សូមរម្លឹកផងដែរថា ក្រោយពីបានដឹងថា សន្តិសុខផ្សារមជ្ឈមណ្ឌលពាណិជ្ជកម្ម(ផ្សាចិន) អូរ១ ក្រុងព្រះសីហនុ និងជាអ្នកដើរទារភាស៊ី បានបង្កការបំផ្លាញពងទាអាជីវករ ដោយសារតែរឿងទារភាស៊ីជ្រុលហួសហេតុ លើសពីថ្លៃសៀវភៅបន្ទុក ឯកឧត្តម គួច ចំរើន អភិបាលខេត្តបានសម្រេចបើកកិច្ចប្រជុំបន្ទាន់មួយ ជាមួយមន្ត្រីនិងអង្គភាពកងកម្លាំងមានសមត្ថកិច្ច កាលពីរសៀលថ្ងៃ២១ ខែមីនា ឆ្នាំ២០២១។
លទ្ធផលនៃកិច្ចប្រជុំនោះ ត្រូវបានដឹងថា ឯកឧត្តម គួច ចំរើន បានសម្រេចដាក់ពិន័យរដ្ឋបាល ដោយបានណែនាំដល់ប្រធានមជ្ឈមណ្ឌលពាណិជ្ជកម្ម ក្រុងព្រះសីហនុ មិនត្រូវបន្តការប្រើប្រាស់បុគ្គលរូបនេះបន្តទៀតទេ គឺត្រូវបញ្ចប់ការងារពីភ្នាក់ងារទារភាស៊ី ឬសន្តិសុខ ចាប់ពីពេលនេះតទៅ។
យ៉ាងណាមិញ ដើម្បីជាការប៉ះប៉ូវជំងឺចិត្តដល់អាជីវករងគ្រោះ ឯកឧត្តមអភិបាលខេត្ត បានសម្រេចឱ្យប្រធានគ្រប់គ្រងមជ្ឈមណ្ឌលពាណិជ្ជកម្មក្រុងព្រះសីហនុ លើកលែងការយកប្រាក់ភាស៊ីលើអាជីវកម្មរបស់គាត់ សម្រាប់រយៈពេលពេញ១ឆ្នាំផងដែរ។
ជាមួយគ្នានេះដែរ ឯកឧត្តម គួច ចំរើន ក៏បានណែនាំដល់អភិបាលក្រុង/ស្រុក និងអ្នកគ្រប់គ្រងផ្សារ ត្រូវអនុវត្តតាមសារាចររបស់រាជរដ្ឋាភិបាល លេខ១១សរ ចុះថ្ងៃទី០៩ ខែធ្នូ ឆ្នាំ២០១៦ ដោយត្រូវយកចិត្តទុកដាក់ជាប្រចាំដល់ជីវភាពរបស់ប្រជាពលរដ្ឋ ដើម្បីកាត់បន្ថយភាពក្រីក្រ លើកកម្ពស់ជីវភាពរបស់ប្រជាពលរដ្ឋ និងព្រមទាំងកែលម្អសេវាសាធារណៈផ្សេងៗជូនប្រជាពលរដ្ឋ ក្នុងនោះដូចជាលុបការបង់ភាស៊ី និងការបង់ថ្លៃផ្សេងៗទៀត ចំពោះការលក់ដូរតូចតាចតាមកញ្ច្រែង កញ្ជើ ល្អី និងត្រូវលើកស្លាកតារាងតម្លៃបង់ថ្លៃភាស៊ីនៅតាមទីផ្សារទាំងអស់ នៅទូទាំងខេត្តព្រះសីហនុ។
ក្រោយឃើញបែបនេះ បងប្អូនអ្នកប្រើប្រាស់បណ្តាញសង្គម បានផ្ទុះកំហឹងបែបនេះថា៖ «ជាតិសាសន៍ឯងសោះមិនគួរលោកឯងសាហាវដល់ថ្នាក់ហ្នឹងសោះ គាត់សុំម៉ារស់ៗវាមិនបានឬ ខ្លាំងណាស់ បានចំពោះតែអ្នកទន់ខ្សោយ អាផេះ»។ រីឯអ្នកលក់ខ្លះក៏បានចេញមកប្រាប់ឲ្យដឹងថា៖ «ម្នាក់នឹងចិត្តអាក្រក់ សម្ដីអាក្រក់យូរមកហើយ តែគ្មានអ្នកណាប្ដឹង ឬដកចេញទេ តែពេលនេះលោកពូពិតជាមានយុតិ្តធម៌មែន ខ្ញុំលេងមានកន្លែងលក់ដោយសារតែម្នាក់ហ្នឹង តែនៅមានម្នាក់ទៀតអាក្រក់ជាងម្នាក់នេះខ្លាំងណាស់, មួយវិញទៀត ម្នាក់ហ្នឹងក៏ធ្លាប់យកអីវ៉ាន់អ្នកលក់យកទៅចោលកន្លែងសំរាមច្រើនអ្នកណាស់មកហើយ និងថែមទាំងជេរដៀលចាស់ទំទៀត តែគ្មានអ្នកណាហ៊ានទេបានត្រឹមតែមើលមុខគ្នា»៕ រក្សាសិទ្ធិដោយ៖ លឹម ហុង
