ភ្នំពេញ ៖ ឃាត់ខ្លួនជនសង្ស័យ២នាក់ ដែលកាច់កម៉ូតូពីខណ្ឌទួលគោក បានសម្រេច មកជាប់អន្ទាក់សមត្ថកិច្ចខណ្ឌឬស្សីកែវ ក្រោយពីទទួលបាន តាមវិទ្យុទាក់ទងប្រចាំបញ្ជានៃស្នងការនគរបាលរាជធានីភ្នំពេញ ដោយប្រេីរយៈពេល៣០នាទីឃាត់ខ្លួនបានជនសង្ស័យ២នាក់និងម៉ូតូ២គ្រឿង ។
ក្នុងប្រតិបត្តិការដ៏ក្ដៅគគុកនេះ សមត្ថកិច្ចបានបង្ហើបប្រាប់ឱ្យដឹងថា ក្រោយពីទទួលបានបញ្ជាពីថ្នាក់លើ កម្លាំងព្រហ្មទណ្ឌខណ្ឌឬស្សីកែវ សហការជាមួយនឹងកម្លាំងប៉ុស្តិ៍រដ្ឋបាលសង្កាត់ទួលសង្កែទី១ បើកការស្រាវជ្រាវភ្លាមៗ ក៏ប្រទះឃើញម៉ូតូម៉ាកក្លិចពណ៌ខ្មៅពាក់ផ្លាកលេខភ្នំពេញ1IP-1638 ដែលជនសង្ស័យកាច់កមកពីម្ដុំផ្លូវ៣៣៩សង្កាត់បឹងកក់ទី១ ខណ្ឌទួលគោក រាជធានីភ្នំពេញ យកមកដាក់ផ្ញើនៅផ្ទះក្រោមដីដែលមានទីតាំងតាមបណ្ដោយផ្លូវរថភ្លើង ភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ នៅវេលាម៉ោ៩និង៥០នាទីយប់ថ្ងៃទី២២ខែមីនាឆ្នាំ២០២១។
ក្រោយពីឃេីញម៉ូតូសមត្ថកិច្ចបានដាក់កម្លាំងឃ្លាំចាំមើល មិនយូរប៉ុន្មានក៏លេចមុខជនសង្ស័យ ២ នាក់ជិះម៉ូតូមួយគ្រឿងម៉ានិចពណ៌ទឹកប្រាក់ ពាក់ផ្លាកលេខភ្នំពេញ1AR-6854 ជិះចូលទីតាំងខាងលើនោះបម្រុងយកម៉ូតូដែលកាច់កបាននោះចេញ តែត្រូវកម្លាំងសមត្ថកិច្ចបុកចូលខ្ទប់ចាប់វាយខ្នោះភ្លាមៗ។
ជនសង្ស័យទី១មានឈ្មោះ ធំ រដ្ឋា ហៅជ័យអាយុ១៨ឆ្នាំមុខរបរមិនពិតប្រាកដ,ជនសង្ស័យទី២មានឈ្មោះ គូ ថេរ៉ា អាយុ៣១ឆ្នាំមុខរបរមិនពិតប្រាកដ ។
ក្រោយពេលកើតហេតុ សមត្ថកិច្ចជំនាញព្រហ្មទណ្ឌខណ្ឌឫស្សីកែវ សហការជាមួយនឹងសមត្ថកិច្ចប៉ុស្តិ៍ បាននាំខ្លួនជនសង្ស័យទាំង២នាក់និងវត្ថុតាងម៉ូតូ ២គ្រឿងយកទៅប៉ុស្តិ៍ទួលសង្កែទី១ដើម្បីសួរនាំ រួចទំនាក់ទំនងសមត្ថកិច្ចខណ្ឌទួលគោកមកទទួលយកជនសង្ស័យនិងវត្ថុតាងម៉ូតូទាំង២គ្រឿង ទៅចាត់ការបន្តតាមនីតិវិធីច្បាប់៕
រក្សាសិទ្ធិដោយ៖ សារឿន
