ភ្នំពេញ ÷ មន្ត្រីយោធាស័ក្តិ៥ម្នាក់ត្រូវបានបាត់បង់ជីវិតភ្លាមៗបន្ទាប់ពីជួបគ្រោះថ្នាក់ចរាចរណ៍ជិះម៉ូតូចេញពីបន្ទាយដើម្បីទៅទិញម្ហូបហូបបាយក៏ត្រូវរថយន្តធុនធំបើកទៅបុកបណ្តាលឲ្យដួលកិនបែកខួរស្លាប់ភ្លាមៗនៅនិងកន្លែង។ចំណែកតៃកុងរថយន្តបង្កត្រូវសមត្ថកិច្ចតាមឃាត់បាន។
ហេតុការណ៍គ្រោះថ្នាក់ចរាចរណ៍នេះដែរកើតឡើងនៅវេលាម៉ោង៨និង៤០នាទីយប់ថ្ងៃ ចន្ទ ទី២២ ខែមីនា ឆ្នាំ ២០២១ ស្ថិតនៅតាមបណ្ដោយផ្លូវជាតិលេខ៤ ចំណុចជិតអគ្គបញ្ជាការកងទ័ពជើងគោក ក្នុង សង្កាត់កន្ទោក ខណ្ឌកំបូល រាជធានីភ្នំពេញ។
សពជនរងគ្រោះមានឈ្មោះពៅ វិច្ឆិការ ភេទប្រុសអាយុ៣៤ឆ្នាំមុខរបរមន្ត្រីយោធាស័ក្តិ៥ នៅអគ្គបញ្ជាការកងទ័ពជើងគោក។
បើយោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុជនរងគ្រោះបានជិះម៉ូតូស្គុបពីមួយគ្រឿង ពណ៌សពាក់ផ្លាកលេខភ្នំពេញ1-BC 6390 ជិះចេញពីបន្ទាយក្នុងទិសដៅពីលិចទៅកើតគោលបំណងទៅទិញម្ហូបមកបាយជុំគ្នាខណៈមកដល់ចំណុចកើតហេតុខាងលើស្រាប់តែមានរថយន្តយីឌុបម៉ាកFUSO មួយគ្រឿងក្បាលពណ៌ត្រួយចេកពាក់ផ្លាកលេខភ្នំពេញ2-E 9187 ធ្វើដំណើរតាមបណ្តោយផ្លូវជាតិលេខ៤ក្នុងទិសដៅពីកើតទៅលិចបញ្ច្រាសទិសគ្នាក្នុងល្បឿនលឿនបានរេចង្កូតជ្រុលទៅបុកចំពីមុខម៉ូតូពេញទំហឹងរួចកិនពីលើចំក្បាលធ្លាយខួរស្លាប់ភ្លាមៗ។ ហើយភ្លាមៗនោះរថយន្តបង្កព្យាយាមបើករត់ទៅមុខប្រមាណជិតមួយរយម៉ែត្ររួចក៏បានឈប់រថយន្តបើកទ្វារត់គេចខ្លួនចូលក្នុងរោងចក្រត្រូវបានសមត្ថកិច្ចតាមចូលឃាត់បានមកវិញ។
ក្រោយកើតហេតុសមត្ថកិច្ចមូលដ្ឋានសហការជាមួយជំនាញចរាចរណ៍ខណ្ឌកំបូលចុះមកដល់ក៏បានទាក់ទងទៅខាងជំនាញចរាចរណ៍ក្រុងមកវាស់វែងយករថយន្តបង្កនិងម៉ូតូរងគ្រោះទៅរក្សាទុករងចាំដោះស្រាយនៅពេលក្រោយ រួចធ្វើកំណត់ហេតុប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
រក្សាសិទ្ធិដោយ៖ សា មេត
