ខេត្តប៉ៃលិន ៖ អភិបាលខេត្តប៉ៃលិន លោក ជំទាវ បាន ស្រីមុំ នៅរសៀលថ្ងៃទី២១ ខែមីនា ឆ្នាំ២០២១ បានដឹកនាំ ក្រុមការងារ នាំយកស្បៀងទៅចែកជូនប្រជាពលរដ្ឋ និងជនបរទេស១គ្រួសារ ដែលកំពុងធ្វើចត្កាឡីស័កក្នុងផ្ទះតាមភូមិនានា ទូទាំងខេត្ត ចំនួន៣៤គ្រួសារ។
ការផ្តល់ស្បៀងនេះ បន្ទាប់ពីមានប្រជាពលរដ្ឋមួយចំនួន ស្នាក់នៅក្នុងខេត្តប៉ៃលិន បានមកពីតាមបណ្តាខេត្តនានា ដូចជាខេត្តកណ្តាល ពោធិ៍សាត់ និង រាជធានីភ្នំពេញជាដើម ខណ: ដែល ខេត្តមួយចំនួន កំពុងតែមានករណីផ្ទុះឡើង នៃជម្ងឺកូវីដ-១៩ ទើបអាជ្ញាធរខេត្តប៉ៃលិន បានណែនាំឱ្យពួកគាត់ ធ្វើចត្តាឡីស័កក្នុងផ្ទះ រយ:ពេល ១៤ថ្ងៃ។ ដោយពេលកំពុងធ្វើចត្តាឡីស័ក មិនអាចចេញទៅប្រកបមុខរបរបាន អាជ្ញាធរខេត្តប៉ៃលិន បានផ្តល់ស្បៀងអាហារជូនពួកគាត់ ដើម្បីដោះស្រាយជីវភាពប្រចាំថ្ងៃបានមួយគ្រា។
អាជ្ញាធរខេត្តប៉ៃលិន បានណែនាំបន្ថែមទៀត ឱ្យពួកគាត់យល់ដឹងកាន់តែច្បាស់ និងអនុវត្តឱ្យបានខ្ជាប់ខ្ជួននូវវិធានការ ៣ការពារ ៣កុំ របស់ប្រមុខរាជរដ្ឋាភិបាលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី និងតាមការណែនាំរបស់ក្រសួងសុខាភិបាល ដើម្បីរួមគ្នាទប់ស្កាត់ការរីករាលដាលនៃជំងឺកូវីដ-១៩ ។
លោកជំទាវអភិបាលខេត្ត បានណែនាំដល់ពលរដ្ឋ ដែលកំពុងស្នាក់នៅធ្វើចត្តាឡីស័ក មិនត្រូវដើរហើរចេញពីផ្ទះរបស់ខ្លួន ដែលក្រុមការងារបានហ៊ុព័ទ្ធខ្សែក្រហមជុំវិញ ដោយគ្មានការអនុញ្ញាតនោះឡើយ។ បើសិនជាស្រឡាញ់ខ្លួនឯង ស្រឡាញ់ក្រុមគ្រួសារ និងស្រឡាញ់សង្គមជាតិ ត្រូវតែចូលរួមស្តាប់តាមការណែនាំរបស់អាជ្ញាធរមូលដ្ឋាន ហើយបើសិនជានៅតែរឹងចចេស អាចនឹងមានការឆ្លងជំងឺក្នុងសហគម៍កាន់តែធំ។
សូមជម្រាបថា ពលរដ្ឋដែលកំពុងស្នាក់នៅធ្វើចត្តាឡីស័កតាមផ្ទះទាំង៣៤គ្រួសារ ទទួលបានស្បៀងអាហារ ពីអាជ្ញាធរខេត្តប៉ៃលិន មានដូចជា អង្ករ២៥ គីឡូក្រាម មី ទឹកត្រី ទឹកស៊ីអ៊ីវ អំបិល ប៊ីចេង ស្ករស ទឹកសុទ្ធ និងត្រីខ និងថវិកាមួយចំនួន៕ រក្សាសិទ្ធិដោយ៖CEN
