ភ្នំពេញ ៖ ព្រៃឈើជាជម្រកសត្វព្រៃដែលចាំបាច់ត្រូវការពារនិងអភិរក្សអន្ទាក់គឺជាឃាតកលាក់មុខសម្លាប់សត្វព្រៃដែលចាំបាច់ត្រូវបន្តការអនុវត្តច្បាប់ប្រឆាំងនឹងជនល្មើស និងដោះអន្ទាក់ចេញពីព្រៃធម្មជាតិ ស្ថានភាពសត្វព្រៃនៅក្នុងតំបន់ការពារធម្មជាតិត្រូវបានអ្នក ជំនាញវាយតម្លៃថាមានភាពប្រសើរឡើងមួយកម្រិត ទោះបីជានិន្នាការនៃការបាត់បង់ជីវៈចម្រុះនៅតែមានហានីភ័យ។ នេះបើតាមការផ្សាយព័ត៌មានរបស់ក្រសួងបរិស្ថាន។
ប្រភេទសត្វកម្រមួយចំនួនមានកំណើនឡើង ហើយតំបន់ខ្លះមានចំនួននៅឋិតថេរ និងខ្លះមានការថយចុះ។
កំណើនវត្តមានសត្វព្រៃនៅក្នុងតំបន់ការពារធម្មជាតិនេះ ដោយសារតែលទ្ធផលនៃការការពារនិងអភិរក្សធនធានធម្មជាតិ ព្រៃឈើដែលជាជម្រករបស់ពពួលសត្វព្រៃមានភាពប្រសើរឡើង ការអនុវត្តច្បាប់កាន់តែមានប្រសិទ្ធភាព។ នេះគឺដោយសារតែកិច្ចខិតខំប្រឹងប្រែងរួមគ្នារវាងមន្ត្រីជំនាញ អង្គការដៃគូ ដៃគូអភិវឌ្ឍន៍ និងសហគមន៍តំបន់ការពារធម្មជាតិក្នុងការគ្រប់គ្រងនិងអភិរក្សតំបន់ការពារធម្មជាតិ។
អន្ទាក់ និងកាំភ្លើងកែច្នៃដែលជាឃាតកលាក់មុខសម្លាប់សត្វត្រូវបានមន្ត្រីឧទ្យានុរក្ស សត្តរក្ស
និងប្រជាសហគមន៍តំបន់ការពារធម្មជាតិបានចូលរួមដោះ ប្រមូលយក និងកម្ទេចចោល។
សត្វព្រៃជាច្រើនពាន់ក្បាលត្រូវបានជួយសង្គ្រោះនិងដោះលែងចូលក្នុងព្រៃធម្មជាតិវិញ ហើយសត្វព្រៃមួយចំនួនដែលមានសុខភាពមិនល្អ ក្រសួងបរិស្ថានបានសហការជាមួយដៃគូរដើម្បីថែរក្សាព្យាបាលឱ្យជាមានសុខភាពល្អ ទើបប្រលែងចូលក្នុងព្រៃធម្មជាតិដែលជាទីសុវត្ថិភាព។
ឆ្នាំ២០២០ កន្លងទៅ អន្ទាក់ជិត ៥០០០០ ត្រូវបានដោះចេញពីក្នុងតំបន់ព្រៃអភិរក្ស។
ក្នុងនាមស្ថាប័នអ្នកអភិរក្សធនធានធម្មជាតិ និងអង្គការដៃគូដែលបានសហការគ្នាក្នុងការការពារនិងអភិរក្សធនធានធម្មជាតិ ក្រសួងបរិស្ថានពិតជាមានមោទកភាពដែលឃើញវត្តមានសត្វព្រៃមួយចំនួនកើនឡើង ខ្លះនៅមានចំនួនថេរ នៅក្នុងតំបន់ការពារធម្មជាតិ។
នេះគឺជាលទ្ធផលនៃកិច្ចប្រឹងប្រែងរួមគ្នាពីសំណាក់មន្ត្រីនៃក្រសួងបរិស្ថាន អង្គការដៃគូ ដៃគូអភិវឌ្ឍន៍ សហគមន៍តំបន់ការពារធម្មជាតិ និងស្ថាប័នពាក់ព័ន្ធនានាដែលបានពួតដៃគ្នាក្នុងការគ្រប់គ្រងនិងអភិរក្សធនធានធម្មជាតិដោយឈរលើមូលដ្ឋានអនុវត្តច្បាប់ជាធរមានការរួមគ្នាទទួលខុសត្រូវ និងជាកិច្ចសហការប្រកបដោយភាពស្មោះត្រង់ និងស្ថាបនា។
សូមអំពាវនាវដល់ប្រជាជនកម្ពុជាទាំងអស់ សូមចូលរួមទាំងអស់គ្នាដើម្បីបញ្ឈប់ការបរបាគញ់សត្វព្រៃ ការដាក់អន្ទាក់ចាប់សត្វព្រៃបញ្ឈប់ការបរិភោគសាច់សត្វព្រៃ ការប្រើប្រាស់ផលិតផលពីសត្វព្រៃ ការជួញដូរសត្វព្រៃគ្រប់ប្រភេទ ហើយមកចូលរួមការពារ និងថែរក្សាធនធានធម្មជាតិរបស់កម្ពុជាឲ្យនៅស្ថិតស្ថេរសម្រាប់អនាគតយើង និងកូនចៅយើងទាំងអស់។
សកម្មភាពទាំងនេះនឹងជួយការពារទាំងសុខភាព សុខមាលភាពរបស់មនុស្ស និងសត្វ ជីវៈចម្រុះ ព្រមបរិស្ថានទាំងអស់ដែលនៅជុំវិញយើង ក៏ដូចជាចូលរួមទប់ស្កាត់ ហានិភ័យនៃការបាត់បង់ជីវៈចម្រុះ និង ការ ប្រែប្រួលអាកាសធាតុ ជា ដើម។ ដើម្បីអនាគតមនុស្សជាតិ យើងត្រូវរួមគ្នាការពារនិងអភិរក្សធនធានធម្មជាតិ ព្រៃឈើ និងសត្វព្រៃ៕
រក្សាសិទ្ធិដោយ៖បញ្ញាស័ក្តិ