ភ្នំពេញ ៖ បុរសម្នាក់ជាសន្តិសុខយាមការដ្ឋានមួយ ស្ថិតនៅខាងក្រោយ ភោជនីដ្ឋានវិមានអាហារ ត្រូវបានបុរសម្នាក់ក្នុងចំណោមបក្សពួក៥នាក់ ដែលផឹកស៊ីស្រវឹងឈ្លោះគ្នាផ្អើលរំខានដល់កម្មករ ដែលកំពងធ្វើការក្បែរនោះ មកប្រាប់សន្តិសុខ ឲ្យទៅប្រាប់កុំឲ្យមាត់ឮពេករំខានដល់ពួកគាត់ដែលកំពុងធ្វើការ។
ហេតុការណ៍នេះ បានកើតឡើងនៅវេលាម៉ោង២និង៤០នាទីរសៀលថ្ងៃទី២២ខែមីនាឆ្នាំ២០២១ ត្រង់ចំណុចការដ្ឋានបុរីមួយកន្លែង ស្ថិតនៅខាងក្រោយភោជនីយដ្ឋានវិមានអាហារ ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
យោងតាមប្រភពពីសន្តិសុខដែលគេគំរាមរកវាយនិងបាញ់នោះ បានប្រាប់ឲ្យដឹងថា ក្រុមជើងខ្លាំងដែលប្រមាថមកលើគាត់ ឃើញផឹកស៊ីតាំងពីព្រឹកមកម្លេះ ក្នុងឃ្លាំងដ៍ធំទើបធ្វើថ្មីក្បែរនោះ មានគ្នា៥នាក់ស្រី២ ប្ដីប្រពន្ធនិងគ្នា លុះរហូតមកដល់ម៉ោងកើតហេតុខាងលើ ក៏មានកម្មករដែលកំពុងធ្វើការមកប្រាប់សន្តិសុខថា មានគេឈ្លោះគ្នាស្រែកឡូរឡារំខានដល់ពួកគាត់ដែលកំពុងធ្វើការ សន្តិសុខទទួលបានក៏ដើរទៅប្រាប់ខណៈដែលកំពុងឈ្លោះជាមួយប្រពន្ធ ភ្លាមនោះស្រាប់តែបែរមកជេប្រមាថដាក់សន្តិសុខទៅវិញ រកគប់ក្បាលនឹងដុំថ្មហើយបបួលចូលក្នុងឃ្លាំងរបស់ខ្លួនវាយមួយស្មើ ថែមទាំងនិយាយថា ៖ បើមានកាំភ្លើងបាញ់ក្បាល់សន្តិសុខនោះគ្រវាត់ចោលទៀតផង។
ចំណែកសន្តិសុខ ក៏ធ្វើការតាមការងាររបស់ខ្លួន ដោយហៅតាមអាយកូបទៅមេរបស់ខ្លួនដើម្បីមកជួយ។
ក្រោយកើតហេតុ ឃើញមានសន្តិសុខមកជាច្រើននាក់សហការជាមួយសមត្ថកិច្ចខណ្ឌជ្រោយចង្វារ ចុះមកដល់ បានធ្វើការអប់រំទៅបុគ្គលដែលគំរាមវាយនិងប្រមាថជីវិតគេ ដោយសម្របសម្រួលបញ្ចប់រឿង ព្រោះមិនទាន់បង្កជាហឹង្សាមានរបួសស្នាមនៅឡើយ៕ រក្សាសិទ្ធិដោយ៖ សារឿន
