កាលពីពេលកន្លងទៅថ្មីៗនេះ ក្រោយបញ្ចេញវីដេអូផ្ទុះឡើងកក្រើកពេញបណ្តាញសង្គម ទាក់ទងនឹងសកម្មភាពអតីតស្វាមី ឌួង ឆាយ ប្រើអំពើហិង្សាដ៏សាហាវមកលើខ្លួន អ្នកនាង ដេត ម៉ាលីណា បន្ទាប់មក ក៏បានបន្តបង្ហោះសារយ៉ាងវែងអន្លាយថែមទៀត ដើម្បីទម្លាយចេញពីចរិតក្លែងក្លាយ ពូកែលេខ១រឿងសម្តែង បំភ្លៃការពិតស្ទើរគ្រប់រឿងរបស់អតីតស្វាមី។
ក្នុងនោះ ស្របជាមួយការបញ្ចេញរូបភាពពីកាមេរ៉ាសុវត្ថិភាព បង្ហាញពីទង្វើខិលខូចរបស់អតីតស្វាមី មានស្រីនៅក្នុងហាង អ្នកនាង ដេត ម៉ាលីណា ក៏បានភ្ជាប់នូវលេខទូរស័ព្ទស្រីៗទាំងខ្សែៗ ដែលឃើញហើយពិតជាមិននឹកស្មានដល់ទាល់តែសោះ។
តែទោះយ៉ាងណា ក្រោយឃើញអ្នកនាង ដេត ម៉ាលីណា បញ្ចេញលេខទូរស័ព្ទបែបនេះ ក៏ស្រាប់តែតារាសម្តែងល្បីឈ្មោះ ម៉ៃយ៉ា ភ្ញាក់ផ្អើលស្រឡាំងកាំងតែម្តង ក្រោយពិនិត្យឃើញក្នុងនោះក៏មានលេខរបស់ខ្លួនផងដែរ។
មិនចាំយូរ ក្រោយឃើញបែបនេះ កញ្ញា ម៉ៃយ៉ា តារាសម្ដែងកូនកាត់ដ៏ល្បីមួយរូបនេះ បានចេញវីដេអូនិយាយទាំងហួសចិត្តថា «ធម្មតា យើងជាអ្នកសិល្បៈ គឺត្រូវបានមានលេខងាយស្រួលគេទាក់ទងការងារ ហើយនៅក្នុងហ្នឹងគឺមានលេខទូរស័ព្ទខ្ញុំដែរ ហេតុអ្វីបានបង ម៉ាលីណា គាត់ផុសមានលេខទូរស័ព្ទខ្ញុំក្នុងហ្នឹងទៀត ហើយខ្ញុំក៏អត់ដឹងថា លេខទូរស័ព្ទខ្ញុំ គាត់បានមកពីណាដែរ ធ្វើអុីចឹងគឺអាចធ្វើឲ្យប៉ះពាល់ដល់កិត្តិយសរបស់គេៗ អាចប្តឹងបានណា៎!»។
កញ្ញា ម៉ៃយ៉ា ក៏បានប្រាប់ការពិតត្រង់ៗថា កន្លងៗមក មានអ្នកទាក់ទងមករូបនាង មានទាំងល្អ ទាំងអាក្រក់ ប៉ុន្តែ អារឿងទាក់ទងផ្លូវអាក្រក់ មករញ៉េរញ៉ៃហ្នឹង គឺរូបនាងមិនដែលទៅរវីរវល់ជាមួយទេ និងសូម្បីមានអ្នកណានាំឲ្យទៅជួបអ្នកនេះអ្នកនោះ ក៏នាងមិនដែលដែរ និយាយរួមទៅក្រៅពីការងារសិល្បៈ គឺអត់រញ៉េរញ៉ៃដាច់ខាត មិនឲ្យប៉ះពាល់ដល់កិត្តិយសឡើយ។ ប៉ុន្តែ ពេលនេះ កញ្ញាពិតជាឆ្ងល់ខ្លាំងណាស់ ហេតុបានជាមានលេខរបស់ខ្លួននៅក្នុងបញ្ជីរបស់អ្នកនាង ម៉ា លីណា ព្រោះថា នៅពេលនេះ មានអ្នកខល និងឆាតតាមតេឡេក្រាមរំខានខ្លាំងតែម្តង៕ រក្សាសិទ្ធិដោយ៖ លឹម ហុង
