ភ្នំពេញ ៖ យុវជនម្នាក់បើករថយន្តធុនធំដឹកស៊ីម៉ងត៍គេចពីម៉ូតូដែលដួលនៅខាងមុខ បណ្ដាលឱ្យក្រឡាប់ផ្ងារជើងទទឹងផ្លូវទាំងព្រឹកនៅផ្លូវជាតិលេខ៦អា ខ្ចាយស៊ីម៉ងត៍ពេញផ្លូវ សំណាងដែរដែលមិនមានគ្រោះថ្នាក់ដល់អ្នកបើកបរនិងអ្នកធ្វើដំណើរឡើយ។
ហេតុការណ៍នេះបានកើតឡើងនៅវេលាម៉ោង ៩ និង ៣០ នាទីព្រឹកថ្ងៃទី ២២ ខែមីនាឆ្នាំ ២០២១ ស្ថិតនៅតាមបណ្ដោយផ្លូវជាតិលេខ ៦អា ក្នុងភូមិក្ដីចាស់ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ។
តាមប្រភពព័តមានពីតៃកុងឡានដឹកស៊ីម៉ងត៍ បានប្រាប់ឲ្យយដឹងថា មុនកើតហេតុ បានបើករថយន្តម្នាក់ឯងម៉ាកហ៊ីយ៉ាន់ដាយ ពណ៌សលាយខៀវពាក់ផ្លាកលេខកំពត3A-0914 ដឹកស៊ីម៉ងត៍១៥តោន ពីរោងចក្រីទីងពីខេត្តកំពតឆ្ពោះទៅ ព្រែកពោធិ ខេត្តកំពង់ចាម ពេលធ្វើដំណើរដល់ចំណុចកើតហេតុខាងលើ ស្រាប់តែមានម៉ូតូ១គ្រឿងវ៉ាជែងរថយន្តមួយគ្រឿងទៀត មកដួលនៅខាងមុខរថយន្តរបស់គាត់ដែលកំពុងដឹកស៊ីម៉ងត៍ធ្ងន់ បួងចង្កូតមកស្ដាំផុតក៏កាច់ចង្កូតមកឆ្វេងវិញ ដោយរថយន្តយោលបោកក្រឡាប់ស្រង៉ាងទទឹងផ្លូវ ខ្ចាយស៊ីម៉ងត៍ពេញផ្លូវ សំណាងល្អដែលមិនគ្រោះថ្នាក់ដល់អ្នកបើកបរ និងអ្នកធ្វើដំណើរនោះឡើយ ចំណែកអ្នកបើកម៉ូតូ ឃើញសភាពបែបនេះ ក៏លើកម៉ូតូបើកគេចចេញបាត់ស្រមោល។
ក្រោយកើតហេតុ សមត្ថកិច្ចមូលដ្ឋាននិងសមត្ថកិច្ចជំនាញ បានបុកដល់ជួយសម្រួលចរាចរណ៍ បញ្ជៀសការកកស្ទះ និងបានឲ្យតៃកុងរថយន្តដឹកស៊ីម៉ងត៍ទំនាក់ទំនងយករថយន្ត១គ្រឿនទៀត មកសាង និងស្ទូចរថយន្តយកទៅជុសជុលដោយខ្លួនឯង៕ រក្សាសិទ្ធិដោយ៖សារឿន
