា វី ឌីណែត ក៏បានបង្ហោះសារទាំងអារម្មណ៍ក្តុកក្តួលថា៖ «ខ្ញុំលែងមានម៉ាក់ហៅហើយ សូមម៉ាក់ទៅអោយបានសុខ ម៉ាក់កុំបារម្ភណា កូននឹងនៅមើលថែប៉ា និងអ្នកផ្ទះយើង កូននឹងរឹងមាំ។
សូម្បីតែមុខជាលើកចុងក្រោយ ក៏មិនបានឃើញ ម៉ាក់ឈឺក៏កូនៗ មិនអាចទៅមើលថែបាន ម៉ាក់ខូចហើយ ក៏មិនអាចឃើញសូម្បីតែសព ខ្ញុំក៏មិនអាចចេញទៅបាន ចេញទៅធ្វើបុណ្យឲ្យម៉ាក់ក៏មិនបាន សូមឲ្យវិញ្ញាណក្ខន្ធម៉ាក់ ទៅកាន់សុខគតិភព ផងចុះ សូមបងប្អូនទាំងអស់គ្នាប្រុងប្រយ័ត្ន ជាមួយនឹងជំងឺដ៏សាហាវនេះ វាលឿនពេកហើយ ម៉ាក់អើយ»។
តែអ្វីដែលយើងគ្រប់គ្នា រឹតតែរំជួលចិត្តខ្លាំងបំផុតនោះ គឺក្រោយសពម្តាយជាទីស្រឡាញ់ ត្រូវបានរំលាយរួចរាល់ កញ្ញា វី ឌីណែត ក៏បានបង្ហោះរូបភាពនៃពិធីបងបង្សុកូលឧទ្ទិសកុសលជូនម្តាយរបស់ខ្លួន ទាំងដែលមិនអាចចូលរួមជូនដំណើរចុងក្រោយម្តាយបាន និងបានត្រឹមតែឃើញតាម Online ដោយភ្ជាប់សារទាំងរំជួលចិត្តរៀបរាប់ទាំងទឹកភ្នែកថា៖ «នាងខ្ញុំជំនួសមុខ អោយក្រុមគ្រួសារ សូមសំដែងការអរគុណដល់ព្រះសង្ឃ នៅវត្តនិគ្រោធវ័ន ហៅ គល់ទទឹង ដែលបានជួយរៀបចំពិធីបង្សុកូលឧទ្ទិសកុសលជូនដល់ ម្ដាយរបស់ខ្ញុំ ងួនសុផាន់នី សូមអោយវិញ្ញាណក្ខន្ធម៉ាក់ ទៅកាន់សុខគតិភពផងចុះ ម៉ាក់ចោលកូនហើយទៅសែនឆ្ងាយ មុខចុងក្រោយក៏មិនបានឃើញ ទៅធ្វើបុណ្យអោយម៉ាក់ក៏មិនកើត មានតែតាម online ម៉ាក់អើយម៉ាក់ ខ្ញុំនឹងរឹងមាំណាម៉ាក់»។
ចំណែកឪពុករបស់នាងលោកគ្រូ ហួរ ឡាវី ក្រោយទទួលធាតុភរិយានៅរសៀលថ្ងៃទី២០ ខែមីនា ឆ្នាំ២០២១ លោកក៏បានសម្តែងនូវក្តីសង្វេគជាខ្លាំង ក្រោមសម្រេកកូនៗរបស់លោកទ្រហោរយំនៅមុខផ្ទះយ៉ាងទ្រហឹងតែម្តង៕ រក្សាសិទ្ធិដោយ៖ លឹម ហុង
