ដូចដែលយើងគ្រប់គ្នាបានដឹងហើយថា ជំងឺកូវីដ១៩ បានកំពុងវាយលុក និងបន្តរីករាលមិនទាន់ស្រាកស្រាន្តនៅឡើយនោះទេ ដែលជាហេតុធ្វើឲ្យបងប្អូនប្រជាពលរដ្ឋទូទៅ ជួបការលំបាកជាខ្លាំង ក្នុងការកប្រាក់ចំណូលផ្គត់ផ្គង់សំរាប់ជីវភាពរស់នៅប្រចាំថ្ងៃ ព្រោះតែមុខរបររកស៊ីត្រូវជាប់គាំងសឹងតែគ្រប់ៗគ្នា។
តែយ៉ាងណាមិញ ដោយមើលឃើញពីកាលៈទេសៈដ៏លំបាកជាក់ស្តែងនេះ ម្ចាស់ផ្ទះជួលចិត្តធម៌ម្នាក់បានប្រកាសមិនយកថ្លៃជួលចំនួន ៣ ខែ។ នេះបើយោងតាមគណនីហ្វេសប៊ុកឈ្មោះ ឈឿន ប៊ុនឆន បានប្រកាសពីដំណឹងដ៏សែនល្អនេះថា៖ «ទឹកចូលច្រមុះដូចតែគ្នា – នៅសង្កាត់ស្វាយរលំ ខ្ញុំមានបន្ទប់ជួល ៦៩ បន្ទប់ ភាគច្រើន កម្មកររោងចក្រជួល ។ ម្នាក់ៗអួលដើមកគ្រប់ៗគ្នា ថ្ងៃនេះ ខ្ញុំសម្រេចមិនយកថ្លៃឈ្នួល ៣ ខែ (មីនា មេសា ឧសភា) ប៉ុន្តែទឹកភ្លើងជួយខ្លួនឯងទៅ – គ្រប់យ៉ាងដោយសារទ្រង់ កូវីដ១៩ មកលេង… សង្ឃឹមវានឹងរ លា យឆាប់ៗ ។ អរគុណស្ថាបនិក ២០ កុម្ភៈ – បងប្អូនមានបន្ទប់ជួលទាំងឡាយ បើមានអ្វីជួយបាន ជួយទៅ គ្មានបរទេសណា មកជួយគ្នាយើង ក្រៅពីខ្មែរ ជួយខ្មែរទេ (និយាយតែរឿងបន្ទប់ជួលទេ ហាមប្រៀបធៀបរឿងផ្សេងទាន)»។
ក្រោយពីបានឃើញពីទឹកចិត្តដ៏គំរូរបស់ម្ចាស់ផ្ទះជួលខាងលើ អ្នកប្រើប្រាស់បណ្តាញសង្គម បានសម្តែងនូវការពេញចិត្ត និងកោតសរសើរថា «ទឹកចិត្តល្អប្រពៃណាស់បង នេះទើបហៅថា ខ្មែរស្រលាញ់ខ្មែរ ជួយគ្នាក្នុងគ្រាមានអាសន្ន, ខ្ញុំសរសេីរដោយស្មោះនូវសន្ដានចិត្តដ៍ល្អម្ចាស់ផ្ទះដែលគិតពីទុក្ខលំបាករបស់អ្នក់ក្រ នេះហើយខ្មែរ ជួយខ្មែរ!! អរគុណដល់ម្ចាស់ផ្ទះដែលមានចិត្តល្អ ខ្ញុំមិនបានជួលផ្ទះគេទេហើយក៏គ្មានផ្ទះជួលដែរ តែសូមអោយម្ចាស់ផ្ទះជួលនេះជួបតែសេចក្តីសុខសម្បូរណ៍សប្បាយ សាច់ញាតិ និងក្រុមគ្រួសារ ជៀសចាកពីជម្ងឺកូវីដ១៩, សូមឲ្យម្ចាស់ផ្ទះជួលដទៃមេត្តាជួយបន្ធូរបន្ថយផងដែរទៅ»៕
រក្សាសិទ្ធិដោយ៖ លឹម ហុង
