ភ្នំពេញ ៖ បន្ទាប់ពីមានក្រុមអង្គការសង្គមស៊ីវិលមួយចំនួនធ្វើយុទ្ធនាការដើរប្រមូលស្នាមមេដៃប្រជាពលរដ្ឋ និងកម្មករ កម្មការិនី នៅតាមផ្ឬះជួល ដើម្បីទាមទារឲ្យរដ្ឋាភិបាលដោះស្រាយបញ្ហាថ្លៃសាំង ថ្លៃផ្ទះជួល និងការបង់ធនាគារនោះ លោកផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានបញ្ជាក់ថា ចំពោះការទាមទាររបស់អង្គការសង្គមស៊ីវិលមួយចំនួនទាមទារឲ្យរដ្ឋាភិបាលដោះស្រាយបញ្ហាតម្លៃសាំង បញ្ហាផ្ទះជួល និងបញ្ហាផ្អាកការបង់ធនគារនោះ គឺរដ្ឋាភិបាលបានត្រៀមលក្ខណៈមួយចំនួនធំ ក្នុងការដោះស្រាយអ្នកក្រីក្រតាមរយៈប័ណ្ណក្រីក្រ និងតាមរយៈការចុះពិនិត្យមើលត្រឹមត្រូវ។
លោកបន្តថា ពាក់ព័ន្ធជាមួយខាងធនាគារ គឺខាងធនាគារជាតិនៃកម្ពុជាបានធ្វើកិច្ចការងារជាមួយក្រុមហិរញ្ញវត្ថុ ក៏ដូចជាធនាគារឲ្យដោះស្រាយរបៀបទន់ភ្លន់ និងជួយដល់អ្នកដែលជំពាក់បំណុល គឺបានធ្វើជាបណ្តើរៗមកហើយ។
អ្នកនាំពាក្យរាជរដ្ឋាភិបាលបានបញ្ជាក់ថា អ្វីដែលខ្លាចបំផុត គឺយើងមិនចង់ឲ្យបាត់បង់ស្ថេរភាពនៃម៉ាក្រូសេដ្ឋកិច្ច ម៉ាក្រូសេដ្ឋកិច្ចគឺមានរាប់បញ្ចូលទាំងការបាត់បង់តម្លៃលុយដែលហៅថា អតិផរណា កាលណាលុយធ្លាក់ចុះមកច្រើនសម្រាប់មហាជន គឺធ្វើឲ្យមានអតិផរណាគឺវាធ្វើឲ្យសម្លាប់ដល់សេដ្ឋកិច្ចរួមទាំងអស់ ដែលយើងត្រូវប្រយ័ត្នប្រយែង។
ជាមួយគ្នានេះ អ្នកនាំពាក្យរដ្ឋាភិបាលក៏បានអំពាវនាវទៅដល់ប្រជាពលរដ្ឋកុំឲ្យមានសកម្មភាពពពាក់ពពូនដែលអាចបំផ្លាញនូវស្ថេរភាព នយោបាយរបស់សង្គមវិញ។
លោកផៃ ស៊ីផាន បានបញ្ជាក់ថា ” គោលបំណងនៅពីក្រោយរបស់គេ យើងបានស៊ើបអង្កេតមើលគឺជាសកម្មភាពរបស់ពួកក្រុមដែលគេហៅថា សម្ព័ន្ធដើម្បីតែ និងទឹកដោះគោ ដែលពាក់ព័ន្ធនយោបាយពីហុងកុង ប្រទេសថៃ និងភូមា ដូច្នេះវាចូលសាច់រឿងនយោបាយដទៃទៀត ដែលយើងកំពុងតែតាមដាន ” ។
សូមជម្រាបថា ក្រុមយុវជនសមាគមស្ត្រី ដើម្បីសង្គម គ្រោងនឹងនឹងយកញ្ញត្តិទៅដាក់នៅខុទ្ទកាល័យសម្តេចនាយករដ្ឋមន្ត្រី ហ៊ុន សែន
ស្នើសុំដល់សម្តេចតេជោ ហ៊ុន សែន ចំនួន ៤ចំណុចជួយដោះស្រាយ រួមមាន:
ទី១. សូមមេត្តា ជួយដោះស្រាយ បញ្ហាសាំង អោយនៅក្នុងតម្លៃមួយសមរម្យ ចំពោះស្ថានភាពនេះ។
ទី២. សូមមេត្តា ធ្វើសេចក្តីប្រកាស សម្រួលជាមួយម្ចាស់ផ្ទះជួល ម្ចាស់កន្លែងជួលបើករកសុី ចុះតម្លៃថ្លៃបន្ទប់ ឬផ្ទះល្វេង អោយសល់ត្រឹមតែពាក់កណ្តាល ១រយៈពេល ចំពោះស្ថានការបែបនេះ (ពេលស្ថានភាពប្រសើរវិញនឹងគិតតម្លៃដើម)។
ទី៣. សូមមេត្តា សម្រួលជាមួយធនាគារហិរញ្ញវត្ថុ គ្រប់ស្ថាប័នរដ្ឋនឹងឯកជន ចំពោះប្រជាពលរដ្ឋនៃប្រាក់កម្ចី ធ្វេីការផ្អាកបង់ ១រយៈពេល(ពេលស្ថានភាពល្អឡើងវិញ ពួកយើងនឹងបង់ជាធម្មតា)។
ទី៤. សូមមេត្តា ជួយសម្រួលជាមួយក្រសួងវារីអគ្គិសនី ទឹក ភ្លើង ឲ្យនៅក្នុងតម្លៃ១ ដែរប្រជាជនទទួលយកបាន ចំពោះស្ថានភាពនេះ ដើម្បីជួយសម្រួលជីវភាពប្រជាពលរដ្ឋ ដោយអនុគ្រោះផងទាន៕ រក្សាសិទ្ធិដោយ : ចេស្តារ
