ស្នងការសហគមន៍អឺរ៉ុបបាននិយាយថា អឺរ៉ុបអាចមានប្រព័ន្ធការពារប្រឆាំងនឹងវីរុសកូវីដ-១៩ នៅត្រឹមខែ
កក្កដា ខណៈវត្តមាននៃវ៉ាក់សាំងត្រូវបានគេពន្លឿន ប៉ុន្តែការចាក់វ៉ាក់សាំងត្រូវបានគេរំពឹងថាមានល្បឿន យឺតនៅក្នុងទ្វីបនេះ។
ការបង្ហាញនូវសុទិដ្ឋិនិយមនេះនៅតែមាន បើទោះបីជាបណ្តាប្រទេសអ៊ឺរ៉ុបមួយចំនួនបានចាប់ផ្តើមរៀបចំឡើងវិញនូវការរឹតត្បិត ខណៈមានការកើនឡើងនៃវីរុសកូវីដ១៩ ហើយបន្ទាប់ពីមានការព្រួយបារម្ភទៅលើសុវត្ថិភាពនៃវ៉ាក់សាំង។
លោក Thierry Breton ស្នងការអឺរ៉ុបសម្រាប់ទីផ្សារផ្ទៃក្នុងរបស់សហភាពអឺរ៉ុប បានប្រាប់វិទ្យុបារាំង TF1 ថា “ចូរយើងយកកាលបរិច្ឆេទជានិមិត្តរូប៖ «នៅថ្ងៃទី ១៤ ខែកក្កដាយើងមានលទ្ធភាពទទួលបានប្រព័ន្ធការពារពាសពេញទ្វីបអឺរ៉ុប។»
លោកមានប្រសាសន៍ថា៖«យើងកំពុងស្ថិតនៅក្នុងផ្ទះ ព្រោះយើងដឹងថាដើម្បីយកឈ្នះលើវីរុសកូវីដនេះមានតែដំណោះស្រាយតែមួយទេគឺការចាក់វ៉ាក់សាំង ហើយវ៉ាក់សាំងនឹងមកដល់ហើយ។» ជាងមួយភាគបីនៃប្រជាជនបារាំងឥឡូវនេះ ត្រូវបានបិទទ្វារជាថ្មី ខណៈពេលដែលការខកចិត្តចំពោះការទប់ស្កាត់វីរុសបានរាលដាលដល់បាតុកម្មចុងសប្តាហ៍នៅប្រទេសអាឡឺម៉ង់ អាំស្ទែដាំ ប៊ុលហ្គារីនិងប្រទេសស្វីស។
ការប្រយុទ្ធប្រឆាំងទៅនឹងវីរុសកូវីដ១៩ នៅអឺរ៉ុបដើម្បីការពារការឆ្លងរាលដាលនៃរលកទី ៣ ដ៏សាហាវបានបង្កភាពស្មុគស្មាញ ដោយការចាក់វ៉ាក់សាំង ដែលមានរួមបញ្ចូលទាំងប្រទេសមួយចំនួន បានបញ្ឈប់ការចាក់វ៉ាក់សាំងរបស់ AstraZeneca ជាបណ្តោះអាសន្ន ដើម្បីឆ្លើយតបនឹងករណីឈាមកកក្នុងសរសៃឈាម។
ចាប់តាំងពីពេលនោះមក ភាគច្រើនបានប្រើប្រាស់វ៉ាក់សាំងឡើងវិញបន្ទាប់ពីទីភ្នាក់ងារថ្នាំអឺរ៉ុបបានរកឃើញថាវាមានសុវត្ថិភាពនិងប្រសិទ្ធភាព។ ប៉ុន្តែក្រុមហ៊ុន AstraZeneca បានចែកចាយតែ ៣០ ភាគរយនៃចំនួន ៩០ លានដូសដែលខ្លួនបានសន្យាជាមួយសហភាពអឺរ៉ុបសម្រាប់ត្រីមាសទី ១ ។ លោក បេនឡេបាននិយាយថាលោកជឿជាក់ថាវ៉ាក់សាំងកាន់តែច្រើននឹងមកដល់ក្នុងពេលឆាប់ៗនេះ ដោយរំពឹងថានឹងមានពី ៣០០ ទៅ ៣៥០ លានដូសក្នុងចន្លោះខែមីនានិងមិថុនា។ លោកបន្តថាបច្ចុប្បន្នរោងចក្រចំនួន ៥៥ កំពុងផលិតវ៉ាក់សាំងនៅអឺរ៉ុប៕
ប្រភព៖ AFP